ថ្ងៃអាទិត្យ ទី១៦ ខែតុលា ឆ្នាំ២០២២
អំណានព្រះគម្ពីរពេលព្រឹក៖ រីឯព្រះ ដែលអាចនឹងថែរក្សា មិនឲ្យអ្នករាល់គ្នាជំពប់ដួល ហើយនិងដាក់អ្នករាល់គ្នា នៅចំពោះសិរីល្អទ្រង់ ដោយឥតមានកន្លែងបន្ទោសបាន ព្រមទាំងមានចិត្តត្រេកអរផង គឺជាព្រះអង្គដ៏ជាព្រះតែមួយ ជាព្រះអង្គសង្គ្រោះនៃយើងរាល់គ្នា ដោយសារព្រះយេស៊ូវគ្រីស្ទ ជាព្រះអម្ចាស់នៃយើង នោះសូមឲ្យទ្រង់បានសិរីល្អ ឫទ្ធានុភាព ព្រះចេស្តា និងអំណាច តាំងពីមុនអស់កល្ប នៅជាន់ឥឡូវនេះ ហើយទៅដល់អស់កល្បជានិច្ចតទៅ។ យូដាស ខ២៤-២៥
អំណានប្រចាំថ្ងៃ៖
នៅពេលនោះ ខ្ញុំបានឃើញទេវតាជាច្រើនបានយកមកុដដ៏មានសិរីល្អចេញពីទីក្រុង ជាមកុដសម្រាប់ពួកបរិសុទ្ធគ្រប់ៗអង្គ ដែលមានឈ្មោះរបស់លោកបានសរសេរនៅលើមកុដទាំងនោះផង។ នៅពេលដែលព្រះយេស៊ូវបានហៅឱ្យយកមកុដទាំងនោះមក ពួកទេវតាក៏បានយកមកថ្វាយដល់ទ្រង់ ហើយព្រះយេស៊ូបានយកព្រះហស្តស្តាំរបស់ទ្រង់ទៅបំពាក់មកុដទាំងនោះដោយសេចក្តីស្រឡាញ់ នៅលើក្បាលរបស់ពួកបរិសុទ្ធគ្រប់គ្នា។ ដោយអាកប្បកិរិយាដូចគ្នានេះ ពួកទេវតាបានយកពិណមកថ្វាយដល់ទ្រង់ ហើយព្រះយេស៊ូវក៏បានចែកដល់ពួកបរិសុទ្ធគ្រប់គ្នាដែរ។ មេទេវតាមួយអង្គបានចាប់ផ្តើមបទភ្លេង ហើយបន្ទាប់មកសំឡេងទាំងអស់ក៏បានបន្លឺឡើងដោយក្តីអំណរ ជាបទសរសើរតម្កើងយ៉ាងសប្បាយ ហើយដៃទាំងអស់របស់ពួកទេវតានិងពួកបរិសុទ្ធបានដេញពិណទាំងអស់គ្នាបញ្ចេញជាសំឡេងរងំរណ្តំយ៉ាងពីរោះក្រៃលែង។
បន្ទាប់មក ខ្ញុំបានឃើញព្រះយេស៊ូវបាននាំអស់អ្នកដែលបានប្រោសលោះ ទៅកាន់ទ្វារនៃទីក្រុង។ ទ្រង់ក៏បានបើកទ្វារដ៏ភ្លឺចិញ្ចាច ហើយបង្គាប់ឱ្យមនុស្សគ្រប់ទាំងសាសន៍ដែលបានរក្សាសេចក្តីពិតដើរចូលទៅខាងក្នុង។
នៅខាងក្នុងទីក្រុង មានរបស់គ្រប់យ៉ាងដែលគួរឱ្យចង់គយគន់។ ពួកគេបានមើលឃើញសិរីល្អនៅគ្រប់ទិសទី។ បន្ទាប់មក ព្រះយេស៊ូវក៏បានទតមើលមុខពួកអ្នកបរិសុទ្ធដែលទ្រង់បានប្រោសលោះ ទឹកមុខរបស់គេមានរស្មីចាំងចែង ហើយនៅពេលដែលទ្រង់សម្លឹងទតទៅកាន់ពួកគេ ទ្រង់បានមានបន្ទូលដោយព្រះសូរសៀងដ៏ពីរោះថា «អញនឹងឃើញផលនៃការដែលព្រលឹងទ្រង់រងវេទនា នោះនឹងបានស្កប់ស្កល់ផង អ្នកដ៏សុចរិត គឺជាអ្នកបំរើរបស់អញ ទ្រង់នឹងធ្វើឱ្យមនុស្សជាច្រើនបានសុចរិត ដោយគេស្គាល់ដល់ទ្រង់ ហើយទ្រង់នឹងទទួលរងទោសចំពោះអំពើទុច្ចរិតរបស់គេ។ នឹងគ្មានសេចក្តីស្លាប់ ឬសេចក្តីសោកសង្រេង ឬសេចក្តីយំទួញ ឬទុក្ខលំបាកណាទៀតឡើយ»។
អំណានព្រះគម្ពីរពេលល្ងាច៖ អេសាយ ជំពូក ៣៥
ខចងចាំ៖ ព្រោះព្រះអម្ចាស់ទ្រង់នឹងយាងចុះពីស្ថានសួគ៌មក ដោយស្រែកបង្គាប់១ព្រះឱស្ឋ ទាំងមានឮសំឡេងមហាទេវតា និងត្រែរបស់ព្រះផង នោះពួកស្លាប់ក្នុងព្រះគ្រីស្ទនឹងរស់ឡើងវិញជាមុនបង្អស់។ ថែស្សាឡូនីចទី១ ៤:១៦
