ថ្ងៃអាទិត្យ ទី០៩ ខែតុលា ឆ្នាំ២០២២
អំណានព្រះគម្ពីរពេលព្រឹក៖ ខ្ញុំបានសូមសេចក្តីតែ១ពីព្រះយេហូវ៉ាហើយនឹងស្វែងរកសេចក្តីនោះឯងគឺឲ្យខ្ញុំបាននៅក្នុងដំណាក់នៃព្រះយេហូវ៉ារាល់តែថ្ងៃអស់១ជីវិតខ្ញុំដើម្បីនឹងរំពឹងមើលសេចក្តីលំអនៃព្រះយេហូវ៉ាហើយនឹងពិនិត្យពិចារណានៅក្នុងព្រះវិហាររបស់ទ្រង់ ដ្បិតនៅថ្ងៃអាក្រក់ ទ្រង់នឹងថែរក្សាខ្ញុំដោយកំបាំងនៅក្នុងពន្លាទ្រង់ក៏នឹងបំពួនខ្ញុំនៅទីសំងាត់ក្នុងត្រសាលទ្រង់ហើយនឹងលើកខ្ញុំឡើងដាក់លើថ្មដា។ ទំនុកតម្កើង ២៧:៤-៥
អំណានប្រចាំថ្ងៃ៖
ខ្ញុំបានឃើញពួកបរិសុទ្ធចាកចេញពីទីក្រុងនិងពីភូមិរបស់ពួកគេ ហើយបានមករួមគ្នារស់នៅឯទីដាច់ស្រយាលមួយ។ ពួកទេវតាបានផ្តល់ម្ហូបអាហារនិងទឹកដល់ពួកគេ នៅពេលដែលអ្នកមានបាបកំពុងរងទុក្ខដោយការស្រេកឃ្លានវិញ។ នៅពេលនោះ ខ្ញុំបានមើលឃើញអ្នកដឹកនាំនៅផែនដីបានប្រជុំគ្នា ហើយសាតាំងនិងទេវតារបស់វាបានដើរក្រវែលជុំវិញពួកគេ។ ខ្ញុំក៏បានឃើញសេចក្តីប្រកាសនៅគ្រប់ទីកន្លែងថា «ប្រសិនបើពួកបរិសុទ្ធមិនព្រមលះបង់ចោលសេចក្តីជំនឿរបស់គេ និងបោះបង់ចោលថ្ងៃបរិសុទ្ធ ហើយបែរទៅគោរពថ្ងៃទីមួយនៃសប្តាហ៍វិញនោះទេ ពួកគេនឹងត្រូវស្លាប់»។ ប៉ុន្តែ នៅក្នុងពេលនៃ ការពិបាកនេះ ពួកអ្នកបរិសុទ្ធបាននាំគ្នានៅស្ងៀម ហើយទុកចិត្តទៅលើព្រះ និងបានពឹងផ្អែកទៅលើសេចក្តីសន្យារបស់ទ្រង់ ដែលថាទ្រង់នឹងនាំពួកគេឱ្យរួចផុតពីការបៀតបៀនទាំងនេះ។
នៅកន្លែងខ្លះ មុនពេលកាត់ទោសប្រហារជីវិត ពួកអ្នកមានបាបបានតាមរកអ្នកបរិសុទ្ធ ដើម្បីនឹងសម្លាប់ ប៉ុន្តែទេវតារបស់ព្រះនៅក្នុងសណ្ឋានជាមនុស្ស បានការពារពួកគេ។
សាតាំងមានបំណងចង់រកឱកាសបំផ្លាញរាស្ត្ររបស់ព្រះដ៏ខ្ពស់បំផុត ប៉ុន្តែ ព្រះយេស៊ូបានចាត់ទេវតារបស់ទ្រង់ឱ្យថែរក្សាពួកគេ។ ព្រះនឹងត្រូវបានសរសើរតម្កើង ដោយការតាំងសេចក្តីសញ្ញាជាមួយនឹងអស់អ្នកដែលគោរពច្បាប់របស់ទ្រង់ នៅក្នុងក្រសែភ្នែកនៃពួកអ្នកមិនជឿព្រះ នៅជុំវិញពួកគេ ហើយទ្រង់ក៏បានទទួលការសរសើរតម្កើងពីរាស្ត្ររបស់ទ្រង់ដែលទ្រង់បានលើកឡើងទាំងរស់ ជាអ្នកស្មោះត្រង់ដែលបានរង់ចាំទ្រង់ជាយូរមកហើយនោះដែរ។
អំណានព្រះគម្ពីរពេលល្ងាច៖ អេសេគាល ជំពូក ៣៤ៈ១១-២៥
ខចងចាំ៖ នៅគ្រានោះ គេនឹងពោលថា មើល នេះគឺជាព្រះនៃយើងរាល់គ្នា យើងបានរង់ចាំទ្រង់ ហើយទ្រង់នឹងជួយសង្គ្រោះយើង នេះគឺជាព្រះយេហូវ៉ាហើយ យើងបានរង់ចាំទ្រង់ យើងនឹងមានចិត្តរីករាយ ហើយត្រេកអរ ដោយសេចក្តីសង្គ្រោះរបស់ទ្រង់។ អេសាយ ២៥:៩
