​អំណានព្រះគម្ពីរពេលព្រឹក៖ ឯ​សេចក្តី​ឯ​ទៀត បង​ប្អូន​អើយ ចូរ​ឲ្យ​មាន​កំឡាំង​ឡើង​ក្នុង​ព្រះអម្ចាស់ ដោយ​ឫទ្ធិបារមី​របស់​ព្រះចេស្តា​ទ្រង់។ អេភេសូរ ៦:១០

អំណានប្រចាំថ្ងៃ ការបង្ហាត់បង្រៀនដល់សាសន៍អ៊ីស្រាអែល​ចុងក្រោយបង្អស់

លោកម៉ូសេបានប្រាប់ពួកគេថា ដោយសារតែការបះបោររបស់ពួកគេ ធ្វើឱ្យព្រះមានបំណងចង់ប្រហារពួកគេជាច្រើនដង ប៉ុន្តែ គាត់បានសុំអង្វរ​ជំនួស​គេ ដោយស្មោះអស់ពីចិត្តធ្វើឱ្យព្រះដែលពោរពេញដោយព្រះគុណបានទុកជីវិតឱ្យពួកគេ។ គាត់ក៏បានរំឭកដល់ពួកគេនូវគ្រប់ទាំង​ការអស្ចារ្យ​ដែលព្រះបានធ្វើទៅលើស្តេចផារ៉ោន និងលើទឹកដីស្រុកអេស៊ីព្ទដែរ។ គាត់​បានមានប្រសាសន៍ទៅកាន់ពួកគេថា «ដ្បិតភ្នែកឯងរាល់គ្នាបានឃើញការដ៏ធំ ដែលព្រះយេហូវ៉ាបានធ្វើទាំងអស់ហើយ ដូច្នេះត្រូវឱ្យឯងរាល់គ្នាកាន់តាមបញ្ញត្តិដែលអញបង្គាប់មកឯងនៅថ្ងៃនេះគ្រប់ជំពូក ប្រយោជន៍ឱ្យឯងរាល់គ្នាបានខ្លាំងពូកែអាចចូលទៅចាប់យកស្រុកដែលឯងនឹងឆ្លងទៅយកនោះបាន» ចោទិយកថា ១១:៧-៨។

លោកម៉ូសេបានព្រមានជាពិសេសដល់កូនចៅអ៊ីស្រាអែល ប្រឆាំងទាស់នឹងការលួងលោមឱ្យថ្វាយបង្គំរូបព្រះ។ គាត់បានទូន្មានដល់ពួកគេ​ដោយ​ស្មោះអស់ពីចិត្តឱ្យគោរពតាមក្រឹត្យវិន័យដប់ប្រការរបស់ព្រះ។ ប្រសិន​​បើពួកគេបង្ហាញនូវការស្តាប់បង្គាប់ និងសេចក្តីស្រឡាញ់ចំពោះព្រះ ហើយបំរើទ្រង់ដោយសេចក្តីស្រឡាញ់ឥតបែងចែក ទ្រង់នឹងប្រទានភ្លៀងដល់ពួកគេតាមរដូវកាល ហើយនិងធ្វើឱ្យដំណាំរបស់ពួកគេលូតលាស់បានល្អ ព្រមទាំងធ្វើឱ្យគោក្របីរបស់ពួកគេបានចម្រើនទ្បើង។ ពួកគេអាចនឹងមានអំណរជាមួយនឹងកិត្តិយសជាពិសេសនិងខ្ពង់ខ្ពស់ ព្រមទាំងមានជ័យជំនះលើខ្មាំងសត្រូវរបស់ពួកគេទៀតផង។

លោកម៉ូសេបានបង្ហាត់បង្រៀនដល់កូនចៅអ៊ីស្រាអែល ដោយឥរិយា​ស្មោះត្រង់គួរឱ្យចាប់អារម្មណ៍។ គាត់បានដឹងច្បាស់ថា​នេះគឺជាឱកាសចុងក្រោយបង្អស់របស់គាត់ ក្នុងការថ្លែងទៅកាន់ពួកគេ។ បន្ទាប់មក គាត់បានបញ្ចប់ការកត់ត្រាទុកក្នុងសៀវភៅនូវគ្រប់ទាំងបញ្ញត្តិនិងច្បាប់ទាំងឡាយ ដែល​​ព្រះ​បានប្រទានដល់គាត់ ព្រមទាំងបញ្ញត្តិផ្សេងៗទៀត ទាក់ទងនឹង​ការថ្វាយតង្វាយ យញ្ញបូជាផង។ គាត់បានប្រគល់សៀវភៅ​នោះទៅក្នុងដៃរបស់មនុស្សដែលមានតួនាទីយ៉ាងពិសិដ្ឋ ហើយបានសុំឱ្យគេ​ដាក់សៀវ​ភៅ​នេះ នៅក្នុងហឹបសញ្ញា ដើម្បីឱ្យមានសុវត្ថិភាព ព្រោះព្រះនឹងថែរក្សា ហឹប​នោះជារៀងរហូត។ សៀវភៅរបស់លោកម៉ូសេនេះ ត្រូវបានគេរក្សាទុកសម្រាប់​ឱ្យពួកចៅហ្វាយ នៃសាសន៍អ៊ីស្រាអែលបានប្រើប្រាស់នៅក្នុងករណី​​ចាំ​បាច់។ មនុស្សដែលបានប្រព្រឹត្តខុសតែងតែយល់នូវតម្រូវការរបស់ព្រះ ដើម្បីឱ្យត្រូវ​ទៅនឹងករណីរបស់គេ ដូច្នេះហើយសៀវភៅរបស់លោកម៉ូសេ ត្រូវបានគេការពារនៅក្នុងកន្លែងពិសេសបំផុត ទុកជាច្បាប់សម្រាប់អនុវត្តតទៅថ្ងៃមុខ។

​អំណានព្រះគម្ពីរពេលល្ងាច៖ ចោទិយកថា ៣១:១-១៣