ថ្ងៃអាទិត្យ ទី២៧ ខែមីនា ឆ្នាំ២០២២
អំណានព្រះគម្ពីរពេលព្រឹក៖ ចូររក្សាបញ្ញើរបស់ព្រះយេហូវ៉ា ជាព្រះនៃឯង ដើម្បីប្រព្រឹត្តតាមអស់ទាំងផ្លូវរបស់ទ្រង់ ព្រមទាំងកាន់តាមសេចក្តីបង្គាប់ និងក្រឹត្យក្រម ហើយនឹងសេចក្តីបន្ទាល់របស់ទ្រង់តាមសេចក្តី ដែលបានកត់ទុកហើយ ក្នុងក្រឹត្យវិន័យរបស់លោកម៉ូសេ ប្រយោជន៍ឲ្យឯងបានប្រព្រឹត្តដោយប្រាជ្ញាក្នុងគ្រប់ទាំងការដែលឯងធ្វើ ហើយនៅកន្លែងណាដែលឯងទៅ។ ពង្សាវតាក្សត្រទី១ ២:៣
អំណានប្រចាំថ្ងៃ ហឹបនៃសេចក្តីសញ្ញាត្រូវបានគេដណើមយកទៅ
សាសន៍អ៊ីស្រាអែលបានធ្វើសង្គ្រាមជាមួយសាសន៍ភីលីស្ទីន ហើយពួកគេបានបរាជ័យ និងមានមនុស្ស ៤០០០ នាក់ ក្នុងចំណោមពួកគេត្រូវបានគេសម្លាប់។ សាសន៍ហេព្រើរមានសេចក្តីភ័យខ្លាចយ៉ាងខ្លាំង។ ពួកគេបានដឹងថាប្រសិនបើសាសន៍ដទៃផ្សេងទៀតបានឮពីការបរាជ័យរបស់ពួកគេ នោះពួកគេនឹងមានកម្លាំងចិត្តមកបង្កសង្គ្រាមជាមួយពួកគេជាមិនខាន។ ពួកចាស់ទុំនៃសាសន៍អ៊ីស្រាអែលបានដឹងយ៉ាងច្បាស់ថា ការបរាជ័យរបស់ពួកគេ គឺដោយសារតែហឹបនៃសេចក្តីសញ្ញារបស់ព្រះមិនបាននៅជាមួយនឹងពួកគេ។ ពួកគេបានបញ្ជូនមនុស្សទៅឯស៊ីឡូរឱ្យទៅយកហឹបនៃសេចក្តីសញ្ញារបស់ព្រះ។ ពួកគេបានគិតដល់ការធ្វើដំណើរឆ្លងកាត់ទន្លេយ័រដាន់ និងការដណ្តើមយកទីក្រុងយេរីខូរបានយ៉ាងស្រួល នៅពេលដែលពួកគេបានសែងហឹបនៃសេចក្តីសញ្ញា ដូច្នេះពួកគេបានសម្រេចចិត្តថា ពួកគេចាំបាច់ត្រូវតែនាំយកហឹបនៃសេចក្តីសញ្ញាមកកាន់ពួកគេ នោះពួកគេនឹងទទួលបានជ័យជំនះ លើខ្មាំងសត្រូវរបស់ពួកគេ។ ពួកគេមិនបានដឹងថា កម្លាំងរបស់គេគឺស្ថិតនៅលើការស្តាប់បង្គាប់តាមច្បាប់ ជាការតំណាងឱ្យព្រះដែលនៅក្នុងហឹបនោះឡើយ។ ហុបនីនិងភីនេហាសគឺជាសង្ឃដែលពុករលួយ ដែលបាននៅជាមួយនឹងហឹបដ៏ពិសិដ្ឋ កំពុងតែបំពានទៅលើច្បាប់របស់ព្រះ។ អ្នកមានបាបទាំងនេះបានសែងហឹបនៃសេចក្តីសញ្ញាទៅកាន់ទីបោះទ័ពរបស់សាសន៍អ៊ីស្រាអែល។ ទំនុកចិត្តរបស់ពួកកងទ័ពត្រូវបានស្តារឡើងវិញ ហើយពួកគេបានទុកចិត្តទៅលើជោគជ័យរបស់ពួកគេ។
«កាលហឹបនៃសេចក្តីសញ្ញារបស់ព្រះយេហូវ៉ាបានមកដល់ក្នុងទីបោះទ័ពហើយ នោះស្រាប់តែពួកអ៊ីស្រាអែលទាំងអស់គ្នា គេស្រែកឡើងជាខ្លាំងដល់ម៉្លេះបានជាឮខ្ទ័រខ្ទារនៅផែនដី នោះពួកភីលីស្ទីនបានឮសូរស័ព្ទសម្រែកដូច្នោះក៏សួរគ្នាថា តើសូរស័ព្ទសម្រែកជាខ្លាំងដល់ម៉្លេះនៅទីបោះទ័ពរបស់ពួកសាសន៍ហេព្រើរ ជាយ៉ាងណាហ្ន៎ នោះក៏យល់ឃើញថា ហឹបនៃព្រះយេហូវ៉ាបានមកដល់ទីបោះទ័ពហើយ ដូច្នេះពួកភីលីស្ទីនមានសេចក្តីភ័យ ដោយថាព្រះបានយាងមកក្នុងទីបោះទ័ពគេហើយ រួចគេថា វរហើយយើងរាល់គ្នា តើមានអ្នកណានឹងជួយយើងឱ្យរួចពីកណ្តាប់ដៃនៃព្រះដ៏ខ្លាំងពូកែទាំងនេះបានឬ? ទាំងអស់នេះហើយគឺជាព្រះដែលបានវាយពួកសាសន៍អេស៊ីព្ទ។
នៅទីរហោស្ថានដោយសេចក្តីវេទនាគ្រប់យ៉ាង ឱពួកភីលីស្ទីនអើយ ចូរខំប្រឹងឡើង ហើយសម្រេចខ្លួនឱ្យពេញជាមនុស្សចុះ ដើម្បីកុំឱ្យយើងត្រូវធ្លាក់ទៅជាបាវបំរើនៃពួកហេព្រើរ ដូចជាគេបានធ្វើជាបាវបំរើដល់យើងនោះឡើយ ចូរសម្រេចខ្លួនឱ្យពេញជាមនុស្ស ហើយតដៃនឹងគេចុះ ដូច្នេះ ពួក ភីលីស្ទីនក៏ពួតដៃគ្នា ហើយពួកអ៊ីស្រាអែលចាញ់ដៃរត់ទៅឯត្រសាលវិញរៀងខ្លួនក៏មានមនុស្សស្លាប់យ៉ាងសន្ធឹក គឺពួកពលថ្មើរជើងខាងអ៊ីស្រាអែលបានដួលស្លាប់អស់ចំនួន ៣ម៉ឺននាក់ ឯហឹបនៃព្រះគេក៏ចាប់នាំយកទៅ ចំណែកហុបនី និងភីនេហាស ជាកូនអេលីទាំងពីរក៏ស្លាប់ដែរ»។
អំណានព្រះគម្ពីរពេលល្ងាច៖ សាំយូអែលទី១ ៤:១-១១
ខចងចាំ៖ នោះបើរាស្ត្រអញ ដែលបានហៅ តាមឈ្មោះអញ គេបន្ទាបខ្លួន ហើយអធិស្ឋានរកមុខអញ ព្រមទាំងងាកបែរចេញពីផ្លូវអាក្រក់របស់គេ នោះអញនឹងស្តាប់ពីលើស្ថានសួគ៌ ហើយនឹងអត់ទោសអំពើបាបរបស់គេ ទាំងមើលស្រុកគេឲ្យជាផង។ របាក្សត្រទី២ ៧:១៤
