ថ្ងៃអង្គារ ទី១ ខែវិច្ឆិកា ឆ្នាំ២០២២
អំណានព្រះគម្ពីរពេលព្រឹក៖ «ព្រះយេស៊ូវទ្រង់មានព្រះបន្ទូលសេចក្តីទាំងនេះ ដោយពាក្យប្រៀបធៀបដល់ហ្វូងមនុស្ស ទ្រង់មិនបានមានព្រះបន្ទូលនឹងគេ ឥតពាក្យប្រៀបធៀបទេ ដើម្បីឲ្យបានសំរេចតាមទំនាយដែលហោរាបានទាយទុកមកថា «អញនឹងបើកមាត់និយាយ ជាពាក្យប្រៀបប្រដូច អញនឹងសំដែងពីការដែលលាក់កំបាំង តាំងពីកំណើតលោកីយ៍មក»។ ម៉ាថាយ ១៣:៣៤-៣៥
អំណានប្រចាំថ្ងៃ៖ គោលការណ៍ដែលរឿងប្រៀបប្រដូចរបស់ព្រះគ្រីស្ទបានបង្កើតឡើង
គឺដូចគ្នាទៅនឹងគោលការណ៍ដែលបណ្តាលឲ្យមានបេសកកម្មរបស់ទ្រង់នៅលើលោកិយនេះដែរ។ ដើម្បីឲ្យយើងអាចដឹងអំពីអត្តចរិតនិងជីវិតបរិសុទ្ធរបស់ទ្រង់ ព្រះយេស៊ូវបានក្លាយមកជាមនុស្សដូចយើងរាល់គ្នា ហើយបានគង់នៅជាមួយពួកយើង។ អត្តចរិតបរិសុទ្ធរបស់ព្រះជាម្ចាស់គឺត្រូវបានបង្ហាញដល់មនុស្សតាមរយៈមនុស្សម្នាក់ សិរីល្អរបស់ព្រះដែលមិនអាចមើលឃើញបាន ត្រូវបានធ្វើឲ្យមើលឃើញនៅក្នុងសណ្ឋានជាមនុស្ស។ មនុស្សអាចរៀនចេះដឹងអំពីអ្វីដែលមិនដឹង/មិនចេះតាមរយៈអ្វីដែលបានដឹង/បានចេះអ្វីៗដែលជារបស់នគរឋានសួគ៌ត្រូវបានបង្ហាញតាមរយៈអ្វីៗដែលអាចមើលឃើញនៅលើផែនដីនេះយើងអាចមើលព្រះឃើញក្នុងសណ្ឋានជាមនុស្ស។ចំពោះការបង្រៀនរបស់ព្រះយេស៊ូវ គឺមានលក្ខណៈដូចគ្នាដែរ អ្វីៗដែលមិនដឹង/មិនចេះគឺត្រូវបានបង្ហាញដោយអ្វីដែលដឹង/ចេះសេចក្តីពិតខាងព្រលឹងវិញ្ញាណប្រែជាច្បាស់លាស់នៅពេលដែលប្រៀបធៀបជាមួយនិងរបស់អ្វីៗនៅលើផែនដីនេះដែលមនុស្សធ្លាប់បានស្គាល់។
ព្រះគម្ពីរចែងថា «ព្រះយេស៊ូវទ្រង់មានបន្ទូលសេចក្តីទាំងនេះដោយពាក្យប្រៀបធៀបដល់ហ្វូងមនុស្ស ទ្រង់មិនបានមានបន្ទូលនឹងគេ ឥតពាក្យប្រៀបធៀបទេ ដើម្បីឲ្យបានសម្រេចតាមទំនាយដែលហោរាបានទាយទុកមកថា «អញនឹងបើកមាត់និយាយជាពាក្យប្រៀបប្រដូចអញនឹងសម្តែងពីការដែលលាក់កម្បាំងតាំងពីកំណើតលោកិយមក» ម៉ាថាយ១៣ៈ៣៤,៣៥។ វត្ថុធម្មជាតិនានាត្រូវបានប្រើសម្រាប់បង្រៀនអំពីរឿងខាងព្រលឹងវិញ្ញាណរឿងធម្មជាតិ និងបទពិសោធន៍របស់មនុស្សដែលបានស្តាប់ព្រះយេស៊ូវគឺតភ្ជាប់ជាមួយនិងសេចក្តីពិតសរសេរនៅក្នុងព្រះបន្ទូលរបស់ព្រះជាម្ចាស់។ ការដឹកនាំពីធម្មជាតិឆ្ពោះទៅកាន់នគរខាងព្រលឹងវិញ្ញាណ ពាក្យប្រៀបប្រដូចរបស់ព្រះយេស៊ូវ គឺតភ្ជាប់នៅក្នុងជួរនៃសេចក្តីពិតដែលរួបរួមមនុស្សជាមួយព្រះជាម្ចាស់ហើយនិងផែនដីជាមួយនិងនគរឋានសួគ៌។
អំណានព្រះគម្ពីរពេលល្ងាច៖ ម៉ាថាយ ១៖១-១៧
ខចងចាំ៖ ដូចមានសេចក្តីចែងទុកមកថា«សេចក្តីដែលភ្នែកមិនដែលឃើញ ត្រចៀកមិនដែលឮ ហើយចិត្តនឹកមិនដែលដល់ គឺសេចក្តីនោះឯងដែលព្រះបានរៀបចំទុកសំរាប់ពួកអ្នកដែលស្រឡាញ់ទ្រង់»។ កូរិនថូសទី១ ២៖៩
