ថ្ងៃសុក្រ ទី១៥ ខែមេសា ឆ្នាំ២០២២
អំណានព្រះគម្ពីរពេលព្រឹក៖ ទ្រង់បានយាងមកគង់នៅផែនដីរបស់ទ្រង់ តែរាស្ត្រទ្រង់មិនបានទទួលទ្រង់សោះ ប៉ុន្តែអស់អ្នកណាដែលទទួលទ្រង់ គឺអស់អ្នកដែលជឿដល់ព្រះនាមទ្រង់ នោះទ្រង់បានប្រទានអំណាច ឲ្យបានត្រឡប់ជាកូនព្រះ។ យ៉ូហាន ១:១១-១២
អំណានប្រចាំថ្ងៃ ការប្រឆាំងដែលគ្មានឥទ្ធិពល
សាតាំងនិងទេវតារបស់វាបានបិទភ្នែកពួកយូដា ហើយធ្វើឱ្យការយល់របស់គេទៅជាងងឹតងងល់ ព្រមទាំងបានបំផុសឱ្យមេលើពួកបណ្តាជន និងពួកអ្នកដឹកនាំធ្វើគុតព្រះអង្គសង្គ្រោះ។ គេបានចាត់មនុស្សឱ្យទៅនាំព្រះយេស៊ូវ ទៅឯគេ ហើយនៅពេលទៅជិតដល់កន្លែងដែលទ្រង់គង់នៅ នោះគេមានការអស្ចារ្យជាខ្លាំង។ ពួកគេបានឃើញព្រះយេស៊ូវបង្ហាញសេចក្តីមេត្តាករុណា និងការអាណិតអាសូរ នៅពេលដែលទ្រង់ឃើញទុក្ខព្រួយរបស់មនុស្ស។ ពួកគេបានឃើញទ្រង់កំពុងមានបន្ទូលលើកទឹកចិត្តដល់អ្នកទន់ខ្សោយនិងអ្នកមានទុក្ខវេទនា ដោយសេចក្តីស្រឡាញ់ និងភាពថ្នាក់ថ្នម។ ពួកគេក៏បានឮទ្រង់បណ្តេញអំណាចរបស់សាតាំង ដោយព្រះសូរសៀងដ៏មានអំណាច ហើយដណ្តើមយកអ្នកដែលសាតាំងគ្រប់គ្រងឱ្យមានសេរីភាពមកវិញដែរ។ ពួកគេបានស្តាប់ព្រះបន្ទូលប្រកបដោយគតិបណ្ឌិតដែលចេញពីព្រះឱស្ឋទ្រង់ ហើយពួកគេបានចាប់អារម្មណ៍យ៉ាងខ្លាំង ពួកគេមិនអាចយកដៃគេទៅចាប់ព្រះយេស៊ូវឡើយ។ ពួកគេបានត្រឡប់មកកាន់ពួកសង្ឃនិងពួកអ្នកដឹកនាំវិញដោយមិនបាននាំព្រះយេស៊ូវមកជាមួយឡើយ។
នៅពេលមេដឹកនាំបានសួរគេថា «តើហេតុអ្វីបានជាអ្នករាល់គ្នាមិនបាននាំវាមក?» ពួកគេបានរៀបរាប់នូវអ្វីដែលគេបានឃើញអំពីការអស្ចារ្យរបស់ទ្រង់ ព្រះបន្ទូលនៃព្រះប្រាជ្ញាញ្ញាណដ៏បរិសុទ្ធ សេចក្តីស្រឡាញ់ និងចំណេះដឹង របស់ទ្រង់ ដែលពួកគេបានឮ ហើយគេបានបញ្ចប់ ដោយនិយាយថា «មិនដែលមានអ្នកណានិយាយដូចមនុស្សនេះទេ»។ សម្តេចសង្ឃបានចោទប្រកាន់ពួកគេថា ត្រូវបានគេបោកបញ្ឆោតដែរហើយ។ អ្នកដឹកនាំខ្លះមានការខ្មាសអៀនជាខ្លាំង ដោយទាហានមិនបានចាប់ព្រះយេស៊ូវមក។ សម្តេចសង្ឃបានសួរដោយអាកប្បកិរិយាម៉ឺងម៉ាត់ថាតើមានអ្នកដឹកនាំណាបានជឿដល់វាឬទេ? ខ្ញុំបានឃើញថា មានចៅក្រម និងអ្នកដឹកនាំជាច្រើនបានជឿលើព្រះយេស៊ូវ ប៉ុន្តែ សាតាំងបានរារាំងពួកគេមិនឱ្យប្រកាសពីការនោះ។ ពួកគេខ្លាចការស្តីបន្ទោសរបស់មនុស្សខ្លាំងជាងខ្លាចព្រះ។
ទោះបីជាយ៉ាងនេះក៏ដោយ ក៏កលល្បិចនិងសម្អប់របស់សាតាំងមិនបានបំបែកផែនការនៃសេចក្តីសង្គ្រោះឡើយ។ ពេលវេលានៃការសម្រេចកិច្ចការដែលព្រះយេស៊ូវបានយាងមកបំពេញនោះបានមកដល់ហើយ។ សាតាំងនិងទេវតារបស់វាបានពិគ្រោះគ្នា ហើយបានសម្រេចចិត្តថា នឹងធ្វើឱ្យរាស្ត្ររបស់ព្រះអង្គផ្ទាល់ស្រែកទាមទារលោហិតរបស់ព្រះអង្គ ដោយអន្ទះសា និងបង្កើតរឿង ឃោរឃៅ និងប្រមាថមកលើទ្រង់។ វាសង្ឃឹមថា ព្រះយេស៊ូវនឹងតូចព្រះទ័យ ចំពោះការប្រព្រឹត្តិបែបនេះហើយលែងរក្សាការបន្ទាបព្រះកាយនិងភាពស្លូតបូតបន្តទៅទៀត។
អំណានព្រះគម្ពីរពេលល្ងាច៖ លូកា ជំពូក ៤:៣១-៤៤
ខចងចាំ៖ ដ្បិតមានបុត្រ១កើតដល់យើង ព្រះទ្រង់ប្រទានបុត្រា១មកយើងហើយ ឯការគ្រប់គ្រងនឹងនៅលើស្មារបស់បុត្រនោះ ហើយគេនឹងហៅព្រះនាមទ្រង់ថា ព្រះដ៏ជួយគំនិតយ៉ាងអស្ចារ្យ ព្រះដ៏មានព្រះចេស្តា ព្រះវរបិតាដ៏គង់នៅអស់កល្ប និងជាម្ចាស់នៃមេត្រីភាព។ អេសាយ ៩:៦
