ថ្ងៃសៅរ៍ ទី១៦ ខែមេសា ឆ្នាំ២០២២
អំណានព្រះគម្ពីរពេលព្រឹក៖ យើងសូមជូនដំណឹងអំពីព្រះបន្ទូលដែលយើងបានឃើញ និងបានឮនោះដល់បងប្អូន ដើម្បីអោយបងប្អូនបានចូលរួមរស់ជាមួយយើង រីឯយើងវិញ យើងក៏រួមរស់ជាមួយព្រះបិតា និងជាមួយព្រះយេស៊ូគ្រិស្ដ* ជាព្រះបុត្រារបស់ព្រះអង្គ។ យើងសរសេរសេចក្ដីទាំងនេះមកជូនបងប្អូន ដើម្បីអោយយើងមានអំណរពេញលក្ខណៈ។ យ៉ូហានទី១ ១:៣-៤
អំណានប្រចាំថ្ងៃ ការផ្លាស់ប្រែព្រះភក្ត្រ
នៅពេលដែលសាតាំងកំពុងរៀបចំផែនការរបស់វា ព្រះយេស៊ូវបានបើកសម្តែងពីការរងទុក្ខដែលទ្រង់ត្រូវទទួលរង ប្រាប់ដល់ពួកសាវករបស់ទ្រង់យ៉ាងប្រុងប្រយ័ត្នថាទ្រង់នឹងត្រូវគេឆ្កាង ហើយថាទ្រង់នឹងមានព្រះជន្មរស់ឡើងវិញនៅថ្ងៃទីបី។ ប៉ុន្តែ ការយល់របស់គេ ហាក់បីដូចជាងងឹតឈឹង។ ពួកគេមិនអាចយល់ពីអ្វីដែលទ្រង់មានបន្ទូលប្រាប់ពួកគេឡើយ។
ខ្ញុំបានឃើញថាសេចក្តីជំនឿរបស់ពួកសាវកត្រូវបានចម្រើនកម្លាំងយ៉ាងខ្លាំង នៅគ្រាដែលព្រះយេស៊ូវផ្លាស់ប្រែព្រះភក្ត្រ ជាពេលដែលព្រះបានអនុញ្ញាតឱ្យគេបានឃើញសិរីល្អរបស់ព្រះគ្រីស្ទនិងបានឮព្រះសូរសៀងពីលើមេឃដែលបញ្ជាក់ពីអត្តចរិតដ៏ឧត្តមរបស់ទ្រង់។ ព្រះបានជ្រើសរើសប្រទានដល់ពួកសិស្សរបស់ព្រះយេស៊ូវនូវភស្តុតាងយ៉ាងធំដែលបញ្ជាក់ថា ទ្រង់គឺជាព្រះមែស្ស៊ីដែលព្រះបានសន្យា និងថានៅក្នុងការរងទុក្ខ និងការអស់សង្ឃឹមដ៏ជូរចត់របស់ពួកគេ នៅពេលដែលទ្រង់ត្រូវគេឆ្កាង ពួកគេនឹងមិនបាត់បង់ទំនុកចិត្តទាំងស្រុងនោះឡើយ។ នៅគ្រាមានសិរីរុងរឿង (ឬការប្រែព្រះភក្ត្រ) ព្រះអម្ចាស់បានចាត់លោកម៉ូសេនិងលោកអេលីយ៉ាមកនិយាយជាមួយនឹងព្រះយេស៊ូវអំពីការរងទុក្ខនិងការសុគតរបស់ទ្រង់។ ជាជាងចាត់ទេវតាឱ្យមកសន្ទនាជាមួយនឹងព្រះរាជបុត្រា របស់ទ្រង់ ព្រះអម្ចាស់បានចាត់មនុស្សដែលធ្លាប់មានបទពិសោធន៍ក្នុងការឈឺចាប់នៃលោកិយនេះមកវិញ។
លោកអេលីយ៉ាបានដើរជាមួយព្រះ។ ការងាររបស់គាត់មានកាឈឺចាប់និងការពុះពារជាខ្លាំង ដ្បិតតាមរយៈគាត់ ព្រះអម្ចាស់បានស្តីបន្ទោសដល់អំពើបាបរបស់សាសន៍អ៊ីស្រាអែល។ លោកអេលីយ៉ាគឺជាហោរារបស់ព្រះ ហើយគាត់បានផ្លាស់ប្តូរពីកន្លែងមួយទៅកន្លែងមួយទៀត ដើម្បីរក្សាអាយុជីវិតរបស់គាត់។ សាសន៍របស់គាត់តាមប្រមាញ់ដើម្បីរកសម្លាប់គាត់ដូចជាសត្វព្រៃ។ ប៉ុន្តែព្រះបានលើកយកលោកអេលីយ៉ាឡើងទៅ។ ទេវតាបាននាំយកលោកទៅកាន់ស្ថានសួគ៌ នៅក្នុងសិរីល្អនិងជោគជ័យ។
អំណានព្រះគម្ពីរពេលល្ងាច៖ លូកា ជំពូក ៩:២៨-៤៥
ខចងចាំ៖ ដ្បិតមានបុត្រ១កើតដល់យើង ព្រះទ្រង់ប្រទានបុត្រា១មកយើងហើយ ឯការគ្រប់គ្រងនឹងនៅលើស្មារបស់បុត្រនោះ ហើយគេនឹងហៅព្រះនាមទ្រង់ថា ព្រះដ៏ជួយគំនិតយ៉ាងអស្ចារ្យ ព្រះដ៏មានព្រះចេស្តា ព្រះវរបិតាដ៏គង់នៅអស់កល្ប និងជាម្ចាស់នៃមេត្រីភាព។ អេសាយ ៩:៦
