​អំណានព្រះគម្ពីរពេលព្រឹក៖ ឱ​ព្រះយេហូវ៉ា​អើយ សូម​បង្រៀន​ផ្លូវនៃ​អស់​ទាំង​បញ្ញត្ត​ទ្រង់​មក​ទូលបង្គំនោះ​ទូលបង្គំ​នឹង​កាន់​តាម​ដរាប​ដល់​ចុង​បំផុត សូម​ប្រទាន​ឲ្យ​ទូលបង្គំ​មាន​យោបល់ នោះ​ទូលបង្គំនឹង​កាន់​តាម​ក្រឹត្យវិន័យ​ទ្រង់ អើ ទូលបង្គំ​នឹង​រក្សា​ទុក​ឲ្យ​អស់​ពី​ចិត្ត​ផង។ ទំនុកតម្កើង ១១៩:៣៣-៣៤

អំណានប្រចាំថ្ងៃ សេចក្តីសន្យាថានឹងដើរតាមព្រះ

បន្ទាប់ពីលោកម៉ូសេបានទទួលការជំនុំជម្រះ ព្រមទាំងសេចក្តីសន្យាដែលមានលក្ខខណ្ឌនៅលើការស្តាប់បង្គាប់របស់ពួកគេ ពីព្រះយេហូវ៉ា ហើយបានកត់ត្រាទុកសម្រាប់ពួកបណ្តាជនមកទ្រង់បានមានបន្ទូលទៅកាន់គាត់ថា «ម៉ូសេ ចូរឯងនិងអើរ៉ុនព្រមទាំងណាដាប អ័រប៊ីហ៊ូវ ហើយនិងពួកចាស់​ទុំសាសន៍អ៊ីស្រាអែលទាំង ៧០នាក់ ទ្បើងមកឯព្រះយេហូវ៉ា ហើយឱ្យថ្វាយ​បង្គំពីចម្ងាយ ត្រូវឱ្យម៉ូសេតែម្នាក់ឯង ចូលមកជិតព្រះយេហូវ៉ា ចំណែកឯអ្នក​ឯទៀត មិនត្រូវឱ្យចូលមកជិតទេ ហើយពួកបណ្តាជនក៏មិនត្រូវទាំងទ្បើងមកជាមួយផង។ នោះម៉ូសេក៏ទៅប្រាប់ដល់បណ្តាជន តាមគ្រប់ទាំងព្រះ​បន្ទូល​នៃព្រះយេហូវ៉ា ហើយនិងបញ្ញត្តិទាំងនោះ រួចពួកជនទាំងអស់​គ្នាក៏ទទួលព្រមថា យើងខ្ញុំរាល់គ្នានឹងធ្វើតាមអស់ទាំងសេចក្តីដែលព្រះយេហូវ៉ាមានបន្ទូលមក» និក្ខមនំ ២៤:១-៣។

លោកម៉ូសេមិនបានកត់ត្រាត្រឹមតែក្រឹត្យវិន័យ ១០ប្រការប៉ុណ្ណោះទេ ប៉ុន្តែ គាត់បានកត់ត្រានូវគ្រប់ទាំងសេចក្តីជំនុំជម្រះដែលព្រះតម្រូវឱ្យពួកគេ​គោរពតាម ព្រមទាំងសេចក្តីសន្យាដែលមានលក្ខខណ្ឌលើការស្តាប់បង្គាប់ដល់ទ្រង់របស់គេនោះថែមទៀតផង។ គាត់បានអានសេចក្តីទាំងនោះ​ឱ្យ​ពួកបណ្តាជនស្តាប់ ហើយពួកគេបានស្បថសច្ចាថា គេនឹងគោរពតាមនូវគ្រប់ទាំងព្រះបន្ទូលដែលព្រះយេហូវ៉ាបានមានបន្ទូល។ បន្ទាប់មកលោកម៉ូសេបានសរសេរពាក្យសន្យាដ៏ម៉ឺងម៉ាត់របស់ពួកបណ្តាជននៅក្នុងសៀវភៅ ហើយបានថ្វាយយញ្ញបូជាដល់ព្រះ សម្រាប់ពួកគេ។ «រួចយក សៀវភៅមក​អានមើល​ឱ្យបណ្តាជនស្តាប់ ហើយគេឆ្លើយទ្បើងថា យើងខ្ញុំរាល់គ្នានឹងធ្វើតាមគ្រប់ទាំងសេចក្តីដែលព្រះយេហូវ៉ាបានមានបន្ទូលមក ហើយនិងស្តាប់​បង្គាប់គ្រប់ជំពូកផង ដូច្នេះម៉ូសេលោកយកឈាមទៅប្រោះលើជនទាំងឡាយ ដោយពាក្យថា នេះជាឈាមនៃសេចក្តីសញ្ញា ដែលព្រះយេហូវ៉ាបានតាំងនឹងអ្នករាល់គ្នា តាមព្រះបន្ទូលទ្រង់ទាំងនេះ» និក្ខមនំ ២៤:៧-៨ )។

​អំណានព្រះគម្ពីរពេលល្ងាច៖ និក្ខមនំ ជំពូក​២៤