ថ្ងៃសៅរ៍ ទី០១ ខែតុលា ឆ្នាំ២០២២
អំណានព្រះគម្ពីរពេលព្រឹក៖ ចូរពាក់គ្រប់គ្រឿងសឹករបស់ព្រះ ដើម្បីឲ្យអាចនឹងឈរមាំមួន ទាស់នឹងឧបាយកលទាំងអម្បាលម៉ានរបស់អារក្ស ដ្បិតយើងរាល់គ្នាមិនមែនតយុទ្ធនឹងសាច់ឈាមទេ គឺ និងពួកគ្រប់គ្រង ពួកមានអំណាច និងពួកម្ចាស់នៃសេចក្តីងងឹតនៅលោកីយ៍នេះវិញ ហើយទាស់នឹងអំណាចអាក្រក់ខាងវិញ្ញាណ នៅស្ថានដ៏ខ្ពស់ដែរ។ អេភេសូរ ៦:១១-១២
អំណានប្រចាំថ្ងៃ៖ កលល្បិចរបស់សាតាំង
អស់អ្នកដែលប្រឆាំងទៅនឹងការបង្រៀនពីជំនឿវិញ្ញាណនិយម នឹងត្រូវប្រយុទ្ធជាមួយនឹងស្តេចនៃសេចក្តីងងឹត មិនមែនជាមួយមនុស្សទេ គឺរួមទាំងសាតាំងនិងទេវតាទាំងឡាយរបស់វាផង។ ពួកគេបានចូលទៅក្នុងការប្រកួតប្រឆាំងនឹងពួកស្តេចពួកមានអំណាច និងពួកវិញ្ញាណអាក្រក់នៅទីដ៏ខ្ពស់។ សាតាំងមិនបានដកថយមួយសង់ទីម៉ែត្រឡើយ លើកលែងតែវាត្រូវបានបណ្តេញចេញដោយអំណាចរបស់ទេវតានៃស្ថានសួគ៌តែប៉ុណ្ណោះ។ រាស្ត្ររបស់ព្រះអាចនឹងបានជួបនឹងវា ដោយប្រើព្រះបន្ទូល ដូចដែលព្រះអង្គសង្គ្រោះរបស់យើងដែរ «ដ្បិតមានសេចក្តីចែងទុកមកថា»។ សព្វថ្ងៃនេះសាតាំងក៏អាចដកស្រង់យកខព្រះគម្ពីរ ដូចជានៅសម័យព្រះគ្រីស្ទដែរ ហើយវានឹងក្លែងការបង្រៀនពីព្រះគម្ពីរ ដើម្បីទ្រទ្រង់ការបំភាន់របស់វា។ ប៉ុន្តែព្រះបន្ទូលនៅក្នុងព្រះគម្ពីរ នឹងធ្វើជាសព្វាអាវុធដ៏មានអំណាចនៅក្នុងការប្រយុទ្ធនេះ។
អ្នកដែលឈរនៅក្នុងគ្រាដែលមានគ្រោះភ័យ ត្រូវតែយល់ពីទីបន្ទាល់នៃព្រះគម្ពីរ ទាក់ទងនឹងនិស្ស័យរបស់មនុស្សនិងសភាវនៃការស្លាប់ ដ្បិតនៅពេលអនាគតដ៏ខ្លីខាងមុខនេះ មនុស្សជាច្រើននឹងត្រូវប្រឈមមុខជាមួយនឹងវិញ្ញាណអារក្ស ដែលវាក្លែងបន្លំធ្វើជាបងប្អូនឬមិត្តភក្តិជាទីស្រឡាញ់ ហើយប្រកាសពីជំនឿដ៏មានគ្រោះថ្នាក់។ ពួកវិញ្ញាណដែលនឹងលេចមកនោះ នឹងអំពាវនាវឱ្យយើងអាណិតអាសូរ ហើយនិងធ្វើការអស្ចារ្យ ដើម្បីទ្រទ្រង់បំណងប្រាថ្នារបស់វា។ យើងត្រូវតែបានត្រៀមខ្លួនទប់ទល់នឹងវិញ្ញាណទាំងនោះដោយសេចក្តីពិតនៃព្រះគម្ពីរ ដែលថាមនុស្សស្លាប់មិនដឹងអ្វីទាំងអស់ ហើយថាពួកអ្នកដែលលេចមកនោះ គឺជាវិញ្ញាណអារក្សទេ។
សាតាំងបានរៀបចំសម្រាប់ការខំប្រឹងប្រែងចុងក្រោយរបស់វា ដើម្បីបោកបញ្ឆោតដល់មនុស្ស នៅក្នុងពិភពលោកនេះ ជាយូរមកហើយ។ វាបានចាក់គ្រឹះនៃការងាររបស់វា ដោយការធានាអះអាងដែលវាផ្តល់ទៅឱ្យនាងអេវ៉ា នៅក្នុងសួនច្បារអេដែនថា «អ្នកនឹងមិនស្លាប់ជាពិតមែនទេ ដ្បិតព្រះទ្រង់ជ្រាបថា នៅថ្ងៃណាដែលអ្នកបរិភោគ នោះភ្នែកអ្នកនឹងបានភ្លឺឡើង ហើយអ្នកនឹងបានដូចជាព្រះដែរ ព្រមទាំងដឹងការខុសត្រូវផង» លោកុប្បតិ្ត៣:៤, ៥)។ វាបានរៀបចំផ្លូវសម្រាប់ស្នាដៃឯកនៃការបោកប្រាស់របស់វាដោយបង្កើនអ្នកវិញ្ញាណនិយមបន្តិចម្តងៗ។ វានៅមិនទាន់បានសម្រេចតាមផែនការរបស់វាទាំងស្រុងនៅទ្បើយទេ ប៉ុន្តែ វានឹងសម្រេចនៅក្នុងពេលចុងក្រោយ ហើយ មនុស្សលោកនឹងដើរចូលទៅក្នុងការបំភាន់របស់វា។ ពួកគេកំពុងលង់លក់នៅក្នុងសេចក្តីស្លាប់ ហើយគេនឹងភ្ញាក់ដឹងខ្លួនឡើងវិញ ដោយសារតែការទម្លាក់សេចក្តីក្រោធរបស់ព្រះតែមួយប៉ុណ្ណោះ។
អំណានព្រះគម្ពីរពេលល្ងាច៖ យេរេមា ជំពូក ១០:១-១៥
ខចងចាំ៖ ដ្បិតមនុស្សដែលរស់ គេដឹងថាខ្លួននឹងស្លាប់ជាមិនខាន តែមនុស្សស្លាប់ឥតដឹងអ្វីឡើយ គេក៏គ្មានរង្វាន់អ្វីទៀតដែរ ពីព្រោះសេចក្តីនឹកចាំពីគេបានសូន្យបាត់ហើយ ទោះទាំងសេចក្តីស្រឡាញ់ សេចក្តីសំអប់ នឹងសេចក្តីឈ្នានីសរបស់គេវិនាសសូន្យបាត់ទៅហើយ គេក៏ឥតមានចំណែកណា ក្នុងការអ្វីដែលធ្វើនៅក្រោមថ្ងៃជាដរាបតទៅមុខដែរ។ សាស្តា ៩:៥-៦
