​អំណានព្រះគម្ពីរពេលព្រឹក៖ ចូរ​ឲ្យ​គ្រប់​គ្នា​ធ្វើ​តាម​ដែល​សំរេច​ក្នុង​ចិត្ត​ចុះ មិន​មែន​ដោយ​ស្តាយ ឬ​ដោយ​បង្ខំ​ឡើយ ដ្បិត​ព្រះ​ទ្រង់​ស្រឡាញ់​ដល់​អ្នក​ណា​ដែល​ថ្វាយ​ដោយ​អំណរ។ កូរិថូសទី២ ៩:៧

អំណានប្រចាំថ្ងៃ

រោងឧបោសថត្រូវបានធ្វើទ្បើងតាមការត្រាស់បង្គាប់របស់ព្រះ។ ព្រះយេហូវ៉ាបានលើកតាំងមនុស្សទ្បើងហើយបានធ្វើឱ្យគេមានសមត្ថភាពលើសពីនិស្ស័យពីកំណើតរបស់មនុស្ស ដើម្បីបំពេញការងារដ៏ប៉ិនប្រសប់។ ព្រះយេហូវ៉ាបានធ្វើគម្រោងដោយផ្ទាល់ព្រះអង្គ ហើយបានប្រទាន​ឱ្យដល់​លោក​ម៉ូសេ ជាមួយនឹងការណែនាំយ៉ាងច្បាស់លាស់នូវទំហំទ្រង់ទ្រាយនិង​សម្ភារៈ​ដែលនឹងត្រូវធ្វើ ហើយទ្រង់បានបញ្ជាក់ពីគ្រប់ទាំងគ្រឿងសង្ហារឹមទាំងឡាយដែលត្រូវប្រើទៀតផង។ ព្រះអង្គ​ទ្រង់បានបង្ហាញដល់លោកម៉ូសេនូវគំរូយ៉ាងលំអិតនៃទីបរិសុទ្ធនៅស្ថានសួគ៌ ហើយទ្រង់បានបង្គាប់ឱ្យលោកម៉ូសេធ្វើតាម​គំរូដែលទ្រង់បានបង្ហាញនៅលើភ្នំ។ លោកម៉ូសេបានកត់ត្រានូវការណែនាំទាំងនោះនៅក្នុងសៀវភៅហើយបានអានឱ្យមនុស្សដែលមានឥទ្ធិពលជាងគេស្តាប់។ បន្ទាប់មក ព្រះយេហូវ៉ាទ្រង់បានតម្រូវឱ្យពួកបណ្តាជនយកតង្វាយដោយស្មគ្រ័ពីចិត្ត មកសង់ទីបរិសុទ្ធថ្វាយទ្រង់ ដើម្បីឱ្យទ្រង់អាចគង់នៅជាមួយពួកគេ។ «នោះពួកជំនុំនៃកូនចៅអ៊ីស្រាអែល គេក៏ចេញពីមុខម៉ូសេ ទាំង​អស់គ្នាទៅ។ ដូច្នេះអស់អ្នកណាដែលមានសេចក្តីរំជួលក្នុងចិត្ត ជាអ្នកដែល​មានវិញ្ញាណបណ្តាលឱ្យថ្វាយស្ម័គ្រពីចិត្តនោះក៏យកតង្វាយមក​ថ្វាយ​ដល់​ព្រះយេហូវ៉ា សម្រាប់ការធ្វើត្រសាលជំនុំ សម្រាប់ការងារក្នុងត្រសាលជំនុំនោះ ហើយសម្រាប់សំលៀកបំពាក់បរិសុទ្ធទាំងប៉ុន្មាន ឯអស់អ្នកណាដែលថ្វាយដោយស្ម័គ្រពីចិត្តនោះ ក៏ចូលមកទាំងប្រុសទាំងស្រី ព្រមទាំងយកកង​ជើងកងដៃ កន្លះក (ខ្សែក) ក្រវិល ចិញ្ចៀន ជាប្រដាប់សមរម្យគ្រប់មុខមក​ថ្វាយ​ជាតង្វាយមាសដល់ព្រះយេហូវ៉ា»។

ការរៀបចំដ៏អស្ចារ្យនិងមានតម្លៃថ្លៃទាំងអស់នោះ គឺជាការចាំបាច់។ ពួកគេ​ត្រូវតែជ្រើសរើសសម្ភារៈ​ដែលល្អៗនិងមានតម្លៃ។ ប៉ុន្តែ ព្រះយេហូវ៉ាទ្រង់សព្វព្រះហឫទ័យតែតង្វាយដែលថ្វាយដោយស្ម័គ្រពីចិត្តប៉ុណ្ណោះ។ ការតាំងចិត្តប្តេជ្ញាជាមួយនឹងការងាររបស់ព្រះ ហើយនិងការ​ថ្វាយស្ម័គ្រពីចិត្ត​គឺ​ជា​តម្រូវការដំបូង ក្នុងការរៀបចំទីកន្លែងថ្វាយព្រះ។ នៅពេលដែលការសាងសង់រោងឧបោសថកំពុងតែដំណើរការ ពួកបណ្តាជនកំពុងតែនាំយកតង្វាយរបស់ពួកគេទៅជូនលោកម៉ូសេ ហើយគាត់ក៏បានប្រគល់វាឱ្យទៅអ្នកសាងសង់ ពួកមនុស្សឆ្លាតវៃទាំងឡាយដែលលោកម៉ូសេបានដាក់ឱ្យត្រួតពិនិត្យអំណោយជាតង្វាយដែលបណ្តាជនបាននាំយកមកបានឃើញថា​ពួកបណ្តា​ជន​បាននាំយកតង្វាយមកនោះ គ្រប់គ្រាន់ហើយ ថែមទាំងលើសពីសេចក្តីត្រូវការទៀតផង។ ហើយលោកម៉ូសេបានប្រកាសពេញទាំងជំរំ ដោយមាន​ប្រសាសន៍ថា «កុំឱ្យអ្នកណាទោះប្រុសឬស្រីធ្វើការអ្វីទៀត សម្រាប់ជា​តង្វាយ​ដល់រោងឧបោសថទ្បើយ ដូចេ្នះ គេក៏បញ្ឈប់ពួកជនមិនឱ្យយកមកទៀត»។

​អំណានព្រះគម្ពីរពេលល្ងាច៖ និក្ខមនំ ជំពូក៣៥