ថ្ងៃពុធ ទី១២ ខែតុលា ឆ្នាំ២០២២
អំណានព្រះគម្ពីរពេលព្រឹក៖ មួយទៀត អញនឹងតាំងសន្ធិសញ្ញានឹងគេ សញ្ញានោះនឹងនៅជាប់នឹងគេអស់កល្បជានិច្ច អញនឹងតាំងគេឡើងហើយចំរើនគេឲ្យមានគ្នាជាច្រើន ព្រមទាំងដាក់ទីបរិសុទ្ធរបស់អញ នៅកណ្តាលគេឲ្យនៅអស់កល្បជានិច្ច ព្រះវិហាររបស់អញនឹងនៅជាមួយនឹងគេដែរ អញក៏នឹងធ្វើជាព្រះដល់គេ ហើយគេនឹងបានជារាស្ត្ររបស់អញ។ អេសេគាល ៣៧:២៦-២៧
អំណានប្រចាំថ្ងៃ៖
ព្រះសម្រេចព្រះទ័យរំដោះរាស្ត្ររបស់ទ្រង់នៅពេលពាក់កណ្តាលអាធ្រាត្រ។ ក្នុងខណៈដែលពួកអ្នកមានបាបកំពុងសើចចំអកនៅព័ទ្ធជុំវិញពួកបរិសុទ្ធស្រាប់តែព្រះអាទិត្យក៏បានរះឡើង បញ្ចេញរស្មីយ៉ាងពេញទំហឹង ហើយព្រះច័ន្ទក៏នៅតែបញ្ចេញពន្លឺ។ ពួកអ្នកមានបាបក៏បានមើលទៅហេតុការណ៍នោះដោយមានការអស្ចារ្យ នៅពេលពួកបរិសុទ្ធបានឃើញសញ្ញានៃការរំដោះរបស់គេដោយអំណរ។ ទីសម្គាល់និងការអស្ចារ្យផ្សេងៗបានកើតឡើងជាបន្តបន្ទាប់ យ៉ាងរហ័ស។ អ្វីៗគ្រប់យ៉ាងហាក់បីដូចជាត្រឡប់ទៅជាខុសពីច្បាប់ធម្មជាតិ។ ទឹកបានឈប់ហូរ ពពកខ្មៅយ៉ាងក្រាសបានលេចឡើង ហើយរសាត់មកបុកគ្នា។ ប៉ុន្តែ មានប្រឡោះមួយយ៉ាងច្បាស់ ដែលពោរពេញទៅដោយសិរីល្អ ហើយមានសំឡេងមួយបានចេញពីទីនោះមក ដែលជាព្រះបន្ទូលរបស់ព្រះ ហាក់បីដូចជាទឹកធ្លាក់ ធ្វើឱ្យកក្រើកផ្ទៃមេឃនិងផែនដី។ មានការរញ្ជួយផែនដីយ៉ាងខ្លាំង។ ផ្នូរខ្មោចជាច្រើនបានរបើកឡើង ហើយអស់អ្នកដែលបានស្លាប់ដោយសេចក្តីជំនឿលើសាររបស់ទេវតាទីបី និងជាអ្នកដែលបានរក្សាថ្ងៃបរិសុទ្ធ បានងើបឡើងចេញពីធូលីដីនៅក្នុងផ្នូរ មកស្តាប់សេចក្តីសញ្ញានៃសេចក្តីសុខសាន្តដែលព្រះបានប្រទានដល់អ្នកដែលគោរពតាមច្បាប់របស់ទ្រង់។
អំណានព្រះគម្ពីរពេលល្ងាច៖ វិវរណៈ ជំពូក ៦ៈ១២-១៧
ខចងចាំ៖ នៅគ្រានោះ គេនឹងពោលថា មើល នេះគឺជាព្រះនៃយើងរាល់គ្នា យើងបានរង់ចាំទ្រង់ ហើយទ្រង់នឹងជួយសង្គ្រោះយើង នេះគឺជាព្រះយេហូវ៉ាហើយ យើងបានរង់ចាំទ្រង់ យើងនឹងមានចិត្តរីករាយ ហើយត្រេកអរ ដោយសេចក្តីសង្គ្រោះរបស់ទ្រង់។ អេសាយ ២៥:៩
