ថ្ងៃអង្គារ ទី២៩ ខែមីនា ឆ្នាំ២០២២
អំណានព្រះគម្ពីរពេលព្រឹក៖ ឱព្រះអម្ចាស់អើយ នៅក្នុងអស់ទាំងពួកព្រះគ្មានណាមួយឲ្យដូចជាទ្រង់ឡើយក៏គ្មានការអ្វីឲ្យដូចជាការរបស់ទ្រង់ដែរឱព្រះអម្ចាស់អើយអស់ទាំងសាសន៍ដែលទ្រង់បានបង្កើតគេនឹងមកក្រាបថ្វាយបង្គំនៅចំពោះទ្រង់ហើយគេនឹងលើកដំកើងព្រះនាមទ្រង់ ដ្បិតទ្រង់ធំប្រសើរ ហើយក៏ធ្វើការយ៉ាងអស្ចារ្យទ្រង់ជាព្រះតែមួយអង្គឯង។ ទំនុកតម្កើង ៨៦:៨-១០
អំណានប្រចាំថ្ងៃ នៅក្នុងទឹកដីនៃសាសន៍ភីលីស្ទីន
ព្រះយេហូវ៉ាទ្រង់បានបណ្តោយឱ្យពួកសត្រូវយកហឹបនៃសេចក្តីសញ្ញារបស់ទ្រង់ទៅ ដើម្បីបង្ហាញដល់សាសន៍អ៊ីស្រាអែលពីការឥតប្រយោជន៍ ក្នុងការទុកចិត្តទៅលើហឹបដែលជានិមិត្តរូបនៃព្រះវត្តមានរបស់ទ្រង់ នៅពេលដែលពួកគេកំពុងតែប្រមាថមើលងាយដល់ច្បាប់ដែលមាននៅក្នុងហឹបនោះ។ ព្រះបានធ្វើឱ្យគេបន្ទាបខ្លួន ដោយដកហូតចេញពីពួកគេនូវហឹបដ៏ពិសិដ្ឋ កម្លាំងដ៏អំនួតនិងទំនុកចិត្តរបស់គេ។
សាសន៍ភីលីស្ទីនរីករាយខ្លាំងណាស់ ព្រោះពួកគេបានគិតថាគេមានព្រះដ៏ល្បីល្បាញរបស់សាសន៍អ៊ីស្រាអែល ជាព្រះដែលបានសម្តែងការដ៏អស្ចារ្យដល់ពួកគេ ហើយបានធ្វើឱ្យពួកសត្រូវរបស់គេភ័យញ័រ។ ពួកគេបានយកហឹបរបស់ព្រះទៅកាន់ទីក្រុងអាសដូឌ ហើយបានដាក់ហឹបនោះនៅក្នុងព្រះវិហារយ៉ាងប្រណីត ដែលគេបានសាងឡើង សម្រាប់លើកតម្កើងដល់ព្រះដ៏ល្បីបំផុតរបស់ពួកគេ គឺព្រះដាកុន ហើយបានដាក់ហឹបរបស់ព្រះនៅក្បែរព្រះនោះ។ លុះស្អែកឡើង សង្ឃនៃព្រះទាំងនេះបានចូលទៅក្នុងព្រះវិហារ ហើយពួកគេមានការតក់ស្លុតជាខ្លាំងដោយឃើញព្រះ ដាកុនបានដួលផ្កាប់មុខដល់ដីនៅចំពោះហឹបនៃព្រះយេហូវ៉ា។ រួចពួកគេលើកព្រះដាកុនទៅដាក់នៅកន្លែងដើមវិញ។ ពួកគេបានគិតថា ប្រហែលជាព្រះដាកុនបានដួលរលំដោយចៃដន្យទេ។ ប៉ុន្តែ លុះដល់ថ្ងៃស្អែកឡើង នោះក៏ឃើញព្រះដាកុនបានដួលផ្កាប់មុខដល់ដី ដូចថ្ងៃមុន ហើយក្បាលនិងដៃទាំងពីររបស់ព្រះដាកុនក៏ត្រូវបានកាត់ផ្តាច់។
ទេវតានៃព្រះដែលធ្លាប់បានយាងរួមដំណើរជាមួយហឹបនៃសេចក្តីសញ្ញា បានបង្ក្រាបព្រះដែលជារូបសំណាក គ្មានវិញ្ញាណនេះ ហើយក្រោយមកទៀតបានធ្វើឱ្យរូបនោះបាក់បែក ដើម្បីបង្ហាញថា ព្រះដែលជាព្រះមានព្រះជន្មរស់ ទ្រង់គឺជាព្រះលើអស់ទាំងព្រះ ហើយនៅចំពោះទ្រង់ ព្រះដទៃទាំងឡាយគ្មានអំណាចអ្វីសោះឡើយ។ ពួកអ្នកមិនជឿលើព្រះជាម្ចាស់គេគោរពដល់ព្រះដាកុន ជាព្រះរបស់ពួកគេយ៉ាងក្រៃលែង ហើយនៅពេលដែលពួកគេបានរកឃើញព្រះនោះត្រូវបានបំផ្លាញ ហើយដូលផ្កាប់មុខទៅនឹងដី នៅចំពោះហឹបរបស់ព្រះយេហូវ៉ា ពួកគេមានទុក្ខកង្វល់ជាខ្លាំង ហើយបានចាត់ទុកការនេះថាជាប្រផ្នូលដ៏អាក្រក់ សម្រាប់សាសន៍ភីលីស្ទីន។ ពួកគេបានបកស្រាយថាសាសន៍ភីលីស្ទីន និងព្រះរបស់គេនឹងត្រូវបានបង្ក្រាប ហើយនិងត្រូវបានបំផ្លាញដោយពួកសាសន៍ហេព្រើរ ហើយថាព្រះរបស់សាសន៍ហេព្រើរនឹងត្រូវមានអំណាចខ្លាំងជាងព្រះទាំងអស់។ ពួកគេក៏បានយកហឹបរបស់ព្រះយេហូវ៉ាចេញពីព្រះវិហារនៃរូបព្រះរបស់ពួកគេ ហើយបានដាក់នៅដោយឡែកដាច់តែឯង។
អំណានព្រះគម្ពីរពេលល្ងាច៖ សាំយូអែលទី១ ជំពូក៥
ខចងចាំ៖ នោះបើរាស្ត្រអញ ដែលបានហៅ តាមឈ្មោះអញ គេបន្ទាបខ្លួន ហើយអធិស្ឋានរកមុខអញ ព្រមទាំងងាកបែរចេញពីផ្លូវអាក្រក់របស់គេ នោះអញនឹងស្តាប់ពីលើស្ថានសួគ៌ ហើយនឹងអត់ទោសអំពើបាបរបស់គេ ទាំងមើលស្រុកគេឲ្យជាផង។ របាក្សត្រទី២ ៧:១៤
