ថ្ងៃពុធ ទី១៦ ខែកុម្ភៈ ឆ្នាំ២០២២
អំណានព្រះគម្ពីរពេលព្រឹក៖ តើអ្នកណានឹងឡើងទៅឯភ្នំនៃព្រះយេហូវ៉ាតើអ្នកណានឹងឈរនៅក្នុងទីបរិសុទ្ធរបស់ទ្រង់បានគឺជាអ្នកដែលមានដៃស្អាត និងចិត្តបរិសុទ្ធជាអ្នកដែលមិនបណ្តោយឲ្យព្រលឹងខ្លួនទៅតាមសេចក្តីភូតភរហើយមិនបានស្បថប្រវ័ញ្ចគេឡើយ។ ទំនុកតម្កើង ២៤:៣-៤
អំណានប្រចាំថ្ងៃ ការរៀបចំចូលទៅជិតព្រះ
បន្ទាប់មកព្រះយេហូវ៉ាទ្រង់បានណែនាំយ៉ាងជាក់លាក់ដល់លោកម៉ូសេ ទាក់ទងនឹងការរៀបចំមនុស្សថ្វាយទ្រង់ដើម្បីឱ្យទ្រង់ចូលទៅជិតពួកគេ ប្រយោជន៍ឱ្យពួកគេបានឮនូវបញ្ញត្តិច្បាប់ដែលទ្រង់មានបន្ទូល មិនមែនតាមរយៈទេវតាទេ ប៉ុន្តែ ដោយព្រះអង្គផ្ទាល់។ «ព្រះយេហូវ៉ាទ្រង់មានបន្ទូលនឹងម៉ូសេថា ចូរទៅឯពួកជន ដើម្បីនឹងញែកគេឱ្យបរិសុទ្ធនៅថ្ងៃនេះ ហើយថ្ងៃស្អែកផងត្រូវឱ្យគេបោកខោអាវដែរ ហើយរៀបខ្លួនជាស្រេច ឱ្យទាន់ថ្ងៃទី៣ ដ្បិតនៅថ្ងៃទី៣ នោះព្រះយេហូវ៉ា ទ្រង់នឹងយាងចុះមកលើភ្នំស៊ីណាយ ឱ្យគេឃើញ»។ ព្រះបានតម្រូវឱ្យមនុស្សគ្រប់រូបផ្អាកពីការងារនិងការខ្វល់ខ្វាយខាងលោកិយទាំងប៉ុន្មាន ហើយតាំងចិត្តឱ្យបានបរិសុទ្ធ។ ព្រះទ្រង់ក៏បានតម្រូវឱ្យ ពួកគេបោកសំអាតសំលៀកបំពាក់ផងដែរ។ ឥឡូវនេះ ព្រះទ្រង់នៅតែមុឺងម៉ាត់ដូចពីមុនដដែល។ ព្រះគឺជាព្រះនៃរបៀបរៀបរយហើយទ្រង់តម្រូវឱ្យរាស្ត្ររបស់ទ្រង់ដែលរស់នៅលើផែនដី នៅពេលសព្វថ្ងៃនេះប្រកាន់ទម្លាប់នៃភាពបរិសុទ្ធយ៉ាងតឹងរ៉ឹង។ ហើយអ្នកណាដែលថ្វាយបង្គំព្រះ ដោយ សំលៀកបំពាក់មិនស្អាតនិងមនុស្សដែលមកឯទ្រង់ដោយអាកប្បកិរិយាមិនគួរគប្បី នោះព្រះអង្គមិនសព្វព្រះហឫទ័យនឹងការខ្វះសេចក្តីគោរពដល់ទ្រង់នោះទ្បើយ ហើយព្រះទ្រង់នឹងមិនទទូលយកនូវការបំរើរបស់អ្នកដែលថ្វាយបង្គំដោយស្មោកគ្រោកឡើយ ដ្បិតពួកគេបន្តុះបង្អាប់ដល់ព្រះ ដែលបានបង្កើតពួកគេ។ ព្រះដែលបានបង្កើតផ្ទៃមេឃនិងផែនដីចាត់ទុកភាពស្អាតជាការសំខាន់ដ៏លើសលុប បានជាទ្រង់មានបន្ទូលថា «ចូរអនុញ្ញាតឱ្យពួកគេបោកសំលៀកបំពាក់របស់ពួកគេ»។
«ត្រូវឱ្យឯងដាក់កំណត់គោលចារិកនៅជុំវិញ ឱ្យបណ្តាជនគ្រប់គ្នាដោយប្រាប់ថា ចូរប្រយ័ត្ន កុំឱ្យទ្បើងទៅលើភ្នំទ្បើយ កុំឱ្យទាំងជាន់ដល់ជើងភ្នំផង ដ្បិតអ្នកណាដែលជាន់ដល់ភ្នំ នោះនឹងត្រូវស្លាប់ជាមិនខាន នឹងគ្មានដៃអ្នកណាពាល់ដល់អ្នកនោះទេ គឺអ្នកនោះនឹងត្រូវចោលនឹងថ្ម ឬបាញ់នឹងព្រួញវិញ ទោះសត្វឬមនុស្សក្តីក៏មិនរស់ដែរ កាលណាផ្លុំស្នែងឮសូរវែងនោះត្រូវឱ្យគេចូលមកជិតភ្នំ»។ ការត្រាស់បង្គាប់នេះត្រូវបានរៀបចំឡើងដើម្បីដាស់សតិដល់មនុស្ស ដែលបះបោរទាំងនេះ ឱ្យយកចិត្តទុកដាក់គោរពដល់ព្រះ ដែលជាអ្នកនិពន្ធនឹងជាព្រះដែលមានអំណាចលើច្បាប់របស់ពួកគេ។
អំណានព្រះគម្ពីរពេលល្ងាច៖ និក្ខមនំ ៧:១៩
ខចងចាំ៖ ព្រះនៃខ្ញុំ ទ្រង់នឹងបំពេញគ្រប់ទាំងអស់ ដែលអ្នករាល់គ្នាត្រូវការ តាមភោគសម្បត្តិនៃទ្រង់ដ៏ឧត្តម ក្នុងព្រះគ្រីស្ទយេស៊ូវ។ ភីលីព ៤:១៩
