ថ្ងៃសុក្រ ទី០៧ ខែតុលា ឆ្នាំ២០២២
អំណានព្រះគម្ពីរពេលព្រឹក៖ ព្រះអម្ចាស់មិនផ្អាកសេចក្តីសន្យារបស់ទ្រង់ ដូចជាមានអ្នកខ្លះគិតស្មាននោះទេ គឺទ្រង់មានព្រះហឫទ័យអត់ធ្មត់នឹងយើងរាល់គ្នាវិញ ដោយមិនចង់ឲ្យអ្នកណាមួយវិនាសឡើយ គឺចង់ឲ្យមនុស្សទាំងអស់បានប្រែចិត្តវិញ ។ ពេត្រុសទី២ ៣:៩
អំណានប្រចាំថ្ងៃ៖ ហួសពេលហើយ! ហួសពេលហើយ!
នៅពេលនោះ ខ្ញុំបានឃើញព្រះយេស៊ូបានដោះសំលៀកបំពាក់របស់សម្តេចសង្ឃចេញ ហើយទ្រង់បានប្រដាប់អង្គទ្រង់ដោយអាវផាយដ៏ល្អបំផុត ហើយនៅលើព្រះសិររបស់ទ្រង់មានមកុដជាច្រើន មកុដមួយនៅក្នុងមកុដមួយទៀត។ ទ្រង់បានយាងចេញពីស្ថានសួគ៌ ដោយមានពពួកទេវតាជាច្រើនអង្គហែហមទ្រង់។ សេចក្តីវេទនាក៏បានធ្លាក់មកលើអ្នកដែលនៅលើផែនដី។ អ្នកខ្លះបានប្រកែកមិនទទួលស្គាល់ព្រះ ព្រមទាំងដាក់បណ្តាសាដល់ទ្រង់។ ហើយមានអ្នកខ្លះទៀតបានរត់ទៅរករាស្ត្ររបស់ព្រះ សូមឱ្យគេជួយប្រេង្រៀនពីរបៀបដែលធ្វើឱ្យគេអាចគេចផុតពីការជំនុំជម្ររះរបស់ព្រះ។ ។ ប៉ុន្តែ ពួកអ្នកបរិសុទ្ធមិនមានអ្វីសម្រាប់ពួកអ្នកទាំងនោះឡើយ។ ពួកអ្នកមានបាបបានសម្រក់ទឹកភ្នែកជាលើកចុងក្រោយ គេបានអធិស្ឋានដោយការឈឺចាប់ជាលើកចុងក្រោយ បន្ទុកចុងក្រោយដែលគេទទួលរងទ្រាំ ហើយការព្រមានចុងក្រោយក៏បានប្រទានដល់ពួកគេ។ ព្រះសូរសៀងនៃសេចក្តីមេត្តាករុណាដ៏ផ្អែមពីរោះ លែងពោលអញ្ជើញគេទៀតហើយ។ នៅពេលដែលអ្នកបរិសុទ្ធបានចាប់អារម្មណ៍អំពីសេចក្តីសង្គ្រោះរបស់ពួកគេពួកគេមិនបានចាប់អារម្មណ៍នឹងខ្លួនឯងឡើយ។ ជីវិតនិងសេចក្តីស្លាប់បានដាក់នៅពីមុខពួកគេ។ មានមនុស្សជាច្រើនចង់បានជីវិត ប៉ុន្តែ ពួកគេមិនបានប្រឹងប្រែងដើម្បីឱ្យបានជីវិតនោះទេ។ ពួកគេពុំបានជ្រើសរើសយកជីវិតទេ ហើយនៅពេលនេះក៏ពុំមានព្រះលោហិតលោះបាបនឹងសម្អាតទោសរបស់ពួកគេទៀតដែរ ក៏គ្មានព្រះអង្គសង្គ្រោះដែលមានការអាណិតអាសូរ ទូលអង្វរព្រះវរបិតាជំនួសគេទៀតថា «សូមទ្រង់មេត្តាទុកឱកាសឱ្យអ្នកមានបាបបន្តិចទៀតសិន! ទុកឱកាសឱ្យគេបន្តិចទៀតសិន!» នោះដែរ។ នោះទេវតា ទាំងអស់នៅស្ថានសួគ៌បានរួបរួមជាមួយនឹងព្រះយេស៊ូ នៅពេលដែលពួកលោកបានឮព្រះសូរសៀង ដ៏គួរឱ្យភ័យខ្លាចថា «ការស្រេចហើយ ការនោះត្រូវបានធ្វើចប់សព្វគ្រប់ហើយ»។ ផែនការនៃសេចក្តីសង្គ្រោះត្រូវបានបំពេញចប់សព្វគ្រប់ រួចរាល់ហើយ ប៉ុន្តែ មានមនុស្សតិចណាស់ ដែលបានសម្រេចចិត្តទទួលយកផែនការនេះ។ ហើយនៅពេលដែលព្រះសូរសៀងដ៏ស្រទន់បានរសាត់បាត់ទៅ ការភ័យខ្លាចនិងញ័ររន្ធត់បានមកចាប់យកមនុស្សអាក្រក់ជំនួសវិញ។ ពួកគេបានឮសំឡេងដ៏គួរឱ្យរន្ធត់បន្លឺឡើងថា «ហួសពេលហើយ! ហួសពេលហើយ!»។
អំណានព្រះគម្ពីរពេលល្ងាច៖ វិវរណៈ ជំពូក ៣ៈ៧-១៣
ខចងចាំ៖ ដូច្នេះ ចូរទៅបញ្ចុះបញ្ចូលឲ្យមានសិស្សនៅគ្រប់ទាំងសាសន៍ ព្រមទាំងធ្វើបុណ្យជ្រមុជទឹកឲ្យ ដោយនូវព្រះនាមព្រះវរបិតា ព្រះរាជបុត្រា និងព្រះវិញ្ញាណបរិសុទ្ធចុះ ហើយបង្រៀន ឲ្យគេកាន់តាមគ្រប់ទាំងសេចក្តី ដែលខ្ញុំបានបង្គាប់មកអ្នករាល់គ្នាផង ហើយមើល ខ្ញុំក៏នៅជាមួយនឹងអ្នករាល់គ្នាជារាល់ថ្ងៃដែរ ដរាបដល់បំផុតកល្ប។ អាម៉ែន។ ម៉ាថាយ ២៨:១៩-២០
