ថ្ងៃពុធ ទី០៩ ខែមីនា ឆ្នាំ២០២២
អំណានព្រះគម្ពីរពេលព្រឹក៖ដ្បិតចិត្តគេមិនបានទៀងត្រង់នៅចំពោះទ្រង់ក៏មិនស្មោះចំពោះនឹងសេចក្តីសញ្ញាទ្រង់ដែរ ប៉ុន្តែ ចំណែកទ្រង់មានសេចក្តីមេត្តាករុណាបានជាទ្រង់អត់ទោសចំពោះសេចក្តីទុច្ចរិតរបស់គេ ហើយមិនបានបំផ្លាញគេទេ អើទ្រង់បានបង្វែរសេចក្តីខ្ញាល់ទ្រង់ចេញជាញយៗឥតឲ្យសេចក្តីក្រោធរបស់ទ្រង់ផុលឡើងទាំងអស់ឡើយ។ ទំនុកតម្កើង ៧៨:៣៧-៣៨
អំណានប្រចាំថ្ងៃ ការអង្វរករដោយជោគជ័យរបស់លោកម៉ូសេ
លោកម៉ូសេបានចូលទៅក្នុងរោងឧបោសថដើម្បីនិយាយជាមួយនឹងព្រះ។ «ព្រះយេហូវ៉ាទ្រង់មានបន្ទូលនឹងម៉ូសេថា តើជនទាំងឡាយនេះនឹងនៅតែមើលងាយអញដល់កាលណាទៀត? តើដល់កាលណាទៀតដែលគេនៅតែមិនជឿដល់អញ ទោះបើបានឃើញអស់ទាំងទីសំគាល់ដែលអញបានធ្វើនៅកណ្តាលគេជាច្រើនម៉្លេះផង? ដូច្នេះ អញនឹងវាយគេដោយជំងឺអាសន្នរោគ ហើយនិងកាត់កាល់គេចោលចេញ រួចអញនឹងបង្កើតសាសន៍មួយដ៏ធំជាងហើយពូកែជាងពីឯងវិញ។
តែម៉ូសេទូលទៅព្រះយេហូវ៉ាថា បើដូច្នេះពូកសាសន៍អេស៊ីព្ទនឹងឮដែរ (ដ្បិតទ្រង់បាននាំបណ្តាជននេះពីកណ្តាលគេ ទ្បើងមកដោយព្រះចេស្តាទ្រង់) នោះគេនឹងប្រាប់តៗមកដល់មនុស្សនៅស្រុកនេះ ដែលបានឮថាព្រះយេហូវ៉ាទ្រង់តែងគង់នៅកណ្តាលពួកជននេះ ក៏ឮថាពួកជននេះ តែងឃើញព្រះយេហូវ៉ានៅប្រទល់មុខ ហើយថា ពពករបស់ទ្រង់តែងស្ថិតនៅពីលើគេ ទ្រង់ក៏យាងនាំមុខគេក្នុងបង្គោលពពកនៅវេលាថ្ងៃ និងក្នុងបង្គោលភ្លើងនៅវេលាយប់។ ដូច្នេះបើទ្រង់សម្លាប់ពួកជនទាំងអស់នេះដូចជាមនុស្សតែម្នាក់នោះ សាសន៍ទាំងប៉ុន្មានដែលបានឮល្បីពីទ្រង់ គេនឹងដៀលថា ដោយព្រោះតែព្រះយេហូវ៉ាពុំអាចនឹងនាំពួកនោះចូលទៅក្នុងស្រុកដែលទ្រង់បានស្បថថានឹងឱ្យទៅគេនោះបានជាទ្រង់ត្រឡប់ជាសម្លាប់គេនៅក្នុងទីរហោស្ថានវិញ។
លោកម៉ូសេបដិសេធម្តងទៀត កុំឱ្យព្រះបំផ្លាញសាសន៍អ៊ីស្រាអែល ហើយតាំងខ្លួនគាត់ឱ្យក្លាយទៅជាសាសន៍មួយដ៏ធំជាងសាសន៍អ៊ីស្រាអែលនោះឡើយ។ អ្នកបំរើព្រះដែលមានមេត្តាករុណារូបនេះ បានបង្ហាញសេចក្តីស្រឡាញ់របស់គាត់ចំពោះសាសន៍អ៊ីស្រាអែល និងបានបង្ហាញនូវការយកចិត្តទុកដាក់របស់គាត់ចំពោះសិរីល្អនៃព្រះអាទិករ និងកិត្តិយសរាស្ត្ររបស់គាត់ ទ្រង់មានសេចក្តីមេត្តាករុណាជាបរិបូរ ទ្រង់តែងអត់ទោសដល់សេចក្តីទុច្ចរិត និងការរំលងតែមិនមែនរាប់មនុស្សមានទោសទុកជាគ្មាននោះឡើយ គឺទ្រង់តែងធ្វើឱ្យទោសនៃការទុច្ចរិតរបស់ឪពុក ធ្លាក់ទៅដល់កូនចៅទាំង៣តំណ ហើយ៤តំណផង ទូលបង្គំសូមអង្វរទ្រង់ សូមអត់ទោសការទុច្ចរិតរបស់ពួកជននេះ ដោយសេចក្តីមេត្តាករុណាដ៏ធំរបស់ទ្រង់ ដូចជាទ្រង់បានអត់ទោសដល់គេ តាំងពីស្រុកអេស៊ីព្ទរហូតមកដល់ទីនេះដែរ។ លោកទូលអង្វរដល់ទ្រង់ សូមទ្រង់កុំសម្លាប់ពួកគេ តែសូមឱ្យទ្រង់ប្រណីដល់ពួកគេម្តងនេះ ហើយបន្ថែមសេចក្តីអត់ធ្មត់ដ៏គ្រប់លក្ខណ៍ទៅដល់ពួកគេទាំងអស់គ្នាដូចដែលទ្រង់បានលើកលែងទោសឱ្យពួកគេរួចទៅហើយនោះផង។
«នោះព្រះយេហូវ៉ាទ្រង់បានមានបន្ទូលថា អញអត់ទោសឱ្យតាមពាក្យឯងហើយ ប៉ុន្តែ អញស្បថដោយនូវព្រះជន្មអញថា ផែនដីទាំងមូលត្រូវបានពេញដោយសិរីល្អនៃព្រះយេហូវ៉ា ហើយពិតប្រាកដជាពួកអ្នកទាំងនេះ ដែលអញបានធ្វើនៅស្រុកអេស៊ីព្ទ ហើយនៅទីរហោស្ថាននេះ គេនឹងមិនដែលឃើញស្រុកដែលអញបានស្បថនឹងឱ្យដល់ពួកអយ្យកោគេមក គឺពួកដែលមើលងាយអញនោះគេនឹងមិនដែលឃើញស្រុកនោះទ្បើយ ដោយព្រោះគេបានល្បងអញ ទាំង១០ដងនេះ ហើយក៏មិនបានស្តាប់តាមសំឡេងអញផង តែកាលែបជាអ្នកបំរើរបស់អញនោះ អញនឹងនាំចូលទៅក្នុងស្រុកដែលគាត់បានទៅមើលនោះ ហើយពួកគាត់នឹងបានស្រុកនោះជាកេរអាករ ពីព្រោះមានវិញ្ញាណផ្សេងសណ្ឋិតលើគាត់ ហើយគាត់ក៏បានប្រព្រឹត្តតាមអញគ្រប់ជំពូក។
អំណានព្រះគម្ពីរពេលល្ងាច៖ ជនគណនា ១៤:១១-២៥
ខចងចាំ៖ បើយើងលន់តួបាបវិញ នោះទ្រង់មានព្រះហឫទ័យស្មោះត្រង់ ហើយសុចរិត ប្រយោជន៍នឹងអត់ទោសបាបឲ្យយើង ហើយនិងសំអាតយើង ពីគ្រប់អំពើទុច្ចរិតទាំងអស់ផង។ យូ៉ហានទី១ ១:៩
