ថ្ងៃសុក្រ ទី០៤ ខែកុម្ភៈ ឆ្នាំ២០២២
អំណានព្រះគម្ពីរពេលព្រឹក៖ ព្រោះចិត្តរបស់ជនជាតិនេះបានត្រឡប់ជាស្ពឹកវិញ គេឮដោយត្រចៀកធ្ងន់ ហើយធ្មេចភ្នែក ក្រែងមើលឃើញនឹងភ្នែក ស្តាប់ឮនឹងត្រចៀក ហើយយល់ក្នុងចិត្ត រួចគេប្រែចិត្ត ហើយអញប្រោសឲ្យគេបានជា។ ម៉ាថាយ ១៣:១៥
អំណានប្រចាំថ្ងៃ ផ្លូវនៃការរត់គេចខ្លួនដ៏អស្ចារ្យរបស់ព្រះ
សាសន៍អេស៊ីព្ទមិនអាចមើលឃើញកូនចៅអ៊ីស្រាអែលទេ ដ្បិតពពកនៃភាពងងឹតដ៏ក្រាស់នៅពីមុខពួកគេ ប៉ុន្តែ មានពពកភ្លឺនៅខាងកូនចៅអ៊ីស្រាអែលវិញ។ ព្រះអម្ចាស់ទ្រង់បានបង្ហាញនូវអំណាចរបស់ទ្រង់ដូច្នេះ ដើម្បីសាកល្បងដល់រាស្ត្ររបស់ទ្រង់ថាតើពួកគេនឹងទុកចិត្តចំពោះទ្រង់ បន្ទាប់ពីការប្រទាននូវទីសំគាល់នៃការយកព្រះទ័យទុកដាក់និងសេចក្តីស្រឡាញ់របស់ទ្រង់ដល់ពួកគេនិងដើម្បីស្តីបន្ទោសដល់ការគ្មានជំនឿ និងការត្អូញត្អែររបស់ពួកគេ។ «នោះម៉ូសេក៏លើកដៃទៅលើសមុទ្រ ហើយព្រះយេហូវ៉ាទ្រង់ច្រាន ផាត់សមុទ្រចេញដោយកម្លាំងខ្យល់ពីខាងកើតដែលបក់ជាយ៉ាងខ្លាំងពេញមួយយប់នោះ ទ្រង់ធ្វើឱ្យទឹកបានញែកចេញពីគ្នា ឱ្យសមុទ្រនៅជាគោកវិញ រួចពួកកូនចៅអ៊ីស្រាអែល គេក៏ចូលទៅនាកណ្តាលសមុទ្រតាមដីគោក ហើយមានទឹកជាកំផែងនៅខាងស្តាំ និងខាងឆ្វេងគេ»។ ទឹកបានងើបទ្បើងហើយបានឈរដូចជាជញ្ជាំងទឹកកកទាំងសងខាង ខណៈដែលកូនចៅអ៊ីស្រាអែលបានដើរនៅកណ្តាលសមុទ្រលើដីគោក។
កងទ័ពអេស៊ីព្ទកំពុងមានជ័យជំនះនៅយប់នោះ ដោយសង្ឃឹមថាកូនចៅអ៊ីស្រាអែលនឹងត្រូវត្រឡប់ទៅនៅ ក្រោមអំណាចរបស់គេសារជាថ្មីវិញ។ ពួកគេបានគិតថា ពួកអ៊ីស្រាអែលមិនអាចរត់គេចខ្លួនបានទ្បើយ ព្រោះនៅពីមុខពួកគេមានសមុទ្រក្រហមលាតសន្ធឹងល្វឹងល្វើយ ហើយពលទ័ពដ៏ច្រើនសន្ធឹកសន្ធាប់តាមប្រកិតពីក្រោយ។ នៅពេលព្រឹកឡើង ខណៈដែលពួកគេបានដល់មាត់សមុទ្រ អូ! មានផ្លូវគោក ទឹកត្រូវបានញែកចេញពីគ្នា ហើយបានឈរដូចជាជញ្ជាំងនៅទាំងសងខាងផ្លូវ ហើយកូនចៅអ៊ីស្រាអែលបានឆ្លងសមុទ្របានពាក់កណ្តាលទៅហើយ ដោយកំពុងតែដើរនៅលើដីគោក។ ពួកគេបានរង់ចាំមួយស្របក់ ដើម្បីសម្រេចចិត្តថាតេីត្រូវដេញតាមដោយវិធីណា។ ពួកគេបានខកចិត្តជាខ្លាំង នៅពេលដែលសាសន៍ហេព្រើរទាំងនោះជិតធ្លាក់ក្នុងអំណាចរបស់គេទៅហើយ ដោយគេដឹងយ៉ាងច្បាស់ថា គ្មានផ្លូវណាបើកឱ្យពួកគេនៅក្នុងសមុទ្រនេះទ្បើយ។ ពួកគេក៏បានសម្រេចចិត្តដេញតាមពួកអ៊ីស្រាអែល។
«ពួកសាសន៍អេស៊ីព្ទក៏ប្រឹងដេញចូលទៅត្រង់កណ្តាលសមុទ្រតាមគេ ព្រមទាំងសេះផារ៉ោន និងរទេះចម្បាំង ហើយទាំងពលសេះទ្រង់ផង នៅវេលាយាមព្រឹកនោះ ព្រះយេហូវ៉ាទ្រង់ក៏ទតពីបង្គោលភ្លើង ហើយនិងពពកទៅឃើញពលទ័ពសាសន៍អេស៊ីព្ទ រួចទ្រង់បណ្តាលឱ្យគេជាពួកពលទ័ពសាសន៍អេស៊ីព្ទកោលាហលទ្បើង ក៏ធ្វើឱ្យរបូតកង់ពីរទេះគេចេញឱ្យគេបរដោយពិបាក បានជាពួកសាសន៍អេស៊ីព្ទនិយាយថា ចូរយើងរាល់គ្នារត់ពីសាសន៍អ៊ីស្រាអែលនេះចេញទៅ ដ្បិតព្រះយេហូវ៉ាទ្រង់ច្បាំងនឹងយើងជំនួសគេហើយ»។
អំណានព្រះគម្ពីរពេលល្ងាច៖ ទំនុកតម្កើង ជំពូក១៣៦
ខចងចាំ៖ ព្រះយេហូវ៉ាទ្រង់មានព្រះបន្ទូលដូច្នេះថា កុំបីឲ្យអ្នកប្រាជ្ញអួតពីប្រាជ្ញារបស់ខ្លួនឡើយ ក៏កុំឲ្យមនុស្សខ្លាំងពូកែអួតពីកំឡាំងខ្លួន ឬអ្នកមាន អួតពីទ្រព្យសម្បត្តិរបស់ខ្លួនដែរ ឯអ្នកដែលអួត នោះត្រូវឲ្យអួតតែពីសេចក្តីនេះវិញ គឺថាខ្លួនមានយោបល់ ហើយក៏ស្គាល់ដល់អញថា អញជាព្រះយេហូវ៉ាដែលប្រោសផ្សាយសេចក្តីសប្បុរស សេចក្តីយុត្តិធម៌ និងសេចក្តីសុចរិតនៅផែនដី ដ្បិតអញរីករាយចិត្តចំពោះសេចក្តីទាំងនោះហើយ នេះជាព្រះបន្ទូលនៃព្រះយេហូវ៉ា។ យេរេមា ៩:២៣-២៤
