ថ្ងៃអាទិត្យ ទី០១ ខែឧសភា ឆ្នាំ២០២២
អំណានព្រះគម្ពីរពេលព្រឹក៖ នេះគឺអញបានជាន់ក្នុងធុងទំពាំងបាយជូរតែម្នាក់ឯង ឥតមានអ្នកណាក្នុងពួកជនជាតិទាំងឡាយនៅជាមួយនឹងអញឡើយ អើ អញបានជាន់គេដោយសេចក្តីកំហឹង ហើយបានឈ្លីគេដោយសេចក្តីឃោរឃៅរបស់អញ ឈាមគេបានខ្ទាតមកលើសំលៀកបំពាក់របស់អញ សំលៀកបំពាក់អញបានត្រូវប្រឡាក់ទាំងអស់ហើយ។ អេសាយ ៦៣:៣
អំណានប្រចាំថ្ងៃ ចូរឲ្យនឹកចាំ
ក្រោយពីគេបានបោះដែកគោលព្រះយេស៊ូវជាប់នឹងឈើឆ្កាងមក មនុស្សដែលមានកម្លាំងខ្លាំងមួយចំនួនបាន លើកឈើឆ្កាងនោះឡើង ហើយរុញទៅក្នុងរណ្តៅដែលគេរៀបចំទុកយ៉ាងឃោរឃៅ ធ្វើឱ្យមុខរបួសកាន់តែឈឺចាប់ដល់ព្រះរាជបុត្រារបស់ព្រះ។ ហើយឥឡូវនេះគេបានបង្ហាញទស្សនីយភាពដ៏គួរឱ្យរន្ធត់នេះ។ ពួកសង្ឃពួកអ្នកដឹកនាំ និងពួកអាចារ្យបានបំភ្លេចការងារដ៏ពិសេសរបស់គេ ហើយមកចូលរួមជាមួយនឹងមនុស្សថោកទាបក្នុងការចំអកមើលងាយដល់ព្រះរាជបុត្រារបស់ព្រះដែលហៀបនឹងសុគត ដោយនិយាយថា «បើឯងជាស្តេចសាសន៍យូដាមែន ចូរជួយសង្គ្រោះខ្លួនចុះ!» (លូកា ២៣:៣៧)។ ហើយអ្នកខ្លះទៀតបានថាតាមដោយចំអកមើលងាយថា «វាជួយសង្គ្រោះដល់មនុស្សឯទៀតបាន តែពុំអាចនឹងសង្គ្រោះចំពោះខ្លួនឯងបានទេ» (ម៉ាកុស ១៥:៣១)។ អ្នកមានមុខតំណែងនៅក្នុងព្រះវិហារ ពួកទាហានដែលមានចិត្តរឹង ចោរដ៏ថោកទាបនៅលើឈើឆ្កាង ហើយនិងអ្នកឃោរឃៅនៅក្នុងហ្វូងមនុស្សទាំងអស់នេះបានរួបរួមគ្នាដើម្បីរំលោភបំពានដល់ព្រះគ្រីស្ទ។ ចោរពីរនាក់ដែលគេបានឆ្កាងនៅជាមួយនឹងព្រះយេស៊ូវមានការឈឺចាប់ខាងរាងកាយជាខ្លាំង ដោយសារការធ្វើទារុណកម្មនេះ ប៉ុន្តែចោរម្នាក់ត្រូវបានបំបែកចេញ ដោយចិត្តរឹងនិងការបដិសេធន៍ ព្រមទាំងរឹងទទឹងដោយការឈឺចាប់របស់វា។
វាបានយកការចំអកមើលងាយរបស់ពួកសង្ឃ មកតិះដៀលដល់ព្រះយេស៊ូវ ដោយនិយាយថា «បើឯងជាព្រះគ្រីស្ទពិត នោះចូរជួយសង្គ្រោះខ្លួនឯង ហើយនិងយើងផង» (លូកា ២៣:៣៩)។ ចំណែកចោរម្នាក់ផ្សេងទៀត មិនមែនជាឧក្រិដ្ឋជនដែលមានចិត្តរឹងទេ។ នៅពេលដែលវាបានឮពាក្យមើលងាយរបស់ចោរគ្នាវាដែលជាអ្នកមានទោសឧក្រិដ្ឋដូច្នោះ ក៏ «ឆ្លើយបន្ទោសវាថា តើឯងមិនខ្លាចព្រះទេឬអី? ដ្បិតឯងក៏ជាប់ទោសដូចគ្នា។ គេធ្វើទោសយើងត្រូវហើយ ដ្បិតយើងត្រូវទោសចំពោះការដែលយើងបានប្រព្រឹត្ត ប៉ុន្តែ ព្រះអង្គនេះមិនបានធ្វើខុសអ្វីសោះ» (លូកា ២៣:៤០, ៤១)។ បន្ទាប់មក នៅពេលដែល ចិត្តរបស់វាបានចេញទៅឯព្រះគ្រីស្ទ ពន្លឺនៃស្ថានសួគ៌បានរះឡើងព្រោងព្រាតនៅក្នុងចិត្តវា។ នៅក្នុងព្រះយេស៊ូវ ដែលមានស្នាមជាំ និងត្រូវគេចំអកមើលងាយ ដែលគេព្យួរនៅលើឈើឆ្កាង វាបានឃើញព្រះអង្គសង្គ្រោះរបស់វា ជាសេចក្តីសង្ឃឹមតែមួយគត់ ហើយវាបានស្រែកទៅរកទ្រង់ ដោយសេចក្តីជំនឿយ៉ាងបន្ទាបខ្លួនថាៈ «ព្រះអម្ចាស់អើយ! កាលណាចូលទៅក្នុងនគរទ្រង់ សូមនឹកចាំពីទូលបង្គំផង។ ព្រះយេស៊ូវមានបន្ទូលទៅថា ខ្ញុំប្រាប់អ្នកជាប្រាកដថា ថ្ងៃនេះ អ្នកនឹងនៅក្នុងស្ថានបរមសុខជាមួយនឹងខ្ញុំដែរ» (លូកា ២៣:៤៣)។
អំណានព្រះគម្ពីរពេលល្ងាច៖ ម៉ាថាយ ជំពូក ២៣:៣៥-៤៣
ខចងចាំ៖ តែទ្រង់ត្រូវរបួស ដោយព្រោះអំពើរំលងរបស់យើង ក៏ត្រូវវាយជាំ ដោយព្រោះអំពើទុច្ចរិតរបស់យើងទេ ឯការវាយផ្ចាលដែលនាំឲ្យយើងបានជាមេត្រី នោះបានធ្លាក់ទៅលើទ្រង់ ហើយយើងរាល់គ្នាបានប្រោសឲ្យជា ដោយសារស្នាមរំពាត់នៅអង្គទ្រង់។ អេសាយ ៥៣:៥
