ថ្ងៃពុធ ទី១១ ខែឧសភា ឆ្នាំ២០២២
អំណានព្រះគម្ពីរពេលព្រឹក៖ ដែលទ្រង់បានជួយសង្គ្រោះយើង ហើយបានហៅយើងមកក្នុងការងារបរិសុទ្ធ មិនមែនដោយការដែលយើងធ្វើទេ គឺដោយដំរិះ និងព្រះគុណនៃទ្រង់វិញ ដែលបានផ្តល់មកយើងក្នុងព្រះគ្រីស្ទយេស៊ូវ មុនអស់ទាំងកល្ប តែឥឡូវនេះ ទើបនឹងសំដែងមក ដោយដំណើរព្រះយេស៊ូវគ្រីស្ទ ជាព្រះអង្គសង្គ្រោះនៃយើង ទ្រង់លេចមក ដែលទ្រង់បានបំផ្លាញសេចក្តីស្លាប់ ហើយបានយកជីវិត និងសេចក្តីមិនចេះស្លាប់មកដាក់នៅពន្លឺ ដោយសារដំណឹងល្អវិញ។ ធីម៉ូថេទី២ ១:៩-១០
អំណានប្រចាំថ្ងៃ ផលផ្លែដំបូងនៃការប្រោសលោះ
ផលផ្លែដំបូងនៃការប្រោសលោះ នៅពេលព្រះយេស៊ូវត្រូវបានព្យួរនៅលើឈើឆ្កាង ទ្រង់បានស្រែកថា «ការស្រេចហើយ» ផ្នូរបើកចេញពីគ្នា ផែនដីរញ្ជួយ ហើយមានផ្នូរជាច្រើនបានបើកឡើង។ ដ្បិតនៅពេលដែលព្រះយេស៊ូវមានព្រះជន្មរស់ពីសុគតឡើងវិញ ហើយមានជ័យជំនះលើសេចក្តីស្លាប់ នៅពេលដែលព្រះអង្គបានយាងចេញពីផ្នូរ ជាអ្នកមានជោគជ័យ នៅពេលដែលផែនដីឃ្លេងឃ្លោងនិងរញ្ជួយ ហើយសិរីល្អដ៏អស្ចារ្យនៃស្ថានសួគ៌ចាំងមកលើកន្លែងដ៏ពិសិដ្ឋនោះ អ្នកសុចរិតជាច្រើន ដែលបានស្លាប់ទៅហើយ ហើយបានគោរពតាមការត្រាស់ហៅរបស់ទ្រង់បានរស់ឡើងវិញ ជាទីបន្ទាល់ថា ទ្រង់មានព្រះជន្មរស់ឡើងវិញមែន។ ពួកអ្នកបរិសុទ្ធជាទីស្រឡាញ់ដែលបានរស់ឡើងវិញនោះ បានចោមរោមសរសើរតម្កើងទ្រង់។ ពួកគេជាអ្នកជ្រើសតាំងនិងជាមនុស្សបរិសុទ្ធនៅគ្រប់សម័យកាល តាំងពីសម័យបង្កបង្កើតលោក រហូតដល់សម័យព្រះគ្រីស្ទ។ ហើយនៅពេលដែលពួកអ្នកដឹកនាំសាសន៍យូដាបានខំប្រឹងប្រែងលាក់បាំងការមានព្រះជន្មរស់ឡើងវិញរបស់ព្រះគ្រីស្ទ ព្រះអម្ចាស់បានជ្រើសរើសនាំមនុស្សមួយក្រុមចេញពីផ្នូរ ដើម្បីបញ្ជាក់ថា ព្រះយេស៊ូវបានមានព្រះជន្មរស់ឡើងវិញពិតប្រាកដមែននិងដើម្បីប្រកាសពីសិរីល្អរបស់ទ្រង់។
អ្នកដែលបានរស់ឡើងវិញមានរូបរាងនិងទ្រង់ទ្រាយខុសៗគ្នា។ ខ្ញុំត្រូវបានគេប្រាប់ថា អ្នកដែលរស់នៅលើផែនដីត្រូវបានផ្លាស់ប្តូរ ដោយបាត់បង់កម្លាំងនិងភាពស្រស់របស់ខ្លួន។ សាតាំងមានអំណាចធ្វើឱ្យមានជំងឺនិងស្លាប់ ហើយនៅគ្រប់សម័យកាលឥទ្ធិពលនៃបណ្តាសារបស់វា ត្រូវបានគេមើលឃើញកាន់តែច្បាស់ ហើយអំណាចរបស់សាតាំងក៏បានឃើញកាន់តែច្បាស់ដែរ។ អ្នកដែលបានរស់នៅជំនាន់លោកណូអេនិងអ័ប្រាហាំមានទ្រង់ទ្រាយដូចទេវតា ទាំងសម្រស់ និងកម្លាំង។ ប៉ុន្តែ គ្រប់ជំនាន់មនុស្សកាន់តែចុះខ្សោយទៅៗ ហើយមានជំងឺកាន់តែច្រើនឡើង និងមានអាយុកាន់តែខ្លី។ សាតាំងបានដឹងអំពីរបៀបបំផ្លាញមនុស្ស និងធ្វើឱ្យពូជមនុស្សចុះទន់ខ្សោយ។
អ្នកដែលបានរស់បន្ទាប់ពីការមានព្រះជន្មរស់ឡើងវិញរបស់ព្រះយេស៊ូវបានលេចឡើង នៅចំពោះមនុស្សជាច្រើន ដោយប្រាប់ពួកគេថាការលះបង់សម្រាប់មនុស្សបានសម្រេចហើយ ដ្បិតព្រះយេស៊ូវដែលពួកយូដាបានឆ្កាងនោះ បានមានព្រះជន្មរស់ពីសុគតឡើងវិញហើយ ដើម្បីជាភស្តុតាងពីព្រះបន្ទូលដែលទ្រង់បានប្រកាសថា «យើងត្រូវបានប្រោសឱ្យរស់ឡើងវិញជាមួយទ្រង់»។ គេបានផ្តល់ទីសំគាល់ថា ដោយសារតែអំណាចដ៏មានព្រះចេស្តារបស់ទ្រង់ ពួកគេត្រូវបានហៅចេញពីផ្នូរ។ ទោះបីជារបាយការណ៍កុហកនោះត្រូវបានឮសុសសាយក៏ដោយ ក៏រឿងនោះមិនអាចបិទបាំងដោយសាតាំងនិងទេវតារបស់វា ឬពួកសម្តេចសង្ឃបានឡើយ ដ្បិតពួកមនុស្សបរិសុទ្ធដែលទ្រង់បាននាំចេញពីផ្នូរបានផ្សព្វផ្សាយដំណឹងអស្ចារ្យដ៏មានអំណរ ឮសុសសាយ ហើយព្រះយេស៊ូវក៏បានបង្ហាញអង្គទ្រង់ដល់ពួកសាវកដែលកំពុងក្រៀមក្រំ និងមានចិត្តខ្ទេចខ្ទាំ ដោយបំបាត់ការភ័យខ្លាចរបស់គេ ហើយធ្វើឱ្យគេមានអំណររីករាយឡើងវិញផងដែរ។
អំណានព្រះគម្ពីរពេលល្ងាច៖ ម៉ាថាយ ជំពូក ២៧:៤៥-៥៦
ខចងចាំ៖ តែឯព្រះ ទ្រង់សំដែងសេចក្តីស្រឡាញ់របស់ទ្រង់ ដល់យើងរាល់គ្នាឲ្យឃើញច្បាស់ ដោយព្រះគ្រីស្ទបានសុគតជំនួសយើងរាល់គ្នា នោះគឺក្នុងកាលដែលយើងនៅមានបាបនៅឡើយផង។ រ៉ូម ៥:៨
