ថ្ងៃសុក្រ ទី០១ ខែមេសា ឆ្នាំ២០២២
អំណានព្រះគម្ពីរពេលព្រឹក៖ ឯអ្នកណាដែលប្រព្រឹត្តតាមតែអំពើចិត្ត ឥតស្តាប់តាមសង្ឃដែលឈរបំរើដល់ព្រះយេហូវ៉ា ជាព្រះនៃឯង នៅទីនោះ ឬតាមចៅក្រមផង អ្នកនោះនឹងត្រូវទោសដល់ស្លាប់ ត្រូវឲ្យបំបាត់សេចក្តីអាក្រក់ពីសាសន៍អ៊ីស្រាអែលចេញ។ ចោទិយកថា ១៧:១២
អំណានប្រចាំថ្ងៃ ការទទួលទណ្ឌកម្ម
ការទទួលទណ្ឌកម្មដោយខ្វះការគោរពចំពោះព្រះពួកអ្នកនៅបេតសេមែសគេកំពុងតែច្រូតស្រូវនៅឯស្រែ ហើយនៅពេលដែលគេបានឃើញហឹបនៃព្រះ នៅលើរទេះទឹមដោយគោញី២ ពួកគេមានអំណរជាខ្លាំង។ ពួកគេបានដឹងថា នេះគឺជាស្នាព្រះហស្តរបស់ព្រះហើយ។ មេគោទាំងពីរនោះបានអូសរទេះដែលផ្ទុកនូវហឹបសញ្ញារបស់ព្រះទៅដល់ថ្មធំមួយផ្ទាំង ហើយបានឈប់នៅទីនោះដោយខ្លួនឯង។ ពួកលេវីបានយកហឹបនៃព្រះយេហូវ៉ានិងតង្វាយរបស់សាសន៍ភីលីស្ទីនចុះ ហើយពួកគេបានថ្វាយរទេះ ហើយនិងគោដែលបានដឹកហឹបដ៏ពិសិដ្ឋ និងតង្វាយរបស់សាសន៍ភីលីស្ទីន មកថ្វាយជាតង្វាយដុតដល់ព្រះយេហូវ៉ានៅទីនោះ។ កាលពួកមេនៃសាសន៍ភីលីស្ទីននាំគ្នាត្រឡប់ទៅឯក្រុងអេក្រុនវិញ នោះសេចក្តីវេទនាត្រូវបានបញ្ឈប់។
ពួកបេតសេមែសចង់ដឹងថាតើមានអំណាចអស្ចារ្យអ្វីនៅក្នុងហឹបនោះ ដែលបានធ្វើឱ្យមានហេតុការណ៍ ដ៏គួរឱ្យស្ញប់ស្ញែងកើតឡើងដូច្នេះ។ ពួកគេបានមើលទៅក្នុងហឹបដែលពោរពេញដោយអំណាចនោះ ហើយមិនបានឃើញអំណាចរបស់ព្រះដែលគួរឱ្យជឿសោះ។ គ្មាននរណាម្នាក់អាចមើលទៅឯហឹបនៃសេចក្តីសញ្ញារបស់ព្រះបានទេ មានតែមនុស្សដែលបានតែងតាំងឡើងយ៉ាងពិសិដ្ឋ សម្រាប់គោលបំណងនេះតែប៉ុណ្ណោះ ដែលអាចបើកហឹបនេះមើលបាន ដោយមិនត្រូវស្លាប់ ដ្បិតការដែលមើលហឹបសញ្ញា គឺប្រៀបដូចជាមើលទៅឯព្រះផ្ទាល់ដូច្នោះដែរ។ ហើយនៅពេលដែលមនុស្សបំពេញចិត្តខ្លួនឯង ដោយបានបើកហឹបមើលទៅទីអាថ៌កំបាំងនៅខាងក្នុង ដែលសូម្បីតែអ្នកមិនជឿ ដែលថ្វាយបង្គំរូបព្រះ ក៏មិនហ៊ានធ្វើផងនោះទេវតាដែលយាងតាមហឹបបានវាយសម្លាប់មនុស្សជាង៥ម៉ឺននាក់។
ហើយប្រជាជនបេត-សេមែស គេខ្លាចហឹបរបស់ព្រះជាខ្លាំង ហើយពួកគេបាននិយាយឡើងថា «តើមានអ្នកឯណាអាចនឹងឈរនៅចំពោះព្រះយេហូវ៉ា ជាព្រះដ៏បរិសុទ្ធនេះបាន? តើទ្រង់ត្រូវចេញពីយើងខ្ញុំឡើងទៅឯណាវិញ? រួចគេចាត់មនុស្សឱ្យទៅឯពួកគារយ៉ាត់- យ៉ារីម ប្រាប់ថា ពួកភីលីស្ទីនបាននាំយកហឹបនៃព្រះយេហូវ៉ាមកវិញហើយ ដូច្នេះសូមអ្នករាល់គ្នាចុះទៅនាំវាឡើងទៅឯអ្នករាល់គ្នាវិញចុះ»។ នោះពួកគារយ៉ាត់-យ៉ារីម ក៏មកនាំយកហឹបនៃព្រះយេហូវ៉ា ឡើងទៅដាក់នៅក្នុងផ្ទះរបស់អ័ប៊ីណាដាប់ ក៏ញែកកូនរបស់គាត់ចេញសម្រាប់ថែរក្សាហឹបនៃព្រះយេហូវ៉ា។
អំណានព្រះគម្ពីរពេលល្ងាច៖ សាំយូអែលទី១ ៦:១៣-២១
ខចងចាំ៖ នោះបើរាស្ត្រអញ ដែលបានហៅ តាមឈ្មោះអញ គេបន្ទាបខ្លួន ហើយអធិស្ឋានរកមុខអញ ព្រមទាំងងាកបែរចេញពីផ្លូវអាក្រក់របស់គេ នោះអញនឹងស្តាប់ពីលើស្ថានសួគ៌ ហើយនឹងអត់ទោសអំពើបាបរបស់គេ ទាំងមើលស្រុកគេឲ្យជាផង។ របាក្សត្រទី២ ៧:១៤
