ថ្ងៃសុក្រ ទី១៤ ខែតុលា ឆ្នាំ២០២២
អំណានព្រះគម្ពីរពេលព្រឹក៖ ព្រោះព្រះអម្ចាស់ទ្រង់នឹងយាងចុះពីស្ថានសួគ៌មក ដោយស្រែកបង្គាប់១ព្រះឱស្ឋ ទាំងមានឮសំឡេងមហាទេវតា និងត្រែរបស់ព្រះផង នោះពួកស្លាប់ក្នុងព្រះគ្រីស្ទនឹងរស់ឡើងវិញជាមុនបង្អស់ រួចយើងរាល់គ្នាដែលកំពុងតែរស់នៅ ក៏នឹងបានលើកឡើង ទៅក្នុងពពកជាមួយគ្នាទាំងអស់ ដើម្បីឲ្យបានជួបជុំនឹងព្រះអម្ចាស់នៅនាអាកាស យ៉ាងនោះ យើងនឹងនៅជាមួយនឹងព្រះអម្ចាស់ជាដរាបទៅ។ ថែស្សាឡូនីចទី១ ៤:១៦-១៧
អំណានប្រចាំថ្ងៃ៖ ការយាងមកជាលើកទីពីររបស់ព្រះគ្រីស្ទ
ហើយនៅខណៈនោះស្រាប់តែមានពពកលេចមក ហើយកូនមនុស្សក៏បានគង់នៅលើពពកនោះ។ ដំបូងឡើយពពកនោះលេចឡើងនៅទីឆ្ងាយ មើលទៅដូចជាដុំពពកតូចមួយ។ ទេវតាក៏បានប្រាប់ថា នេះគឺជាសញ្ញារបស់កូនមនុស្ស។ នៅពេលដែលដុំពពកនេះមកកាន់តែជិតផែនដីឡើង នោះយើងអាចមើលឃើញសិរីល្អនិងព្រះបារមីរបស់ព្រះយេស៊ូវ ដែលទ្រង់គង់លើពពកនោះ ដែលទ្រង់បានយាងមកជាអ្នកមានជ័យជំនះ។ ទេវតាដែលមានពន្លឺចែងចាំងចេញពីមកុដរបស់លោកបានហែហមទ្រង់មក។
គ្មានពាក្យណាអាចពិពណ៌នាពីទស្សនីយភាពដ៏អស្ចារ្យនោះបានទេ។ ដុំពពកដ៏រស់រវើកនៃសិរីល្អដ៏អស្ចារ្យនោះ បានរំកិលមកជិតឡើងៗ ហើយយើងអាចមើលឃើញយ៉ាងច្បាស់នូវព្រះយេស៊ូដែលមានរូបរាងជាមនុស្សដ៏គួរឱ្យស្រឡាញ់។ ទ្រង់មិនបានពាក់មកុដនៃភួងបន្លាទៀតទេ ប៉ុន្តែ ទ្រង់ពាក់មកុដដែលពោរពេញទៅដោយសិរីរុងរឿងនៅលើព្រះសិរទ្រង់ វិញ។ នៅពីលើព្រះពស្ត្រនិងលើភ្លៅរបស់ទ្រង់ មានសរសេរពាក្យថា ស្តេច លើអស់ទាំងស្តេច ព្រះលើអស់ទាំងព្រះ។ ព្រះភក្ត្ររបស់ទ្រង់ភ្លឺដូចជាព្រះអាទិត្យនៅកណ្តាលថ្ងៃត្រង់ ព្រះនេត្ររបស់ទ្រង់ដូចជាអណ្តាតភ្លើង ហើយព្រះបាទទ្រង់មានលក្ខណៈដូចជាលង្ហិនរលីង។ ព្រះសូរសៀង របស់ទ្រង់ឮហាក់បីដូចជាការប្រគំតន្ត្រី។ ផែនដីញាប់ញ័រនៅចំពោះទ្រង់ ផ្ទៃមេឃបានរមូរចូលគ្នាដូចជាក្រាំង ហើយភ្នំនិងកោះបានរំកិលចេញពីទីកន្លែងដើមរបស់វា។ «អស់ទាំងស្តេចនៅផែនដីនិងពួកអ្នកធំ ពួកអ្នកមាន ពួកមេទ័ព ពួកខ្លាំងពូកែ ហើយគ្រប់ទាំងបាវបំរើ និងអ្នកជាទាំងប៉ុន្មាន គេពួននៅ ក្នុងរអាង ហើយក្នុងក្រហែងភ្នំទាំងអស់គ្នា គេអង្វរទៅភ្នំ ហើយទៅថ្មថា សូមធ្លាក់មកលើយើង ដើម្បីបំបាំងយើងពីព្រះភក្ត្រ ព្រះអង្គ ដែលគង់លើ បល្ល័ង្ក និងពីសេចក្តីក្រោធរបស់កូនចៀមចេញ ដ្បិតថ្ងៃធំនៃសេចក្តីក្រោធរបស់ទ្រង់បានមកដល់ហើយ តើអ្នកណាអាចនឹងឈរនៅបាន»។
អស់អ្នកដែលបានសម្លាប់កូនដ៏ស្មោះត្រង់របស់ព្រះចេញពីផែនដី កាលពីពេលថ្មីៗនេះ ឥឡូវនេះគេបានឃើញសិរីរុងរឿងរបស់ព្រះ បានស្ថិតនៅលើពួកអ្នកដែលស្មោះត្រង់ជាមួយនឹងព្រះយេស៊ូវ ហើយនៅកណ្តាលការភ័យខ្លាចរបស់គេនោះ ពួកគេបានឮសំឡេងរបស់ពួកបរិសុទ្ធបន្លឺឡើងដោយអំណរថា «មើលចុះ នេះហើយគឺជាព្រះរបស់យើង ពួកយើងបានរង់ចាំទ្រង់ ហើយទ្រង់នឹងជួយសង្គ្រោះពួកយើង» អេសាយ ២៥:៩។
អំណានព្រះគម្ពីរពេលល្ងាច៖ វិវរណៈ ជំពូក ១៩ៈ១-១០
ខចងចាំ៖ នៅគ្រានោះ គេនឹងពោលថា មើល នេះគឺជាព្រះនៃយើងរាល់គ្នា យើងបានរង់ចាំទ្រង់ ហើយទ្រង់នឹងជួយសង្គ្រោះយើង នេះគឺជាព្រះយេហូវ៉ាហើយ យើងបានរង់ចាំទ្រង់ យើងនឹងមានចិត្តរីករាយ ហើយត្រេកអរ ដោយសេចក្តីសង្គ្រោះរបស់ទ្រង់។ អេសាយ ២៥:៩
