ថ្ងៃអង្គារ ទី០៤ ខែតុលា ឆ្នាំ២០២២
អំណានព្រះគម្ពីរពេលព្រឹក៖ ខ្ញុំនឹងអរសប្បាយចំពោះព្រះយេហូវ៉ា ព្រលឹងខ្ញុំនឹងរីករាយចំពោះព្រះនៃខ្ញុំ ពីព្រោះទ្រង់បានប្រដាប់ខ្លួនខ្ញុំដោយសំលៀកបំពាក់នៃសេចក្តីសង្គ្រោះ ទ្រង់បានគ្រលុំខ្ញុំដោយអាវជាសេចក្តីសុចរិត ដូចជាប្តីថ្មោងថ្មីតែងខ្លួនដោយគ្រឿងលំអ ហើយដូចជាប្រពន្ធថ្មោងថ្មី ក៏ប្រដាប់ដោយត្បូងរបស់ខ្លួនដែរ ដ្បិតដែលដីធ្វើឲ្យចេញពន្លក ហើយសួនច្បារបណ្តាលឲ្យពូជផ្សេងៗ ដែលគេដាំនៅទីនោះ បានដុះឡើងជាយ៉ាងណា នោះព្រះអម្ចាស់យេហូវ៉ា ទ្រង់នឹងធ្វើឲ្យសេចក្តីសុចរិត និងសេចក្តីសរសើរ បានលេចឡើង នៅចំពោះអស់ទាំងសាសន៍យ៉ាងនោះដែរ។ អេសាយ ៦១:១០-១១
អំណានប្រចាំថ្ងៃ៖ ការព្រមានចុងក្រោយដល់ផែនដី
អំណាចដ៏ខ្លាំងលើសលុប បានធ្វើការនៅក្នុងពួកអ្នកស្មោះត្រង់ នៅពេលដែលអំណាចរបស់ព្រះបាននាំមកនូវការភ័យខ្លាចនិងការបញ្ឈប់បងប្អូននិងមិត្តភក្តិរបស់គេដែលមិនជឿព្រះ ឱ្យលែងហ៊ានប្រឆាំងនឹងការងារនៃព្រះវិញ្ញាណរបស់ព្រះ។
ការត្រាស់ហៅចុងក្រោយនេះត្រូវបានប្រកាសរហូតដល់ទាសករដ៏ក្រីក្រនិងអ្នកដែលមានជំនឿ ក្នុងចំណោមពួកគេបញ្ចេញជាចម្រៀងនៃអំណរដ៏លើសលប់របស់គេ នៅគ្រាដែលមានការរំដោះដ៏សប្បាយរីករាយ។ ហើយចៅហ្វាយរបស់គេមិនអាចត្រួតពិនិត្យលើគេឡើយ ការភ័យខ្លាចនិងការភ្ញាក់ផ្អើលបានធ្វើឱ្យគេនៅស្ងៀម។ ការអស្ចារ្យដ៏ធំបានកើតឡើង អ្នកឈឺត្រូវបានព្យាបាលឱ្យជា ហើយទីសម្គាល់និងការអស្ចារ្យបានដើរតាមពួកអ្នកជឿ។ ព្រះបានគង់នៅជាមួយការងាររបស់គេ ហើយពួកបរិសុទ្ធបានធ្វើតាមការ កែប្រែនៃសម្បជញ្ញៈផ្ទាល់របស់គេ និងបានរួបរួមជាមួយនឹងអ្នកដែលបានគោរពបញ្ញត្តិទាំងអស់របស់ព្រះ ទាំងបានប្រកាសសាររបស់ទេវតាទីបី ដោយគ្មានការភ័យខ្លាច។ ខ្ញុំបានឃើញថា សារទីបី បានបញ្ចប់ដោយអំណាច និងកម្លាំងខ្លាំងលើសលុបជាងសម្រែកនាពាក់កណ្តាលអធ្រាត្រទៅទៀត។ អ្នកបម្រើរបស់ព្រះមានពេញដោយអំណាចមកពីស្ថានសួគ៌ ដែលមានមុខចាំងពន្លឺ និងការចែងចាំងនៃការលះបង់ដ៏បរិសុទ្ធ បានចេញទៅប្រកាសដំណឹងពីស្ថានសួគ៌។ មនុស្សដែលបានបែកខ្ញែកទៅក្នុងអង្គការសាសនាទាំងឡាយ បានឆ្លើយតបទៅនឹងការត្រាស់ហៅនោះ ហើយមនុស្សសុចរិតបានប្រញាប់ប្រញាល់ចេញពីពួកជំនុំខ្មៅងងឹត ដូចជាលោកឡុតប្រញាប់ប្រញាល់ចេញពីទីក្រុងសូដុំម មុននឹងត្រូវបានទទួលការបំផ្លាញដូច្នោះដែរ។ រាស្ត្ររបស់ព្រះត្រូវបានរៀបចំដោយសិរីរុងរឿងដ៏ឧត្តមដែលធ្លាក់មកលើគេជាច្រើនឥតគណនា ដើម្បីរៀបចំពួកគេឱ្យទប់ទល់នឹងពេលវេលានៃការល្បួង។ ខ្ញុំបានឮសំឡេងជាច្រើនបានស្រែកឡើងនៅគ្រប់ទិសទីថា «នេះគឺជាការអត់ធ្មត់ របស់ពកួបរិសុទ្ធ ដែលកាន់តាមបញ្ញត្តិរបស់ព្រះ និងមានសេចក្តីជំនឿលើព្រះយេស៊ូវ»វិវរណៈ ១៤:១២។
អំណានព្រះគម្ពីរពេលល្ងាច៖ លោកកុប្បតិ្ត ជំពូក ១៩ៈ១-២៥
ខចងចាំ៖ ដូច្នេះ ចូរទៅបញ្ចុះបញ្ចូលឲ្យមានសិស្សនៅគ្រប់ទាំងសាសន៍ ព្រមទាំងធ្វើបុណ្យជ្រមុជទឹកឲ្យ ដោយនូវព្រះនាមព្រះវរបិតា ព្រះរាជបុត្រា និងព្រះវិញ្ញាណបរិសុទ្ធចុះ ហើយបង្រៀន ឲ្យគេកាន់តាមគ្រប់ទាំងសេចក្តី ដែលខ្ញុំបានបង្គាប់មកអ្នករាល់គ្នាផង ហើយមើល ខ្ញុំក៏នៅជាមួយនឹងអ្នករាល់គ្នាជារាល់ថ្ងៃដែរ ដរាបដល់បំផុតកល្ប។ អាម៉ែន។ ម៉ាថាយ ២៨:១៩-២០
