​អំណានព្រះគម្ពីរពេលព្រឹក៖ ចូរ​សរសើរ​ដល់​ព្រះយេហូវ៉ា មាន​ពរ​ហើយ អ្នក​ណា​ដែល​កោតខ្លាចដល់​ព្រះយេហូវ៉ា ហើយ​មាន​សេចក្តី​អំណរ​ជា​ខ្លាំងចំពោះ​សេចក្តី​បង្គាប់​របស់​ទ្រង់។ ទំនុកតម្កើង ១១២:១

អំណានប្រចាំថ្ងៃ ទីបន្ទាល់ដ៏មានអំណាច

ព្រះទ្រង់បានបង្រៀនដល់លោកម៉ូសេយ៉ាងជាក់ច្បាស់អំពីពិធីថ្វាយយញ្ញបូជា ដែលបានបញ្ឈប់នៅឯការសុគតរបស់ព្រះគ្រីស្ទ។ ប្រព័ន្ធនៃការថ្វាយតង្វាយយញ្ញបូជាគឺជាស្រមោលនៃតង្វាយ របស់ព្រះគ្រីស្ទជាកូនចៀមដែលគ្មានបាប។

ដំបូងបង្អស់ ព្រះអម្ចាស់បានបង្កើតប្រព័ន្ធតង្វាយដុតជាមួយនឹងលោក​អ័ដាម បន្ទាប់ពីការធ្លាក់ចុះរបស់គាត់ ដែលគាត់បានបង្រៀនដល់កូនចៅជំនាន់ក្រោយរបស់គាត់។ ប្រព័ន្ធតង្វាយនេះត្រូវបានគេបង្ខូច (ធ្វើឱ្យលែង​បរិសុទ្ធ) នៅមុនគ្រាទឹកជំនន់ និងដោយអ្នកដែលបំបែកខ្លួនគេចេញពីពួកអ្នកដើរតាមព្រះ ដោយស្មោះត្រង់ ហើយបានចូលរួមនៅក្នុងការសង់ប៉មបាបិល។ ពួកគេបានថ្វាយតង្វាយដុតទៅព្រះផ្សេងៗដែលគេបានធ្វើជំនួស​ឱ្យព្រះនៃស្ថានសួគ៌វិញ។ ពួកគេបានថ្វាយ តង្វាយយញ្ញបូជាមិនមែនដោយសារតែគេមានជំនឿទៅលើព្រះដ៏ប្រោសលោះ ដែលនឹងត្រូវយាង​មកនោះ​ទេ ប៉ុន្តែ ដោយគេគិតថា ពួកគេអាចនឹងធ្វើឱ្យព្រះរបស់ពួកគេពេញចិត្តដោយថ្វាយយញ្ញបូជា ជាសត្វធំៗ ជាច្រើន នៅលើសាសនារបស់​ព្រះ​ក្លែង​ក្លាយ។ គេបានបង្រៀនដល់មនុស្សថា កាលណាគេថ្វាយតង្វាយកាន់តែថ្លៃ នោះព្រះរបស់គេក៏កាន់តែពេញចិត្តដែរ ហើយការថ្វាយ​តង្វាយ ជាច្រើននោះនឹងធ្វើឱ្យគេមានការរីកចម្រើន និងធ្វើឱ្យជាតិសាសន៍របស់ពួកគេមានទ្រព្យសម្បត្តិស្តុកស្ភម្ភឡើង។ ដូច្នេះ មនុស្សតែងតែថ្វាយតង្វាយយញ្ញបូជាទៅរូបព្រះដែលគ្មានវិញ្ញាណទាំងនោះ។ ជាតិសាសន៍ទាំងនោះមាន​ច្បាប់និងបទបញ្ជាដើម្បីគ្រប់គ្រងសកម្មភាពរបស់បណ្តាជនរបស់គេ ដែលច្បាប់​នោះសាហាវឃោរឃៅហួសហេតុ។ ច្បាប់ទាំងឡាយ​របស់ពួកគេត្រូវ​បាន​ធ្វើទ្បើង ដោយអ្នកមានចិត្តរឹងមិនបានបន្ទន់ដោយព្រះគុណរបស់ព្រះឡើយ ហើយច្បាប់ទាំងនោះភាគច្រើនតឹងរ៉ឹងនិងឃោរឃៅបំផុត។

លោកម៉ូសេ​មានទស្សនៈនេះនៅក្នុងគំនិត នៅពេលដែលគាត់មានប្រសាសន៍ទៅកាន់រាស្ត្រអ៊ីស្រាអែលថា «មើលអញបានបង្រៀនច្បាប់ ហើយ​និងបញ្ញត្តិដល់ឯងរាល់គ្នា តាមដែលព្រះ​យេហូវ៉ាជាព្រះនៃអញ​បាន​បង្គាប់មក ដើម្បីឱ្យឯងបានប្រព្រឹត្តតាមនៅក្នុងស្រុកដែលឯងត្រូវចូលទៅទទួលយក ដូច្នេះចូរឱ្យឯងរាល់គ្នាកាន់ ហើយប្រព្រឹត្តតាមចុះ ដ្បិតនេះ​នឹងបានជាប្រាជ្ញា ហើយជាយោបល់ដល់ឯងរាល់គ្នា នៅភ្នែកនៃ​អស់ទាំង​សាសន៍ ដែលនឹងឮថ្លែងពីបញ្ញត្តិច្បាប់ទាំងប៉ុន្មាននេះ ហើយគេនឹង​និយាយ​ថា ប្រាកដជាសាសន៍នេះមានប្រាជ្ញា និងយោបល់ពិត ដ្បិតតើមានសាសន៍​ដ៏ធំណាមួយ ដែលមានព្រះគង់នៅជិតគេ ដូចជាព្រះយេហូវ៉ា ជាព្រះនៃ​យើងទ្រង់គង់នៅជិត ក្នុងកាលដែលយើងអំពាវនាវរកទ្រង់នោះ ហើយ​តើ​មាន​សាសន៍ដ៏ធំណាមួយ ដែលមានច្បាប់និងបញ្ញត្តិដ៏ត្រឹមត្រូវ ឱ្យដូច​ជា​ក្រឹត្យវិន័យនេះ ដែលអញដាក់នៅមុខឯងរាល់គ្នា នៅថ្ងៃនេះដូច្នេះ»​ចោទិយកថា ៤:៥-៨។

​អំណានព្រះគម្ពីរពេលល្ងាច៖ ទំនុកតម្កើង ជំពូក​១១១