ថ្ងៃអាទិត្យ ទី២៤ ខែមេសា ឆ្នាំ២០២២
អំណានព្រះគម្ពីរពេលព្រឹក៖ រីឯសេចក្តីជំនឿ នោះគឺជាចិត្តដែលដឹងជាក់ថានឹងបានដូចសង្ឃឹម ជាសំគាល់ពីការដែលមើលមិនឃើញ។ ហេព្រើរ ១១:១
អំណានប្រចាំថ្ងៃ ការពិបាកយល់
ពួកសាវកមានសេចក្តីក្លាហានឡើងវិញ ហើយបានចូលទៅជិតព្រះយេស៊ូវដើម្បីមើលការកាត់ទោសរបស់ទ្រង់។ ពួកគេរំពឹងថា ទ្រង់នឹងបញ្ចេញអំណាចជាព្រះរបស់ទ្រង់ ហើយរំដោះអង្គទ្រង់ចេញពីកណ្តាប់ដៃនៃពួកសត្រូវ និងដាក់ទណ្ឌកម្មដល់ពួកនោះ ចំពោះអំពើឃោរឃៅដែលគេបានប្រព្រឹត្តមកលើទ្រង់។ សេចក្តីសង្ឃឹមរបស់គេបានឡើងចុះៗ នៅពេលដែលទស្សនីយភាពផ្សេងៗ គ្នាបានកើតឡើង។ ជួនកាលគេភ័យខ្លាចនិងសង្ស័យ ក្រែងគេត្រូវបានបោកបញ្ឆោត ប៉ុន្តែ សំឡេងនៅលើភ្នំនៃសិរីរុងរឿង និងសិរីល្អដែលគេបានឃើញបានចម្រើនកម្លាំងដល់គេ ថាទ្រង់ពិតជាព្រះរាជបុត្រានៃព្រះមែន។ ពួកគេបាននឹកឃើញនូវទិដ្ឋភាពដ៏គួរឱ្យរំភើប ដែលគេបានឃើញការអស្ចារ្យដែលព្រះយេស៊ូវធ្វើក្នុងការព្យាបាលអ្នកឈឺ បើកភ្នែកអ្នកខ្វាក់ឱ្យមើលឃើញ បើកត្រចៀកអ្នកថ្លង់ឱ្យស្តាប់ឮ គំរាមនិងបណ្តេញអារក្សប្រោសអ្នកស្លាប់ឱ្យរស់ឡើងវិញ ហើយរហូតដល់គំរាមដល់ខ្យល់ ហើយខ្យល់ក៏ស្តាប់ទ្រង់ថែមទៀត។ ពួកគេមិនអាចជឿថា ទ្រង់នឹងសុគតឡើយ។ ពួកគេបានសង្ឃឹមថា ទ្រង់នឹងប្រើអំណាចរបស់ទ្រង់ ហើយដោយសារព្រះសូរសៀងដែលទ្រង់បានបង្គាប់ នឹងធ្វើឱ្យហ្វូងមនុស្សដែលស្រេកឈាមនោះ រត់គេចចេញពីទ្រង់ ដូចជាមានទាហានមួយកងដេញតាមគេដូច្នោះដែរ។ ពួកសាវកបានសង្ឃឹមថា ព្រះយេស៊ូវនឹងបញ្ចេញអំណាចរបស់ទ្រង់ បង្ហាញដល់មនុស្សទាំងឡាយថា ទ្រង់ពិតជាស្តេចនៃសាសន៍អ៊ីស្រាអែល។
អំណានព្រះគម្ពីរពេលល្ងាច៖ អេភេសូរ ជំពូក ៣:៨-២០
ខចងចាំ៖ ដូច្នេះ យើងនឹងថ្លែងប្រាប់ពីសេចក្តីទាំងនេះថាដូចម្តេច បើសិនជាព្រះកាន់ខាងយើង តើអ្នកណាអាចទាស់នឹងយើងបាន ឯព្រះអង្គ ដែលមិនបានសំចៃទុកនូវព្រះរាជបុត្រាទ្រង់បង្កើត គឺបានបញ្ជូនទៅជំនួសយើងរាល់គ្នា នោះតើមានទំនងអ្វី ឲ្យទ្រង់មិនប្រទានគ្រប់ទាំងអស់មកយើង ជាមួយនឹងព្រះរាជបុត្រាទ្រង់នោះផង។ រ៉ូម ៨:៣១-៣២
