ថ្ងៃព្រហស្បតិ៍ ទី២៧ ខែតុលា ឆ្នាំ២០២២
អំណានព្រះគម្ពីរពេលព្រឹក៖ ឥឡូវ លោកីយ៍នេះត្រូវជាប់ទោសហើយ ឥឡូវនេះ ចៅហ្វាយរបស់លោកីយ៍នេះ ក៏ត្រូវបោះចោលចេញ ឯខ្ញុំ បើសិនជាខ្ញុំត្រូវលើកពីដីឡើង នោះខ្ញុំនឹងទាញមនុស្សទាំងអស់មកឯខ្ញុំ។ យ៉ូហាន ១២:៣១-៣២
អំណានប្រចាំថ្ងៃ៖
មើលទៅសាតាំងហាក់បីដូចជានៅទ្រឹងមួយកន្លែងមិនអាចកំរើក នៅពេលដែលវាឃើញសិរីល្អ ហើយនិងភាពអស្ចារ្យរបស់ព្រះគ្រីស្ទ។ វាដែលធ្លាប់ជាទេវតាគ្របបាំងចេរូប៊ីន វាបាននឹកឃើញកន្លែងដែលវាត្រូវបានទម្លាក់មក។ ទេវតាដ៏ខ្ពស់បំផុតដែលមានពន្លឺភ្លឺចែងចាំង «ជាកូននៃផ្កាយព្រឹក» វាបានផ្លាស់ប្តូរយ៉ាងខ្លាំង! កិត្តិយសរបស់វាបានធ្លាក់ចុះយ៉ាងខ្លាំង!
សាតាំងយល់ឃើញថាការបះបោរដោយស្ម័គ្រចិត្តរបស់វា ធ្វើឱ្យវាមិនសមនឹងនៅស្ថានសួគ៌ឡើយ។ វាបានហ្វឹកហាត់អំណាចរបស់វា ដើម្បីធ្វើសង្គ្រាមប្រឆាំងនឹងព្រះ ភាពបរិសុទ្ធសេចក្តីសុខសាន្ត ហើយនិងភាពសុខដុមរមនានៅស្ថានសួគ៌នឹងបានក្លាយទៅជាទណ្ឌកម្មដ៏ធ្ងន់បំផុតសម្រាប់វា។ ការចោទប្រកាន់របស់វាប្រឆាំងទៅនឹងសេចក្តីមេត្តាករុណានិងសេចក្តីយុត្តិធម៌របស់ព្រះឥឡូវនេះត្រូវបានស្ងប់ស្ងាត់។
ការស្តីបន្ទោសដែលវាបានព្យាយាមទម្លាក់មកលើព្រះយេហូវ៉ា បានធ្លាក់មកលើខ្លួនវាទាំងស្រុង។ ហើយឥឡូវនេះសាតាំងក្រាបចុះ ហើយទទួលស្គាល់នូវសេចក្តីយុត្តិធម៌របស់ព្រះនិងអំពើបាបរបស់វា។
គ្រប់ទាំងការចោទសួរទាំងឡាយអំពីសេចក្តីពិតនិងកំហុសឆ្គងនៅក្នុងជម្លោះដ៏ធំ ដែលមានជាយូរមកហើយនោះត្រូវបានបង្ហាញឱ្យឃើញយ៉ាងច្បាស់។ សេចក្តីយុត្តិធម៌របស់ព្រះឈរយ៉ាងមាំជាភាពគ្មានទោស។ មនុស្សគ្រប់គ្នាអាចមើលឃើញយ៉ាងច្បាស់នូវអ្វីៗគ្រប់យ៉ាងដែលព្រះបានធ្វើសម្រាប់យើង។ ពេលវេលាបានមកដល់ នៅពេលដែលព្រះគ្រីស្ទកាន់កាប់តួនាទីស្របច្បាប់របស់ទ្រង់ ហើយទ្រង់ត្រូវបានលើកតម្កើងឱ្យខ្ពស់លើសអស់ទាំងស្តេច និងអ្នកមានអំណាចទាំងឡាយព្រមទាំងមាននាមខ្ពស់លើសអស់ទាំងឈ្មោះទាំងឡាយនៅលើលោកនេះ។
ទោះបីជាសាតាំងត្រូវបានបង្ខំឱ្យទទួលស្គាល់នូវសេចក្តីយុត្តិធម៌របស់ទ្រង់ ហើយចុះចូលនៅចំពោះឧត្តមភាពតែមួយគត់របស់ព្រះគ្រីស្ទក៏ដោយក៏អត្តចរិករបស់វានៅតែមិនផ្លាស់ប្តូរដដែល។ វិញ្ញាណនៃការបះបោរប្រឆាំងរបស់វាបានផ្ទុះឡើងវិស័យដូចជាទឹកជ្រោះធ្លាក់ពីភ្នំ។ ដោយមានចិត្តពោរពេញទៅដោយកំហឹង វាប្តេជ្ញាចិត្តថា មិនចុះចាញ់នៅក្នុងមហាវិវាទ (ជម្លោះដ៏ធំ) នោះឡើយ។ ពេលវេលានៃការវាយប្រយុទ្ធដ៏ខ្លាំងក្លាប្រឆាំងនឹងស្តេចនៃស្ថានសួគ៌បានមកដល់ហើយ។ វាប្រញាប់ប្រញាល់រត់ចូលទៅចំកណ្តាលហ្វូងមនុស្ស ដែលនៅក្រោមអំណាចរបស់វា ហើយខិតខំជំរុញពួកគេ ដោយកំហឹងដ៏ខ្លាំងរបស់វា ហើយពន្យុះពួកគេឱ្យក្រោកឡើង ធ្វើការវាយប្រយុទ្ធភ្លាម។ ប៉ុន្តែ មនុស្ស ជាច្រើនលាននាក់រាប់មិនអស់ ដែលវាបានជំរុញឱ្យបះបោរនោះ ឥឡូវនេះគ្មាននរណាម្នាក់បាន ទទួលស្គាល់អំណាចដ៏ធំរបស់វាទៀតឡើយ។ អំណាចរបស់វាក៏ត្រូវដល់ទីបញ្ចប់។ ចិត្តរបស់ពួកមនុស្សអាក្រក់មានពោរពេញទៅដោយសម្អប់ចំពោះព្រះ ដូចជាសាតាំងដែរ ប៉ុន្តែ ពួកគេឃើញថាពួកគេគ្មានសង្ឃឹមនឹងអាចយកជ័យជំនះពីព្រះយេហូវ៉ាបានឡើយ។ កំហឹងរបស់ពួកគេបានពុះពោរឡើង ប្រឆាំងទៅនឹងសាតាំង និងភ្នាក់ងារទាំងឡាយនៃការបោកប្រាស់របស់វាវិញ។ ជាមួយនឹងកំហឹងដ៏ខ្លាំងដូចបិសាចពួកគេងាកបែរមករកក្រុមសាតាំងវិញ ហើយឆាកនៃការប្រយុទ្ធរវាងមនុស្សអាក្រក់នៅពាសពេញពិភពលោកក៏បានកើតឡើង។
អំណានព្រះគម្ពីរពេលល្ងាច៖ ទំនុកតម្កើង ជំពូក ៣៧ៈ១-២២
ខចងចាំ៖ ដ្បិតយើងទាំងអស់គ្នាត្រូវទៅនៅមុខទីជំនុំជំរះរបស់ព្រះគ្រីស្ទ ដើម្បីឲ្យគ្រប់គ្នាបានទទួលតាមការដែលបានធ្វើ ពីកាលនៅក្នុងរូបកាយរៀងខ្លួន ទោះល្អឬអាក្រក់ក្តី។ កូរិនថូសទី២ ៥:១០
