ថ្ងៃសុក្រ ទី២១ ខែតុលា ឆ្នាំ២០២២
អំណានព្រះគម្ពីរពេលព្រឹក៖ តើមិនដឹងថា ពួកមនុស្សទុច្ចរិតមិនដែលបានគ្រងនគរព្រះទុកជាមរដកទេឬអី កុំឲ្យច្រឡំឡើយ ដ្បិតពួកមនុស្សកំផិត ពួកថ្វាយបង្គំរូបព្រះ ពួកសហាយស្មន់ ពួកអ្នកសំរេចកិច្ចដោយខ្លួនឯង ពួកលេងកូនជឹង ពួកចោរ ពួកមនុស្សលោភ ពួកប្រមឹក ពួកត្មះដៀល និងពួកប្លន់កំហែង នោះមិនដែលបានគ្រងនគរព្រះទុកជាមរដកឡើយ។ កូរិនថូសទី១ ៦:៩-១០
អំណានប្រចាំថ្ងៃ៖ ការមិនព្រមកែប្រែចិត្ត
នៅពេលនោះព្រះយេស៊ូវដែលអមដំណើរដោយទេវតាបរិសុទ្ធ និងពួកបរិសុទ្ធបានធ្វើដំណើរ ឆ្ពោះទៅទីក្រុងម្តងទៀត ហើយការទួញសោកនិងការឈឺចាប់ដ៏ជូរចត់របស់ពួកមនុស្សទុច្ចរិតបានស្រែកឡើងរំពងអាកាស។ ពេលនោះខ្ញុំបានឃើញសាតាំងចាប់ផ្តើមធ្វើកិច្ចការរបស់វាសាជាថ្មីឡើងវិញ។ វាបានដើរជុំវិញពួកមនុស្សដែលដើរតាមវា ហើយបានធ្វើឱ្យរូបកាយដ៏ខ្ទេចខ្ទាំ និងមានភាពកម្សោយរបស់ពួកគេបានរឹងមាំឡើងវិញ ហើយវាបានប្រាប់ដល់ពួកគេថា វាហើយនិងទេវតារបស់វា មានអំណាចគ្រប់បែបយ៉ាង។ វាបានចង្អុលទៅអ្នកដែលទើបតែនឹងងើបពីស្លាប់ឡើងវិញ ដែលមានចំនួនជាច្រើនលាននាក់ និងអ្នកចម្បាំងជាច្រើនកុះករ ហើយនិងស្តេចដែលមានការស្ទាត់ជំនាញក្នុងការធ្វើសឹក ព្រមទាំងបានទទួលជ័យជំនះ ហើយបានគ្រប់គ្រងទឹកដីកន្លងមក។ មានទាំងយក្សកំណាចជាច្រើន ព្រមទាំងមនុស្សដែលមានភាពក្លាហាន ដែលមិនដែលបរាជ័យក្នុងការច្បាំងផង។ មានទាំងណាប៉ូឡេអុង ដែលពោរពេញទៅដោយអំនួត និងមហិច្ឆតា ដែលបានធ្វើឱ្យនគរនានាមានការភ័យញាប់ញ័រ។ មនុស្សខ្ពស់ៗដែលមានឈ្មោះល្បីល្បាញ ដែលត្រូវបានគេផ្តួលរំលំក្នុងចម្បាំងដែរ។ ពួកនេះបានបរាជ័យដោយសារតែការល្មោភសង្គ្រាមរបស់គេ គេចង់បានអំណាចតែគេក៏បានស្លាប់ទៅ។
នៅខណៈដែលពួកគេបានងើបចេញពីផ្នូរមក គេក៏នៅតែមានគំនិតដដែលដូចជាកាលគេមិនទាន់ស្លាប់ដែរ។ ពួកគេនៅតែមានគំនិតចង់កាន់កាប់ទឹកដី ដូចជានៅគ្រាដែលធ្លាប់បរាជ័យដដែល។ សាតាំងបានពិភាក្សាជាមួយនឹងទេវតារបស់វា ហើយបន្ទាប់មក ជាមួយនឹងពួកស្តេច និងពួកអ្នកដែលធ្លាប់មានជ័យជំនះ។ រួចវាបានសម្លឹងមើលទៅកាន់កងទ័ពដ៏ច្រើនរបស់វា ហើយប្រាប់ដល់ពួកគេថា អ្នកដែលនៅក្នុងទីក្រុងនោះមានគ្នាតិចណាស់ ហើយពួកគេក៏មិនមានកម្លាំងដែរ ហើយថាពួកវាអាចដណ្តើមយកទីក្រុងនោះបាន ហើយបណ្តេញពួកអ្នកដែលរស់នៅទីនោះចេញ រួចយើងនឹងបានគ្រងមរតកហើយនិងសិរីល្អរបស់ពួកគេវិញ។
សាតាំងក៏បានសម្រេចជោគជ័យក្នុងការបោកបញ្ឆោតពួកគេ ហើយវាក៏បានបញ្ជាឱ្យពួកគេរៀបចំដើម្បីនឹងធ្វើសឹកសង្គ្រាម។ នៅក្នុងកងទ័ពដ៏ធំរបស់ពួកវា ពួកវាមានមនុស្សដែលចេះផលិតគ្រឿងអាវុធ ហើយពួកគេបានផលិតគ្រឿងសស្ត្រាវុធគ្រប់យ៉ាង។ ដោយមានសាតាំងជាមេដឹកនាំពួកគេក៏បានធ្វើដំណើរឆ្ពោះទៅមុខ។ ស្តេចព្រមទាំងអ្នកចម្បាំងដ៏ខ្លាំងពូកែបានធ្វើដំណើរពីក្រោយសាតាំង រួចបន្ទាប់មកហ្វូងមនុស្សនៅពីក្រោយជាបន្តជាច្រើនក្រុម។ ក្រុមនីមួយៗមានមេដឹកនាំម្នាក់ ហើយពួកគេក៏បានស្តាប់បញ្ជា ក្នុងការធ្វើដំណើរព្យូហយាត្រានៅលើផែនដីដែលបាក់បែក ឆ្ពោះទៅកាន់ទីក្រុងបរិសុទ្ធ។ ព្រះយេស៊ូវបានបិទទ្វារទីក្រុងនោះ ហើយទ័ពរបស់សាតាំងក៏បានព័ទ្ធជុំវិញទីក្រុង ទាំងច្បាំងផង ដោយសង្ឃឹមថានឹងមានចម្បាំងដ៏ឃោរឃៅ។
អំណានព្រះគម្ពីរពេលល្ងាច៖ វិវរណៈ ជំពូក ២០ៈ៧-១០
ខចងចាំ៖ ព្រោះព្រះអម្ចាស់ទ្រង់នឹងយាងចុះពីស្ថានសួគ៌មក ដោយស្រែកបង្គាប់១ព្រះឱស្ឋ ទាំងមានឮសំឡេងមហាទេវតា និងត្រែរបស់ព្រះផង នោះពួកស្លាប់ក្នុងព្រះគ្រីស្ទនឹងរស់ឡើងវិញជាមុនបង្អស់។ ថែស្សាឡូនីចទី១ ៤:១៦
