ថ្ងៃព្រហស្បតិ៍ ទី១៥ ខែធ្នូ ឆ្នាំ២០២២
អំណានព្រះគម្ពីរពេលព្រឹក៖ លុះព្រះយេស៊ូវបានឮ នោះទ្រង់មានព្រះបន្ទូលថា ពួកអ្នកដែលជាសុខសប្បាយ គេមិនត្រូវការនឹងគ្រូពេទ្យទេ គឺជាមនុស្សដែលមានជំងឺវិញទេតើ ខ្ញុំមិនបានមក ដើម្បីហៅមនុស្សសុចរិតទេ គឺមកហៅតែមនុស្សមានបាបប៉ុណ្ណោះ ដើម្បីឲ្យគេប្រែចិត្តឡើង។ ម៉ាកុស ២:១៧
អំណានប្រចាំថ្ងៃ៖ ព្រះបន្ទូលរបស់ព្រះជាម្ចាស់និយាយមកកាន់អ្នកដោយផ្ទាល់
អ្នកស្តាប់ដែលប្រៀបបានទៅនឹងដីល្អទទួលយកព្រះបន្ទូលរបស់ព្រះជាម្ចាស់«ជាដំណឹងពីព្រះនោះមិនបានទទួលទុកដូចជាពាក្យរបស់មនុស្សទេ»។ ថែស្សាឡូនីចទី១ ២ៈ១៣។ ដើម្បីធ្វើជាអ្នករៀនសូត្រពិតប្រាកដ អ្នកត្រូវទទួលយកព្រះបន្ទូលរបស់ព្រះជាម្ចាស់ទុកដូចជាទ្រង់មានបន្ទូលមកកាន់អ្នកផ្ទាល់។ អ្នកនោះគោរពកោតខ្លាចព្រះបន្ទូលរបស់ព្រះ ព្រោះថាចំពោះគាត់ព្រះបន្ទូលគឺជាសេចក្តីពិតដែលមានជីវិត។ គាត់បើកចិត្តគំនិតទទួលយកព្រះបន្ទូលរបស់ព្រះជាម្ចាស់។ មេបញ្ជាការវីរៈសេនាធំរ៉ូមុាំងហើយនិងមិត្តភក្តិរបស់គាត់គឺជាអ្នកស្តាប់ដែលប្រៀបបានទៅនឹងដីល្អនិយាយទៅកាន់លោកពេត្រុសថា«ឥឡូវនេះយើងទាំងអស់នៅចំពោះព្រះដើម្បីនឹងស្តាប់គ្រប់ទាំងសេចក្តីដែលព្រះបានបង្គាប់មកលោក»។ កិច្ចការ១០ៈ៣៣។ ចំណេះដឹងនៃសេចក្តីពិតមិនអាស្រ័យច្រើនទៅលើភាពឆ្លាតរបស់អ្នកនោះទេ ប៉ុន្តែអាស្រ័យទៅលើភាពស្មោះត្រង់និងសេចក្តីជំនឿរបស់អ្នកដែលពឹងទៅលើព្រះជាម្ចាស់ទៅវិញទេ។ ពួកទេវតានៃព្រះជាម្ចាស់យាងមកក្បែរអស់អ្នកដែលបន្ទាបខ្លួនស្វែងរកជំនួយពីព្រះជាម្ចាស់។ ព្រះវិញ្ញាណបរិសុទ្ធត្រូវបានប្រទានឲ្យដើម្បីបើកបង្ហាញដល់ពួកគេនូវទ្រព្យសម្បត្តិដ៏ស្តុកស្តម្ភនៃសេចក្តីពិតរបស់ព្រះជាម្ចាស់។ អ្នកស្តាប់ដែលប្រៀបបានទៅនឹងដីល្អបានឮព្រះបន្ទូលរបស់ព្រះជាម្ចាស់ហើយក៏រក្សាវាទុក។ សាតាំងរួមជាមួយនិងអំណាចនៃវិញ្ញាណអាក្រក់របស់ពួកវាមិនអាចលួចយកសេចក្តីពិតចេញពីពួកគេបានទេ។
ការគ្រាន់តែឮឬក៏អានព្រះបន្ទូលរបស់ព្រះជាម្ចាស់គឺមិនគ្រប់គ្រាន់ទេ។ អ្នកណាដែលចង់បានផលប្រយោជន៍ពីព្រះបន្ទូលរបស់ព្រះជាម្ចាស់ត្រូវផ្ចង់ទៅលើសេចក្តីពិតដែលខ្លួនបានឮ។ ដោយការរៀនសូត្រដោយយកចិត្តទុកដាក់និងគំនិតនៃសេចក្តីអធិស្ឋាន អ្នកនោះត្រូវតែរៀនពីអត្ថន័យនៃព្រះបន្ទូលនៃសេចក្តីពិតរបស់ព្រះជាម្ចាស់ហើយទទួលយកការកែប្រែដែលព្រះជាម្ចាស់ចង់ធ្វើការកែប្រែនៅក្នុងជីវិតរបស់ខ្លួន។
ព្រះជាម្ចាស់សូមឲ្យយើងបំពេញចិត្តរបស់យើងដោយគំនិតល្អៗគំនិតដែលបរិសុទ្ធ។ ទ្រង់ចង់ឲ្យយើងភាវនាឬផ្ចង់ទៅលើសេចក្តីស្រឡាញ់និងសេចក្តីមេត្តាករុណាឲ្យរៀនសូត្រពីការងារដ៏ល្អរបស់ទ្រង់នៅក្នុងគម្រោងការនៃការប្រោសលោះដ៏អស្ចារ្យ។ កាលណាយើងរៀនសូត្រកាន់តែច្រើនយើងកាន់តែយល់ច្បាស់ ហើយការប្រាថ្នាចង់បានបរិសុទ្ធនឹងរីកចម្រើនលូតលាស់។អ្នកដែលរៀនសូត្រព្រះបន្ទូលរបស់ព្រះជាម្ចាស់ចំណាយពេលស្តាប់និងនិយាយទៅកាន់ព្រះជាម្ចាស់អំពីអ្វីៗដែលបរិសុទ្ធនឹងត្រូវបានកែប្រែ «ហើយផ្តល់ផលផ្លែ»។
អំណានព្រះគម្ពីរពេលល្ងាច៖ ម៉ាថាយ ៩៖៣៥-៣៨
ខចងចាំ៖ «ខ្ញុំពុំអាចនឹងធ្វើការអ្វីដោយខ្លួនខ្ញុំបានទេ ខ្ញុំជំនុំជម្រះតាមដែលខ្ញុំឮ ហើយសេចក្តីជំនុំជម្រះរបស់ខ្ញុំក៏សុចរិត ពីព្រោះខ្ញុំមិនរកតាមតែចិត្តខ្ញុំទេ គឺតាមព្រះហឫទ័យនៃព្រះវិញ ដែលទ្រង់ចាត់ឲ្យខ្ញុំមក»។ យ៉ូហាន ៥:៣០
