ថ្ងៃចន្ទ ទី២៨ ខែមីនា ឆ្នាំ២០២២
អំណានព្រះគម្ពីរពេលព្រឹក៖ មើល នៅថ្ងៃនេះ អញដាក់ព្រះពរ ហើយនឹងសេចក្តីបណ្តាសា សំញែងនៅមុខឯងរាល់គ្នា បើឯងស្តាប់តាមអស់ទាំងបញ្ញត្តរបស់ព្រះយេហូវ៉ា ជាព្រះនៃឯងដែលអញបង្គាប់ដល់ឯងនៅថ្ងៃនេះ នោះនឹងបានពរ តែបើមិនស្តាប់តាមអស់ទាំងបញ្ញត្តរបស់ព្រះយេហូវ៉ា ជាព្រះនៃឯងទេ គឺបែរចេញពីផ្លូវដែលអញបង្គាប់ដល់ឯងនៅថ្ងៃនេះ ទៅតាមព្រះដទៃដែលពីដើមមិនបានស្គាល់វិញ នោះឯង និងត្រូវបណ្តាសាហើយ។ ចោទិយកថា ១១:២៦-២៨
អំណានប្រចាំថ្ងៃ ការស្លាប់របស់លោកអេលី
ពួកសាសន៍ភីលីស្ទីនបានគិតថា ហឹបនេះគឺជាព្រះរស់របស់សាសន៍អ៊ីស្រាអែល។ ពួកគេមិនបានដឹងថា ព្រះដ៏មានព្រះជន្មរស់ដែលបានបង្កើតផ្ទៃមេឃនិងផែនដី និងជាព្រះដែលបានប្រទានក្រឹត្យវិន័យរបស់ទ្រង់នៅលើភ្នំស៊ីណាយ ទ្រង់បានធ្វើឱ្យមានភាពចម្រុងចម្រើន និងការខ្វះខាត អាស្រ័យទៅលើការស្តាប់បង្គាប់ឬការបំពានទៅនឹងច្បាប់របស់ទ្រង់ ដែលមាននៅក្នុងហឹបដ៏ពិសិដ្ឋនេះនោះ។
មានចំនួនមនុស្សស្លាប់យ៉ាងសន្ធឹក ក្នុងចំណោមសាសន៍អ៊ីស្រាអែល។ លោកអេលីបានអង្គុយនៅមាត់ផ្លូវកំពុងទន្ទឹងរង់ចាំដំណឹងពីកងទ័ពដោយញ័ររន្ធត់។ គាត់ភ័យខ្លាចក្រែងហឹបនៃសេចក្តីសញ្ញារបស់ព្រះត្រូវពួកសត្រូវចាប់យកបាន ហើយធ្វើឱ្យអាប់ឱន ដោយកងទ័ពភីលីស្ទីន។ អ្នកនាំសារ ម្នាក់បានរត់ទៅឯសីឡូរ ហើយបានជម្រាបដល់អេលីថា កូនប្រុសទាំងពីរនាក់របស់គាត់ត្រូវបានគេសម្លាប់ហើយ។ គាត់ខំទ្រាំទ្រនឹងដំណឹងនេះបានដោយឥតចេញស្តីមួយម៉ាត់ឡើយ ដ្បិតគាត់មានហេតុផលក្នុងការទទួលរងនូវទណ្ឌកម្មនេះ។ ប៉ុន្តែ នៅពេលដែលអ្នកនាំសារបានបន្ថែមថា «ឯហឹបរបស់ព្រះគេបានយកទៅហើយ» លោកអេលីបានយោលខ្លួនដោយចិត្តកង្វល់នៅលើជើងម៉ា ហើយដួលផ្ងារក្រោយស្លាប់ទៅ។ គាត់បានទទួលចំណែកនៃសេចក្តីក្រោធរបស់ព្រះដែលត្រូវបានធ្លាក់មកលើកូនរបស់គាត់។ គាត់មានកំហុសយ៉ាងធ្ងន់ ក្នុងការការបំពានរបស់កូនគាត់ ដោយសារគាត់បានធ្វេសប្រហែសយ៉ាងធ្ងន់ធ្ងរ មិនបានរឹតបន្តឹងពួកគេឱ្យបានល្អ។
ការចាប់យកហឹបរបស់ព្រះដោយសាសន៍ភីលីស្ទីនត្រូវបានចាត់ទុកថាជាសេចក្តីវិនាសដ៏ធំដែលបានកើតឡើងដល់សាសន៍អ៊ីស្រាអែល។ នៅពេលដែលនាងជិតស្លាប់ ប្រពន្ធរបស់ភីនេហាសបានដាក់ឈ្មោះកូននាងថា អ៊ីកាបូឌ ដោយពាក្យថា «សិរីល្អរបស់ព្រះបានចេញពីពួកអ៊ីស្រាអែលបាត់ហើយ គឺដោយព្រោះគេបានចាប់យកហឹបនៃព្រះទៅ»។
អំណានព្រះគម្ពីរពេលល្ងាច៖ សាំយូអែលទី១ ៤:១២-២២
ខចងចាំ៖ នោះបើរាស្ត្រអញ ដែលបានហៅ តាមឈ្មោះអញ គេបន្ទាបខ្លួន ហើយអធិស្ឋានរកមុខអញ ព្រមទាំងងាកបែរចេញពីផ្លូវអាក្រក់របស់គេ នោះអញនឹងស្តាប់ពីលើស្ថានសួគ៌ ហើយនឹងអត់ទោសអំពើបាបរបស់គេ ទាំងមើលស្រុកគេឲ្យជាផង។ របាក្សត្រទី២ ៧:១៤
