ថ្ងៃពុធ ទី១៣ ខែមេសា ឆ្នាំ២០២២
អំណានព្រះគម្ពីរពេលព្រឹក៖ ហើយទោសនេះ គឺថា ពន្លឺបានមកក្នុងលោកីយ៍ តែមនុស្សលោកចូលចិត្តនឹងសេចក្តីងងឹតជាជាងពន្លឺ ពីព្រោះអំពើដែលគេធ្វើទាំងប៉ុន្មាន សុទ្ធតែអាក្រក់។ យ៉ូហាន ៣:១៩
អំណានប្រចាំថ្ងៃ បន្ទាប់ពីសាតាំងបានបញ្ចប់ការល្បួងរបស់វា វាបានចាកចេញពីព្រះយេស៊ូ ហើយទេវតាក៏បាននាំយកអាហារមកថ្វាយទ្រង់សោយនៅទីរហោស្ថាន និងចម្រើនកម្លាំងដល់ទ្រង់ ហើយព្រះពររបស់ព្រះវរបិតាក៏មកសណ្ឋិតលើទ្រង់។ សាតាំងបានទទួលបរាជ័យក្នុងការល្បួងដ៏ខ្លាំងក្លារបស់វា ប៉ុន្តែ វាស្វែងរកឱកាសនៅក្នុងការងាររបស់ព្រះយេស៊ូវ ដើម្បីរកពេលណាមួយនឹងប្រើល្បិចកលរបស់វា ទាស់នឹងព្រះយេស៊ូវម្តងទៀត។ វានៅតែសង្ឃឹមថា វាអាចយកជ័យជំនះពីទ្រង់បាន ដោយបំផុសអ្នកដែលមិនទទួលព្រះយេស៊ូវឱ្យស្អប់ខ្ពើមទ្រង់និងរកឱកាសបំផ្លាញទ្រង់។
សាតាំងបានពិភាក្សាជាពិសេសមួយជាមួយទេវតារបស់វា។ ពួកវាមានការខកចិត្តនិងខឹងជាខ្លាំង ដោយវាគ្មានជោគជ័យទៅលើព្រះរាជបុត្រានៃព្រះអ្វីបន្តិចសោះ។ ពួកវាបានសម្រេចចិត្តថា ពួកវាត្រូវតែប្រើល្បិចកល និងអំណាចរបស់វាឱ្យខ្លាំងបំផុត ដើម្បីបញ្ចុះបញ្ចូលនៅក្នុងគំនិតនៃជាតិសាសន៍របស់ទ្រង់ កុំឱ្យជឿថាទ្រង់ជាព្រះអង្គសង្គ្រោះនៃលោកិយនេះឡើយ ហើយតាមរបៀបនេះ វានឹងធ្វើឱ្យព្រះយេស៊ូវអស់សេចក្តីក្លាហាននឹងបេសកកម្មរបស់ទ្រង់។ ទោះបីជាពួកយូដា គោរពពិធីបុណ្យផ្សេងៗ និងការថ្វាយតង្វាយយញ្ញបូជាយ៉ាងត្រឹមត្រូវយ៉ាងណាក៏ដោយ ប្រសិនបើពួកវាអាចបិទភ្នែកគេពីបទទំនាយ ហើយធ្វើឱ្យពួកគេជឿថាព្រះមែស្ស៊ីនឹងលេចឡើងជាស្តេចដ៏មានអំណាចនៅលើផែនដី នោះពួកគេនឹងស្អប់ព្រះយេស៊ូវ ហើយបោះបង់ទ្រង់ជាមិនខាន។
ខ្ញុំត្រូវបានបង្ហាញឱ្យឃើញថា សាតាំងនិងទេវតារបស់វារវល់ជាខ្លាំងក្នុងការបញ្ចុះបញ្ចូលមនុស្សដោយការមិនជឿ សម្អប់និងការប្រមាថ នៅពេលដែលព្រះគ្រីស្ទកំពុងបំពេញព្រះរាជកិច្ចរបស់ទ្រង់។ នៅពេលដែលព្រះយេស៊ូវបន្លឺព្រះសូរសៀងអំពីសេចក្តីពិត ដើម្បីបញ្ជាក់ពីអំពើបាបរបស់វា វាតែងតែខឹងជាខ្លាំង។ សាតាំងនិងទេវតារបស់វាជំរុញអ្នកមានបាបទាំងនោះ ឱ្យធ្វើគុតព្រះរាជបុត្រានៃព្រះ។ មានម្តង ពួកគេបានយកដុំថ្មគប់ទ្រង់ ប៉ុន្តែ ទេវតាបានថែរក្សាទ្រង់ហើយនាំទ្រង់ចេញពីហ្វូងមនុស្សដ៏ឃោរឃៅទៅកាន់កន្លែងសុខសាន្តមួយ។ នៅពេលដែលផែនការនៃសេចក្តីពិតបានចេញពីព្រះឱស្ឋទ្រង់ម្តងទៀត ហ្វូងមនុស្សបានចាប់ទ្រង់ ហើយនាំទ្រង់យកទៅលើកំពូលភ្នំ បំរុងនឹងច្រានទម្លាក់។ ការមិនចុះសម្រុងគ្នាបានកើតឡើងនៅក្នុងចំណោមពួកគេអំពីការដែលគេបំរុងនឹងធ្វើទៅលើទ្រង់ នៅពេលនោះទេវតាបានលាក់ទ្រង់ពីភ្នែកហ្វូងមនុស្សម្តងទៀត ហើយទ្រង់បានយាងចេញពីចំណោមពួកគេទៅ។
អំណានព្រះគម្ពីរពេលល្ងាច៖ លូកា ជំពូក ៤:១៣-៣០
ខចងចាំ៖ ដ្បិតមានបុត្រ១កើតដល់យើង ព្រះទ្រង់ប្រទានបុត្រា១មកយើងហើយ ឯការគ្រប់គ្រងនឹងនៅលើស្មារបស់បុត្រនោះ ហើយគេនឹងហៅព្រះនាមទ្រង់ថា ព្រះដ៏ជួយគំនិតយ៉ាងអស្ចារ្យ ព្រះដ៏មានព្រះចេស្តា ព្រះវរបិតាដ៏គង់នៅអស់កល្ប និងជាម្ចាស់នៃមេត្រីភាព។ អេសាយ ៩:៦
