ថ្ងៃអាទិត្យ ទី០២ ខែតុលា ឆ្នាំ២០២២
អំណានព្រះគម្ពីរពេលព្រឹក៖ ឯពួកអ្នកដែលមានប្រាជ្ញា គេនឹងភ្លឺដូចជារស្មីនៃផ្ទៃមេឃ ហើយពួកអ្នកដែលទាញនាំមនុស្សជាច្រើនឲ្យវិលមកឯសេចក្តីសុចរិតនោះនឹងភ្លឺដូចជាអស់ទាំងផ្កាយនៅជាដរាបតទៅ។ ដានីយ៉ែល ១២:៣
អំណានប្រចាំថ្ងៃ៖
ខ្ញុំបានឃើញទេវតាប្រញាប់ប្រញាល់យាងទៅមកនៅស្ថានសួគ៌។ លោកបានចុះទៅកាន់ផែនដី ហើយបានឡើងទៅកាន់ស្ថានសួគ៌វិញ ដោយរៀបចំសម្រាប់ការសម្រេចព្រឹត្តិការណ៍សំខាន់អ្វីមួយ។ រួចខ្ញុំបានឃើញទេវតាដ៏មានបារមីមួយអង្គទៀតត្រូវបានបង្គាប់ឱ្យចុះទៅផែនដី ហើយរួមសំឡេងជាមួយទេវតាទីបី ដើម្បីផ្តល់កម្លាំង និងអំណាចទៅលើដំណឹងរបស់លោក។ អំណាចនិងសិរីល្អដ៏ខ្លាំងអស្ចារ្យត្រូវបានប្រទានដល់ទេវតានោះ ហើយនៅពេលដែលលោកបានយាងចុះទៅផែនដីត្រូវបានបំភ្លឺដោយសិរីល្អរបស់លោក។ ពន្លឺដែលព័ទ្ធជុំវិញទេវតានេះបានជ្រៀតចូលទៅគ្រប់ទិសទី នៅពេលដែលលោកបានស្រែកដោយសំឡេងដ៏ខ្លាំងពូកែថា «ក្រុងបាប៊ីឡូនដ៏ជាធំបានរលំហើយ បានរលំហើយ ក៏ត្រឡប់ជាលំនៅនៃពួកអារក្ស ជាកន្លែងរបស់អស់ទាំងវិញ្ញាណអសោចិ៍ និងអស់ទាំងសត្វស្លាបអសោចិ៍ គួរខ្ពើម»។
ដំណឹងនៃការដួលរលំនៃទីក្រុងបាប៊ីឡូន ដូចដែលទេវតាទីពីរបានប្រកាស ត្រូវបានប្រកាសម្តងទៀត ដោយមានការបន្ថែមពីការពុករលួយ ដែលបានចូលទៅក្នុងពួកជំនុំតាំងពីឆ្នាំ១៨៤៤ ផង។ ការងាររបស់ទេវតានេះមកដល់ចំពេល ដើម្បីចូលរួមនៅក្នុងការងារដ៏ធំចុងក្រោយនៃសាររបស់ ទេវតាទីបី នៅពេលដំណឹងនោះកំពុងឮខ្លាំងឡើង ទៅជាសម្រែកយ៉ាងខ្លាំងមួយ។ ហើយរាស្ត្ររបស់ព្រះត្រូវបានរៀបចំឱ្យឈរបាននៅក្នុងពេលវេលានៃសេចក្តីល្បួង ដែលពួកគេនឹងជួប នៅពេលឆាប់ៗនេះ។ ខ្ញុំបានឃើញពន្លឺយ៉ាងខ្លាំងនៅពីលើពួកគេ ហើយពួកគេបានចូលរួមប្រកាសពីសាររបស់ទេវតាទីបី ដោយគ្មានការភ័យខ្លាច។
អំណានព្រះគម្ពីរពេលល្ងាច៖ វិវរណៈ ជំពូក ១៨
ខចងចាំ៖ ដូច្នេះ ចូរទៅបញ្ចុះបញ្ចូលឲ្យមានសិស្សនៅគ្រប់ទាំងសាសន៍ ព្រមទាំងធ្វើបុណ្យជ្រមុជទឹកឲ្យ ដោយនូវព្រះនាមព្រះវរបិតា ព្រះរាជបុត្រា និងព្រះវិញ្ញាណបរិសុទ្ធចុះ ហើយបង្រៀន ឲ្យគេកាន់តាមគ្រប់ទាំងសេចក្តី ដែលខ្ញុំបានបង្គាប់មកអ្នករាល់គ្នាផង ហើយមើល ខ្ញុំក៏នៅជាមួយនឹងអ្នករាល់គ្នាជារាល់ថ្ងៃដែរ ដរាបដល់បំផុតកល្ប។ អាម៉ែន។ ម៉ាថាយ ២៨:១៩-២០
