​អំណានព្រះគម្ពីរពេលព្រឹក៖ ត្រូវ​ប្រមូល​ទ្រព្យសម្បត្តិ ទុក​សំរាប់​ខ្លួន នៅ​ឯ​ស្ថានសួគ៌​វិញ ដែល​ជា​កន្លែង​គ្មាន​កន្លាត ឬ​ច្រែះ​ស៊ី​បំផ្លាញ​ឡើយ ក៏​គ្មាន​ចោរ​ទំលុះ ឬ​ប្លន់​ផង ពី​ព្រោះ​សម្បត្តិ​ទ្រព្យ​របស់​អ្នក​ស្ថិត​នៅ​កន្លែង​ណា នោះ​ចិត្ត​អ្នក​ក៏​នឹង​នៅ​កន្លែង​នោះ​ដែរ។ ម៉ាថាយ ៦:២០-២១

អំណានប្រចាំថ្ងៃ គំរូនៃការសប្បុរស

ការត្អូញត្អែរដដែលៗរបស់រាស្ត្រអ៊ីស្រាអែល ហើយនិងការមកដល់នៃសេចក្តីក្រោធរបស់ព្រះ ដោយសារតែការបំពានច្បាប់របស់ពួកគេ ត្រូវបានកត់ត្រានៅក្នុងប្រវត្តិសាស្ត្រដ៏ពិសិដ្ឋសម្រាប់ជាប្រយោជន៍ដល់រាស្ត្ររបស់ទ្រង់ជំនាន់ក្រោយ ដែលរស់នៅលើផែនដី ប៉ុន្តែ ពិសេសជាងនេះទៅទៀតនោះគឺ ដើម្បីបង្ហាញនូវការព្រមានដល់អស់អ្នកដែលរស់នៅជិតគ្រាចុងក្រោយបង្អស់នៃផែនដី។ ហើយសកម្មភាពនៃការប្តេជ្ញាចិត្តចំពោះការងារ និងថាមពល ព្រមទាំងសេចក្តីសប្បុរសរបស់គេ នៅក្នុងការនាំយកតង្វាយថ្វាយដោយស្ម្រ័គពីចិត្ត ទៅជូនលោកម៉ូសេក៏ត្រូវបានកត់ត្រា សម្រាប់ជាប្រយោជន៍ដល់រាស្ត្ររបស់ទ្រង់ដែរ។ គំរូរបស់ពួកគេក្នុងការរៀបចំសម្ភារៈ​សម្រាប់រោងឧបោសថ ដោយរីករាយ គឺជាគំរូសម្រាប់មនុស្សទាំងអស់ដែលពិតជាស្រឡាញ់ការថ្វាយបង្គំព្រះ។ អស់អ្នកដែលឱ្យតម្លៃទៅលើព្រះពរនៃព្រះវត្តមានដ៏ពិសិដ្ឋរបស់ព្រះ នៅពេលគេរៀបចំកន្លែងថ្វាយទ្រង់ ដើម្បីឱ្យទ្រង់អាចជួបជាមួយនឹងពួកគេ ត្រូវតែធ្វើឱ្យកន្លែងនោះបានពិសិដ្ឋ ថ្កុំថ្កើង ស្របទៅតាមតម្លៃរបស់ព្រះនៃស្ថានសួគ៌។ ពួកគេគួរតែដឹងថា គេកំពុងតែរៀបចំតំណាក់ថ្វាយព្រះ។

វាជាការសំខាន់ណាស់ ក្នុងការសាងសង់កន្លែងដ៏ពិសេសសម្រាប់ព្រះ ដើម្បីឱ្យទ្រង់អាចជួបជាមួយនឹងរាស្ត្ររបស់ទ្រង់ ហើយត្រូវតែរៀបចំដោយយកចិត្តទុកដាក់ ធ្វើឱ្យមានផាសុកភាព ស្អាតបាត និងសមរម្យ ដ្បិត​សំណង់នេះ ត្រូវបានឧទ្ទិសថ្វាយទៅព្រះ ហើយត្រូវបានថ្វាយដល់ទ្រង់ ព្រះអង្គនឹងគង់នៅជាតំណាក់របស់ទ្រង់ ហើយនិងធ្វើឱ្យអាគារនោះមានភាពពិសិដ្ឋ ដោយ​សារព្រះវត្តមានដ៏បរិសុទ្ធរបស់ទ្រង់។ ពួកគេបានថ្វាយទៅព្រះជាម្ចាស់ដោយស្ម័គ្រពីចិត្តនូវតង្វាយជាច្រើន ដើម្បីសម្រេចការងារ​សាងសង់​នោះ ហើយបន្ទាប់មក ពួកជាងសាងសង់និយាយថា សូមឈប់នាំយក​តង្វាយមកទៀត។

បន្ទាប់ពីការសាងសង់រោងឧបោសថបានចប់សព្វគ្រប់មកលោកម៉ូសេ​បានត្រួតពិនិត្យកិច្ចការទាំងអស់ ហើយបានប្រៀបធៀប​ជាមួយនឹងគំរូ ហើយនិងការណែនាំដែលគាត់បានទទួលពីព្រះ នោះគាត់បានឃើញថាគ្រប់ផ្នែកនៃរោងឧបោសថបានត្រឹមត្រូវតាមគំរូហើយ គាត់បានឱ្យពរដល់បណ្តាជន។

​អំណានព្រះគម្ពីរពេលល្ងាច៖ និក្ខមនំ ៣៦:១-៧