​អំណានព្រះគម្ពីរពេលព្រឹក៖ ចូរ​អរ​សប្បាយ​ជានិច្ច ចូរ​អធិស្ឋាន​ឥត​ឈប់​ឈរ ចូរ​អរ​ព្រះគុណ​ក្នុង​គ្រប់​ការ​ទាំង​អស់ ពី​ព្រោះ​ព្រះ​ទ្រង់​សព្វ​ព្រះហឫទ័យ​ឲ្យ​អ្នក​រាល់​គ្នា​ធ្វើ​យ៉ាង​ដូច្នោះ ដោយ​នូវ​ព្រះគ្រីស្ទយេស៊ូវ។ ថែស្សាឡូនីចទី១ ៥:១៦-១៨

អំណានប្រចាំថ្ងៃ ឆាប់ភ្លេច

ប៉ុន្តែ ពួកគេហាក់ដូចជាលែងមានជំនឿទុកចិត្តលើព្រះ ខ្លាំងដូចកាលដែលពួកគេបានឃើញ អំណាចរបស់ទ្រង់ គង់នៅជាមួយនឹងគេផ្ទាល់នឹងភ្នែករៀងរាល់ថ្ងៃនោះទៀតហើយ។ ប្រសិន​បើពួកគេមានសេចក្តីជំនឿនិងការទុកចិត្តលើព្រះពិតប្រាកដ នោះការពិបាកនិងឧបសគ្គទាំងឡាយ ឬសូម្បីតែការឈឺចាប់ដ៏ពិតប្រាកដ ក៏បានក្លាយជាភាពរីករាយវិញដែរ បន្ទាប់ពីព្រះយេហូវ៉ាទ្រង់បានយកព្រះទ័យទុកដាក់រំដោះពួកគេចេញពីភាពជាទាសករមក។ ម៉្យាងវិញទៀត ព្រះយេហូវ៉ាទ្រង់បានសន្យាជាមួយនឹងពួកគេថា ប្រសិនបើពួកគេគោរពតាមបញ្ញត្តិរបស់ទ្រង់ នោះទ្រង់នឹងមិនធ្វើឱ្យមានជំងឺរោគាណាមួយ កើតឡើងដល់ពួកគេទ្បើយ ដ្បិតទ្រង់មានបន្ទូលថា «អញជាព្រះយេហូវ៉ា ជាព្រះដែលបានប្រោសឯងរាល់គ្នាឱ្យបានជា»។

បន្ទាប់ពីសេចក្តីសន្យាពីព្រះដ៏ជាក់ច្បាស់នេះមក សេចក្តីជំនឿរបស់គេបានធ្លាក់ចុះយ៉ាងគំហុក ដោយគេប្រមើល មើលឃើញថាពួកគេនិងកូនចៅរបស់គេនឹងត្រូវស្លាប់ដោយការអត់ឃ្លាន។ ពួកគេបានរងទុក្ខជាទម្ងន់នៅប្រទេសអេស៊ីព្ទ ដោយត្រូវគេបង្ខំឱ្យធ្វើការហួសកម្លាំង។ កូនចៅរបស់ពួក​គេត្រូវបានគេសម្លាប់ ហើយក្នុងការឆ្លើយតបទៅនឹងការអធិស្ឋានដោយចិត្តអួលណែនរបស់ពួកគេ ព្រះយេហូវ៉ាទ្រង់បានរំដោះពួកគេដោយក្តីមេត្តាករុណា។ ព្រះអង្គបានសន្យាថានឹងធ្វើជាព្រះដល់គេ ដោយទទួលយកពួកគេធ្វើជារាស្ត្ររបស់ទ្រង់ ហើយដឹកនាំពួកគេទៅកាន់ទឹកដីដែលមានជីរជាតិល្អដ៏ធំល្វឹងល្វើយ។

ប៉ុន្តែ ពួកគេបានត្រៀមខ្លួនរួចជាស្រេចនឹងចុះចាញ់ការឈឺចាប់ទាំងឡាយដែលពួកគេនឹងត្រូវជួបប្រទះ នៅតាមផ្លូវទៅកាន់ទឹកដីនោះ។ ពួកគេធ្លាប់បានទ្រាំទ្រយ៉ាងអត់ធ្មត់ជាមួយនឹងការងារជាទម្ងន់របស់ជនជាតិអេស៊ីព្ទ ប៉ុន្តែ ឥឡូវនេះគេមិនអាចទ្រាំទ្រនឹងការងាររបស់ព្រះបានឡើយ។ ពួកគេទាំងអស់បានរៀបចំខ្លួនដើម្បីបោះបង់ចោលនូវសេចក្តីជំនឿរបស់គេ ដោយ​ការសង្ស័យ ហើយ​ធ្លាក់ចូលទៅក្នុងការបាក់ទឹកចិត្ត នៅពេលដែលពួកគេបានទទួលការសាកល្បងពីព្រះ។ ពួកគេបានរអ៊ូរទាំទាស់នឹងម៉ូសេ ជាអ្នក​បំរើដ៏ស្មោះត្រង់របស់ទ្រង់ ហើយបានចោទប្រកាន់គាត់ពីការពិបាកទាំងឡាយរបស់ពួកគេ និងបានបញ្ចេញបំណងប្រាថ្នាដ៏អាក្រក់ ថាបើពួកគេ​នៅក្នុងប្រទេសអេស៊ីព្ទ ពួកគេអាចអង្គុយនៅជិតឆ្នាំងសម្ល ហើយបរិភោគ​យ៉ាងឆ្អែត។

​អំណានព្រះគម្ពីរពេលល្ងាច៖ លូកា ១២:២២-៣៤