ថ្ងៃសៅរ៍ ទី១៩ ខែមីនា ឆ្នាំ២០២២
អំណានព្រះគម្ពីរពេលព្រឹក៖ យើងក៏មិនលាក់សេចក្តីទាំងនោះទុកចំពោះកូនចៅរបស់គាត់ដែរគឺនឹងប្រកាសពីអស់ទាំងសេចក្តីសរសើរនៃព្រះយេហូវ៉ាដល់ដំណមនុស្សជាន់ក្រោយឲ្យបានស្តាប់ព្រមទាំងឥទ្ធានុភាព និងការអស្ចារ្យដែលទ្រង់បានធ្វើផង។ ទំនុកតម្កើង ៧៨:៤
អំណានប្រចាំថ្ងៃ ការឆ្លងទន្លេយ័រដាន់
ការធ្វើដំណើរឆ្លងទន្លេយ័រដាន់របស់សាសន៍អ៊ីស្រាអែល គឺជាការអស្ចារ្យដ៏ល្បីល្បាញ។ «យ៉ូស្វេក៏ប្រាប់ដល់បណ្តាជនថា ចូរឯងរាល់គ្នាញែកខ្លួនចេញជាបរិសុទ្ធចុះ ពីព្រោះថ្ងៃស្អែក ព្រះយេហូវ៉ាទ្រង់នឹងធ្វើការអស្ចារ្យនៅក្នុងពួកឯង រួចលោកប្រាប់ដល់ពួកសង្ឃថា ចូរលើកយកហឹបនៃសេចក្តីសញ្ញានាំទៅមុខបណ្តាជនទៅ នោះគេក៏លើកយកហឹបនៃសេចក្តីសញ្ញា សែងនាំមុខបណ្តាជនទៅ។ ព្រះយេហូវ៉ាទ្រង់មានបន្ទូលនឹងយ៉ូស្វេថា នៅថ្ងៃនេះ អញនឹងចាប់តាំងលើកតម្កើងឯង នៅមុខពួកអ៊ីស្រាអែលទាំងអស់គ្នា ដើម្បីឱ្យគេដឹងថាអញនៅជាមួយនឹងឯង ដូចជាបាននៅជាមួយនឹងម៉ូសេដែរ»។
ពួកសង្ឃបានដើរទៅមុខពួកបណ្តាជន ហើយសែងហឹបនៃសេចក្តីសញ្ញា ដែលដាក់ក្រឹត្យវិន័យរបស់ព្រះ។ ហើយនៅពេលដែលជើងរបស់សង្ឃបានដាក់ចុះទៅក្នុងទឹកនៅមាត់ទន្លេយ័រដាន់ នោះទឹកដែលហូរចុះពីលើមកក៏ត្រូវកាត់ផ្តាច់ លែងហូរ ហើយពួកសង្ឃដែលសែងហឹបនៃសេចក្តីសញ្ញា ជានិមិត្តរូបនៃព្រះវត្តមានរបស់ព្រះបានដើរឆ្លងទៅ ហើយពួកបណ្តាជននៃសាសន៍ហេព្រើរទាំងអស់ក៏បានឆ្លងទៅតាមពីក្រោយ។ នៅពេលដែលពួកសង្ឃបានមកដល់ចំពាក់កណ្តាលទន្លេយ័រដាន់ លោកយ៉ូស្វេបានបង្គាប់ឱ្យឈរនៅបាតទន្លេ រហូតទាល់តែកូនចៅអ៊ីស្រាអែលបានឆ្លងផុតអស់។ កាលនោះ កូនចៅអ៊ីស្រាអែលដែលមានជីវិតរស់នៅនាជំនាន់នោះ ត្រូវបានធ្វើឱ្យជឿថាទឹកទន្លេយ័រដាន់បានទទួលរងនូវអំណាច ដូចគ្នានឹងអំណាចដែលឪពុករបស់គេបានឃើញនៅឯសមុទ្រក្រហមកាលពី ៤០ ឆ្នាំមុននោះដែរ។ នៅក្នុងចំណោមពួកគេទាំងអស់គ្នានេះ មានមនុស្សភាគច្រើនធ្លាប់បានដើរឆ្លងកាត់សមុទ្រក្រហមកាលពីគេនៅតូចៗ។ ឥឡូវនេះពួកគេបានឆ្លងទន្លេយ័រដាន់ជាមនុស្សថ្នឹកចម្បាំងកំពុងត្រៀមប្រយុទ្ធនៅក្នុងសមរភូមិ។ បន្ទាប់ពីពួកពលអ៊ីស្រាអែលទាំងអស់បានឆ្លងទន្លេយ័រដាន់ផុតហើយ លោកយ៉ូស្វេបានបង្គាប់ឱ្យពួកសង្ឃទ្បើងពីក្នុងទន្លេមក។ នៅពេលដែលពួកសង្បទាំងអស់កំពុងសែងហឹបនៃសេចក្តីសញ្ញាបានទ្បើងចេញពីទន្លេមកឈរនៅលើដីគោកភ្លាម ទឹកទន្លេយ័រដាន់បានមូរចូលគ្នាដូចដើមវិញ ហើយបានជន់ហូរហៀរព្រៀបដល់មាត់ច្រាំង។ ការអស្ចារ្យនេះបានសម្តែងឡើងដើម្បីឱ្យសេចក្តីជំនឿរបស់សាសន៍អ៊ីស្រាអែលកើនកាន់តែរឹងមាំឡើង។ ដើម្បីកុំឱ្យពួកគេភ្លេចការអស្ចារ្យដ៏ធំនេះ ព្រះអម្ចាស់បានបង្គាប់ឱ្យលោកយ៉ូស្វេបញ្ជាដល់មនុស្សម្នាក់ ដែលគាត់បានតម្រូវជាមុន ពីអំបូរអ៊ីស្រាអែលមួយ ឱ្យគេយកថ្មម្នាក់មួយដុំពីបាតទន្លេ ជាកន្លែងដែលជើងពួកសង្ឃបានឈរ នៅពេលដែលពួកសាសន៍ហេព្រើរកំពុងឆ្លងទន្លេ លីនៅលើស្មាទៅគរធ្វើជាបូជនីយស្ថាន (កន្លែងសម្រាប់រំឭកពីរឿងអ្វីមួយ) នៅត្រង់គីលកាល ទុកជាសេចក្តីរំឭកនូវរឿងរ៉ាវដែលសាសន៍អ៊ីស្រាអែល បានដើរឆ្លងទន្លេយ័រដាន់ នៅលើដីគោក។ បន្ទាប់ពីពួកសង្ឃបានទ្បើងផុតពីទន្លេយ័រដាន់ហើយ ព្រះជាម្ចាស់បានដកព្រះហស្តដ៏មានព្រះចេស្តារបស់ទ្រង់ចេញ ហើយទឹកទន្លេហូរត្របាញ់ដូចជាទឹកធ្លាក់ចូលទៅក្នុងទន្លេវិញ។
អំណានព្រះគម្ពីរពេលល្ងាច៖ យ៉ូស្វេ ជំពូក៣
ខចងចាំ៖ ឯសេចក្តីឯទៀត បងប្អូនអើយ ចូរឲ្យមានកំឡាំងឡើងក្នុងព្រះអម្ចាស់ ដោយឫទ្ធិបារមីរបស់ព្រះចេស្តាទ្រង់។ អេភេសូរ ៦:១០
