ថ្ងៃអាទិត្យ ទី០៣ ខែមេសា ឆ្នាំ២០២២
អំណានព្រះគម្ពីរពេលព្រឹក៖ សេចក្តីកោតខ្លាចដល់ព្រះយេហូវ៉ា នោះជាបរិសុទ្ធក៏នៅជាប់ជារៀងរាបដរាបអស់ទាំងខច្បាប់របស់ព្រះយេហូវ៉ាសុទ្ធតែពិតត្រង់ហើយសុចរិតគ្រប់ជំពូក សេចក្តីទាំងនោះគួរចង់បានលើសជាងមាសអើ ជាជាងមាសសុទ្ធជាច្រើនផងក៏ផ្អែមជាងទឹកឃ្មុំ ហើយជាងដំណក់ស្រក់ពីសំណុះផង មួយទៀត ទូលបង្គំ ជាអ្នកបំរើទ្រង់ ក៏ចេះប្រយ័ត្ន ដោយសារសេចក្តីទាំងនោះដែរហើយដែលកាន់តាម នោះក៏មានរង្វាន់យ៉ាងធំ។ ទំនុកតម្កើង ១៩:៩-១១
អំណានប្រចាំថ្ងៃ ការយកហឹបសញ្ញាទៅកាន់ទីក្រុងយេរូសាឡិម
នៅពេលដែលស្តេចដាវីឌបានឮថា ផ្ទះរបស់អូបេដ អេដុម បានទទួលព្រះពរដ៏អស្ចារ្យពីព្រះ ហើយរបស់គ្រប់បែបយ៉ាងដែលគាត់មាន ត្រូវបានចម្រើនឡើង ដោយសារតែហឹបរបស់ព្រះ ទ្រង់កាន់តែមានព្រះទ័យចង់នាំយកហឹបនោះចូលមកទីក្រុងរបស់ទ្រង់កាន់តែខ្លាំង។ ប៉ុន្តែ មុននឹងស្តេចដាវីឌហ៊ានប្រថុយនាំយកហឹបដ៏បរិសុទ្ធនេះចូលមក ព្រះអង្គបានញែកព្រះកាយរបស់ទ្រង់នៅចំពោះព្រះជាមុនសិន ព្រមទាំងបានបង្គាប់ឱ្យពួកនាហ្មឺនទាំងអស់ នៅក្នុងនគររបស់ទ្រង់ ញែកខ្លួនគេចេញពីការងារខាងលោកិយទាំងឡាយ ហើយមិនឱ្យធ្វើការទាំងឡាយណា ដែលអាចនឹងទាញគំនិតរបស់ពួកគេចេញពីការញែកខ្លួនឱ្យបានបរិសុទ្ធនេះឡើយ។ ដូច្នេះ ពួកគេក៏បានញែកខ្លួនគេឱ្យបានបរិសុទ្ធ ក្នុងគោលបំណងដើម្បីនាំហឹបដ៏ពិសិដ្ឋរបស់ព្រះ ទៅកាន់ទីក្រុងរបស់ស្តេចដាវីឌ។ «ដូច្នេះដាវីឌទ្រង់ក៏យាងទៅនាំយកហឹបនៃព្រះ ពីផ្ទះអូបេដ អេដុម ចូលមកក្នុងក្រុងរបស់ទ្រង់វិញ ដោយអំណរ . .។
«គេក៏នាំយកហឹបនៃព្រះយេហូវ៉ាចូលមកដាក់នៅកន្លែងរៀបចំ ត្រង់កណ្តាលត្រសាល ដែលដាវីឌបានដំឡើងសម្រាប់ហឹបនោះ រួចទ្រង់ថ្វាយតង្វាយដុតនិងតង្វាយមេត្រី នៅចំពោះព្រះយេហូវ៉ា»។
ក្នុងព្រះវិហាររបស់ស្តេចសាឡូម៉ូនបន្ទាប់ពីស្តេចសាឡូម៉ូនបានកសាងព្រះវិហារចប់សព្វគ្រប់ហើយ ទ្រង់ប្រមូលពួកចាស់ទុំនៃសាសន៍អ៊ីស្រាអែល និងពួកអ្នកដែលជាមេលើអំបូរទាំងប៉ុន្មាន ហើយពួកអ្នកដែលជាកំពូលលើវង្សានុវង្សនៃពួកកូនចៅអ៊ីស្រាអែលទាំងអស់ ដើម្បីនឹងនាំយកហឹបនៃសេចក្តីសញ្ញាផងព្រះយេហូវ៉ា ពីក្រុងដាវីឌឡើងមក។ មនុស្សទាំងអស់នេះបានញែកខ្លួនគេនៅចំពោះព្រះ ដោយភាពបរិសុទ្ធថ្លៃថ្នូរនិងការគោរពដ៏ជ្រាលជ្រៅ បានរួមដំណើរជាមួយពួកសង្ឃដែលបានសែងហឹបរបស់ព្រះ។ «គេនាំយកហឹបនៃព្រះយេហូវ៉ា ព្រមទាំងត្រសាលនៃក្រុមជំនុំនិងគ្រឿងប្រដាប់បរិសុទ្ធទាំងប៉ុន្មាន ដែលនៅក្នុងត្រសាលឡើងមកផង រួចស្តេចសាឡូម៉ូននិងពួកជំនុំសាសន៍អ៊ីស្រាអែលទាំងអស់ដែលបានប្រជុំគ្នាមកឯទ្រង់ គេទៅជាមួយនឹងទ្រង់ នៅត្រង់មុខហឹបកំពុងតែបូជាថ្វាយចៀម និងគោយ៉ាងសន្ធឹកដែលនឹងរាប់ចំនួនមិនអស់ឡើយ»។
ស្តេចសាឡូម៉ូនបានដើរតាមគំរូរបស់ស្តេចដាវីឌជាបិតាទ្រង់។ គឺទ្រង់បានថ្វាយតង្វាយយញ្ញបូជាដល់ព្រះ រៀងរាល់៦ជំហាន (ប្រាំមួយម៉ែត្រ)។ ជាមួយនឹងការច្រៀង ការប្រគំតន្ត្រី និងការប្រារឰពិធីដ៏អធិកអធម «រួចពួកសង្ឃក៏សែងហឹបនៃសេចក្តីសញ្ញាផងព្រះយេហូវ៉ាចូលទៅតម្កល់ទុកនៅកន្លែងដែលបំរុងទុកឱ្យ គឺនៅទីទទួលព្រះបន្ទូលជាទីបរិសុទ្ធបំផុត ត្រង់ក្រោមស្លាបនៃចេរូប៊ីន ក្នុងព្រះវិហារ ដ្បិតចេរូប៊ីនទាំងពីរត្រដាងស្លាបពីលើកន្លែងដែលតម្កល់ទុកហឹបនោះ ចេរូប៊ីនក៏គ្របនៅពីលើហឹបនិងឈើស្នែងរបស់ហឹបផង»។
អំណានព្រះគម្ពីរពេលល្ងាច៖ សាំយូអែលទី២ ៦:១២-១៩
ខចងចាំ៖ ឥឡូវនេះ ភ្នែកអញនឹងនៅតែបើក ហើយត្រចៀកអញ នឹងនៅតែផ្ទៀងស្តាប់សេចក្តី ដែលគេអធិស្ឋាននៅទីនេះ ។ របាក្សត្រទី២ ៧:១៥
