ថ្ងៃសៅរ៍ ទី២៦ ខែមីនា ឆ្នាំ២០២២
អំណានព្រះគម្ពីរពេលព្រឹក៖ ខ្ញុំប្រាប់អ្នករាល់គ្នាជាប្រាកដថា គ្រប់ទាំងអំពើបាបនឹងបានអត់ទោសដល់ពួកកូនមនុស្ស ហើយអស់ទាំងពាក្យដែលគេពោលប្រមាថដែរ តែអ្នកណាដែលពោលពាក្យប្រមាថដល់ព្រះវិញ្ញាណបរិសុទ្ធ នោះមិនដែលបានអត់ទោសឲ្យឡើយ អ្នកនោះឯងនឹងត្រូវទោស នៅអស់កល្បជានិច្ចវិញ។ ម៉ាកុស ៣:២៨-២៩
អំណានប្រចាំថ្ងៃ លទ្ធផលនៃការធ្វេសប្រហែសរបស់លោកអេលី
នៅពេលដែលលោកអេលីបានធ្វើជាសម្តេចសង្ឃ គាត់បានតែងតាំងកូនប្រុសរបស់គាត់ធ្វើជាសង្ឃ។ មានតែសង្ឃអេលីម្នាក់គត់ដែលត្រូវបានអនុញ្ញាតឱ្យចូលទៅក្នុងទីបរិសុទ្ធមួយឆ្នាំម្តង។ កូនប្រុសរបស់គាត់ទាំងពីរត្រូវបំរើនៅឯទ្វារនៃរោងឧបោសថ ហើយបានធ្វើជាអធិបតីក្នុងការសម្លាប់សត្វនៅឯអាសនាតង្វាយដុត។ ពួកគេទាំងអស់គ្នាបានបំពានច្បាប់នៃតំណែងដ៏ពិសិដ្ឋនេះជាបន្តបន្ទាប់។ ពួកគេជាមនុស្សអាត្មានិយម លោភលន់ល្មោភស៊ី ហើយពាយងាយ (ធ្វើការមិនយកចិត្តទុកដាក់)។ ព្រះទ្រង់បានស្តីបន្ទោសដល់លោកអេលី ចំពោះកំហុសដ៏ធ្ងន់របស់គាត់ ដោយធ្វើមិនដឹងមិនឮក្នុងការដាក់វិន័យគ្រួសារនេះ។ លោកអេលីបានស្តីបន្ទោសកូនប្រុសរបស់គាត់ ប៉ុន្តែ មិនបានរឹតបន្តឹងដល់ពួកគេឡើយ។ បន្ទាប់ពីពួកគេទាំងអស់បានតែងតាំងឱ្យកាន់តំណែងដ៏ពិសិដ្ឋ ជាសង្ឃហ្លូងមក លោកអេលីបានឮអំពីការប្រព្រឹត្តិរបស់ពួកគេ ក្នុងការកេងបន្លំនូវតង្វាយរបស់កូនចៅអ៊ីស្រាអែល ព្រមទាំងការបំពានច្បាប់ដ៏មុតមាំរបស់ព្រះ និងមាយាទអាក្រក់របស់ពួកគេដែលការទាំងនោះបានធ្វើឱ្យសាសន៍អ៊ីស្រាអែលមានអំពើបាប។
ព្រះជាម្ចាស់ទ្រង់បានធ្វើឱ្យកុមារសាំយូអែលដឹងពីការជំនុំជម្រះ ដែលទ្រង់នឹងនាំមកដល់គ្រួសាររបស់សង្ឃអេលី ដោយសារតែការធ្វេសប្រហែសរបស់គាត់។ «ដូច្នេះព្រះយេហូវ៉ាទ្រង់មានបន្ទូលថា មើលអញរៀបនឹងធ្វើការមួយ នៅក្នុងសាសន៍អ៊ីស្រាអែល ដែលនឹងធ្វើឱ្យខ្ទ័រដល់ត្រចៀកទាំងសងខាងនៃអស់អ្នកណាដែលឮនៅថ្ងៃនោះអញនឹងសម្រេចទាស់នឹងអេលី តាមគ្រប់ទាំងការដែលអញបាននិយាយពីពួកគ្រួសារលោក ហើយចាប់តាំងពីដើម ដរាបដល់ចុងផង ដ្បិតអញបានប្រាប់លោកហើយថាអញនឹងជំនុំជម្រះពួកគ្រួសារលោកជាដរាបទៅ ដោយព្រោះអំពើដ៏លាមក ដែលលោកបានដឹងពីពួកកូនលោក ជាការដែលនាំឱ្យគេត្រូវបណ្តាសា ហើយលោកពុំបានហាមឃាត់ដល់គេទេ គឺដោយហេតុនោះបានជាអញស្បថដល់គ្រួសារអេលីថា ទោះបីយកយញ្ញបូជាឬតង្វាយណាមកថ្វាយក៏ដោយ គង់តែមិនបានដូរនឹងអំពើលាមកដែលពួកគ្រួសារលោកបានប្រព្រឹត្តដែរ នៅជាដរាបតទៅ»។
ការបំពានច្បាប់របស់កូនប្រុសៗរបស់លោកអេលី គឺជាការប្រមាថដ៏គឃ្លើន ចំពោះព្រះដ៏បរិសុទ្ធ ដែលគ្មានយញ្ញបូជាណាអាចនឹងលោះឱ្យធួននឹងការបំពានដោយចេតនាបែបនោះបានឡើយ។ សង្ឃដ៏ពោរពេញដោយអំពើបាប ដែលមិនគោរពកោតខ្លាចព្រះទាំងអស់នេះ បានប្រមាថមើលងាយ ដល់យញ្ញបូជាដែលជាតំណាងឱ្យព្រះរាជបុត្រារបស់ព្រះ។ ហើយតាមរយៈការប្រព្រឹត្តិប្រមាថបែបនេះ ពួកគេបានជាន់ឈ្លីព្រះលោហិតសម្រាប់ជាថ្លៃលោះឱ្យធួននឹងបាបដែលមានតម្លៃលើសតង្វាយយញ្ញបូជាណាៗទាំងអស់។
សាំយូអែលបានប្រាប់លោកអេលីពីព្រះបន្ទូលរបស់ព្រះ «រួចអេលីនិយាយថា គឺជាព្រះយេហូវ៉ា ហើយសូមឱ្យទ្រង់សម្រេចតាមតែទ្រង់គិតឃើញថាល្អចុះ»។ លោកអេលីបានដឹងថា ពួកគេបានបន្ទាបបន្ថោកព្រះហើយ ហើយគាត់បានដឹងថា គាត់ជាមនុស្សមានបាបផង។ គាត់បានទទួលស្គាល់ថាព្រះកំពុងតែដាក់ទណ្ឌកម្មដល់ការធ្វេសប្រហែសដ៏មានបាបរបស់គាត់។ លោកអេលីបានផ្សព្វផ្សាយព្រះបន្ទូលដែលព្រះបានប្រទានដល់កុមារសាំយូអែលឱ្យបណ្តាជនអ៊ីស្រាអែលទាំងអស់បានដឹង។ គាត់បានគិតថា ដោយការធ្វើដូច្នេះគាត់អាចកែតម្រូវនូវកំហុសនៃការធ្វេសប្រហែសដ៏ពោរពេញដោយអំពើបាបពីអតីតកាលរបស់គាត់បាន។ ការកាត់ទោសអំពើអាក្រក់របស់លោកអេលីមិនត្រូវបានពន្យារពេលទៀតទេ។
អំណានព្រះគម្ពីរពេលល្ងាច៖ សាំយូអែលទី១ ជំពូក៣
ខចងចាំ៖ ចូរស្វែងរកព្រះយេហូវ៉ា ក្នុងកាលដែលអាចនឹងរកទ្រង់ឃើញ ហើយអំពាវនាវដល់ទ្រង់ ក្នុងកាលដែលទ្រង់គង់នៅជិតចុះ ត្រូវឲ្យមនុស្សអាក្រក់បោះបង់ចោលផ្លូវរបស់ខ្លួន ហើយឲ្យមនុស្សទុច្ចរិតចោលគំនិតអាក្រក់របស់ខ្លួនដែរ រួចឲ្យគេត្រឡប់មកឯព្រះយេហូវ៉ាវិញ នោះទ្រង់នឹងអាណិតមេត្តាដល់គេ គឺឲ្យវិលមកឯព្រះនៃយើងរាល់គ្នា ដ្បិតទ្រង់នឹងអត់ទោសឲ្យជាបរិបូរ ។ អេសាយ ៥៥:៦-៧
