ថ្ងៃចន្ទ ទី០៧ ខែមីនា ឆ្នាំ២០២២
អំណានព្រះគម្ពីរពេលព្រឹក៖ តើឯងមិនបានដឹង តើមិនបានឮទេឬអី ថាព្រះដ៏គង់នៅអស់កល្បជានិច្ច គឺព្រះយេហូវ៉ា ជាព្រះដែលបានបង្កើតផែនដី រហូតដល់ចុងបំផុត ទ្រង់មិនដែលល្វើយឡើយ ក៏មិនដែលអស់កំឡាំងផង គ្មានអ្នកណាអាចស្ទង់យល់យោបល់របស់ទ្រង់បានទេ ទ្រង់រមែងចំរើនកំឡាំង ដល់អ្នកដែលល្វើយ ហើយចំណែកអ្នកដែលគ្មានកំឡាំងសោះ នោះទ្រង់ក៏ប្រទានឲ្យ។ អេសាយ ៤០:២៨-២៩
អំណានប្រចាំថ្ងៃ ការខ្វះជំនឿ
កាលែបនិង យ៉ូស្វេបានព្យាយាមជំទាស់នឹងពាក្យដែលគាត់បានឮ ប៉ុន្តែ ពួកបណ្តាជនទាំងអស់មានសេចក្តីរំភើបយ៉ាងខ្លាំង ហើយបង្ខំចិត្តមិនស្តាប់របាយការណ៍របស់មនុស្សទាំងពីរនាក់នេះឡើយ។ បន្ទាប់ពីពួកគេបានស្ងប់ស្ងៀមបន្តិច កាលែបបានប្រថុយនិយាយ។ គាត់បាននិយាយទៅកាន់ពួកបណ្តាជនថា «ចូរយើងទ្បើងទៅចាប់យកស្រុកនោះ ជាប្រញាប់កុំខាន ដ្បិតយើងអាចនឹងយកដោយស្រួល»។ ប៉ុន្តែ មនុស្សដែលបានទ្បើងទៅជាមួយគ្នា គេប្រកែកថា «យើងពុំអាចនឹងទ្បើងទៅទាស់នឹងគេបានទេ ដ្បិតគេខ្លាំងពូកែជាងយើងណាស់» អ្នកទាំងនោះបានបន្តរបាយការណ៍អាក្រក់របស់គេដដែលៗ ហើយថ្លែងបញ្ជាក់ថា ពួកមនុស្សនៅស្រុកនោះសុទ្ធតែមានមាឌធំៗ «នៅស្រុកនោះយើងបានឃើញពួកមនុស្សធំសំបើម គឺជាកូនចៅអ័ណាក់ ដែលជាពូជមនុស្សមានមាឌធំសម្បើម យើងមើលទៅខ្លួនយើងដូចជាកណ្តូប ទោះបើនៅភ្នែកគេក៏ដូច្នេះដែរ»។
ជនជាតិអ៊ីស្រាអែលរអ៊ូរទាំសាជាថ្មី
គ្រានោះពួកជំនុំនៃពួកកូនចៅអ៊ីស្រាអែលក៏ទ្បើងសំឡេងស្រែក ហើយនៅយប់នោះបណ្តាជន ក៏យំគ្រប់គ្នា នោះគេរអ៊ូរទាំទាស់នឹងម៉ូសេ ហើយនិងអើរ៉ុន ពួកជំនុំទាំងអស់គ្នានិយាយថា ស៊ូឱ្យយើងបានស្លាប់នៅស្រុកអេស៊ីព្ទ ឬនៅក្នុងទីរហោស្ថាននេះវិញ យើងសុខចិត្តឱ្យស្លាប់ទៅជាជាង តើហេតុអ្វីបានជាព្រះយេហូវ៉ាទ្រង់នាំយើងមកក្នុងកន្លែងនេះ ឱ្យត្រូវស្លាប់ដោយដាវដូច្នេះ ហើយឱ្យប្រពន្ធកូនយើងទៅជារំពាគេផង ចុះបើយើងវិលត្រឡប់ទៅឯស្រុកអេស៊ីព្ទវិញ នោះតើមិនមានប្រយោជន៍ជាជាងទេឬអី រូចគេនិយាយគ្នាទៅវិញទៅមកថា ចូរយើងរើសយកមេម្នាក់ ហើយត្រឡប់ ទៅឯស្រុកអេស៊ីព្ទវិញទៅ។ នោះម៉ូសេហើយនឹងអើរ៉ុនលោកទម្លាក់ខ្លួនចុះផ្កាប់មុខ នៅចំពោះពួកជំនុំនៃកូនចៅអ៊ីស្រាអែលទាំងអស់គ្នា»។
កូនចៅអ៊ីស្រាអែលមិនគ្រាន់តែបានបញ្ចេញកំហឹងដោយការត្អូញត្អែរទាស់នឹងលោកម៉ូសេប៉ុណ្ណោះទេ ប៉ុន្តែ ពួកគេបានចោទប្រកាន់ដល់ព្រះថាបានបោកប្រាស់ពួកគេ ដោយសន្យាឱ្យទឹកដីដែលពួកគេមិនអាចចាប់យកបានដល់ពួកគេ ទៀតផង។ នៅទីនេះវិញ្ញាណនៃការបះបោររបស់ពួកគេ បានពុះពោរទ្បើងយ៉ាងខ្លាំង ធ្វើឱ្យគេភ្លេចអស់នូវព្រះហស្តដ៏ពូកែរបស់ព្រះ ដែលបានដឹកនាំពួកគេឱ្យចេញផុតពីប្រទេសអេស៊ីព្ទ ហើយបានដឹកនាំពួកគេដោយការអស្ចារ្យជាច្រើន ជាបន្តបន្ទាប់ រហូតដល់ពួកគេបានសម្រេចចិត្តជ្រើសរើសអ្នកដឹកនាំម្នាក់ ដើម្បីឱ្យដឹកនាំពួកគេត្រឡប់ទៅប្រទេសអេស៊ីព្ទ ជាកន្លែងដែលពួកគេធ្លាប់ជាប់ជាទាសករ ហើយបានទទួលរងនូវការលំបាកវេទនាជាច្រើននោះវិញ។ ពួកគេបានតែងតាំងពួកនោះជាមេក្រុម ហើយបានបោះបង់ចោលលោកម៉ូសេ ជាអ្នកដឹកនាំដ៏ឈឺចាប់និងអត់ធ្មត់របស់ពួកគេ ហើយពួកគេបានរអ៊ូរទាំទាស់នឹងព្រះដោយជូរចត់។
អំណានព្រះគម្ពីរពេលល្ងាច៖ ហេព្រើរ ៣:៧-១៩
ខចងចាំ៖ បើយើងលន់តួបាបវិញ នោះទ្រង់មានព្រះហឫទ័យស្មោះត្រង់ ហើយសុចរិត ប្រយោជន៍នឹងអត់ទោសបាបឲ្យយើង ហើយនិងសំអាតយើង ពីគ្រប់អំពើទុច្ចរិតទាំងអស់ផង។ យូ៉ហានទី១ ១:៩
