ថ្ងៃព្រហស្បតិ៍ ទី១២ ខែឧសភា ឆ្នាំ២០២២
អំណានព្រះគម្ពីរពេលព្រឹក៖ តែអ្នកនោះនិយាយថា កុំឲ្យភ័យឡើយ អ្នករាល់គ្នាមករកព្រះយេស៊ូវ ពីណាសារ៉ែត ដែលត្រូវឆ្កាង ទ្រង់មានព្រះជន្មរស់ឡើងវិញហើយ ទ្រង់មិនគង់នៅទីនេះទេ មើល នេះជាកន្លែងដែលគេបានផ្តេកព្រះសពទ្រង់។ ម៉ាកុស ជំពួក ១៦:៦
អំណានប្រចាំថ្ងៃ ពួកសិស្សស្រីៗនៅផ្នូរ
ពួកសិស្សស្រីៗនៅឯផ្នូរព្រលឹមស្រាងៗ ក្នុងថ្ងៃទីមួយនៃសប្តាហ៍ ពេលព្រះអាទិត្យមិនទាន់បញ្ចេញពន្លឺនៅឡើយពួកស្ត្រីៗបរិសុទ្ធបានទៅឯផ្នូរ នាំយកគ្រឿងក្រអូបជាច្រើន ដើម្បីចាក់លើព្រះសពព្រះយេស៊ូវ។ ពួកគេបានរកឃើញថាដុំថ្មដ៏ធ្ងន់ត្រូវបានប្រមៀលចេញពីមាត់ផ្នូរ ហើយព្រះសពរបស់ព្រះយេស៊ូវមិនបាននៅទីនោះទេ។ គេមានចិត្តរន្ធត់ហើយបារម្ភក្រែងពួកសត្រូវរបស់គេបានយកព្រះសពទ្រង់ទៅបាត់។ បន្ទាប់មក ពួកគេបានឃើញទេវតាពីរអង្គមានសំលៀកបំពាក់សស្គុស មុខរបស់លោកទាំងពីរមានពន្លឺភ្លឺចែងចាំង។ ទេវតានៃស្ថានសួគ៌នេះបានដឹងពីភារកិច្ចរបស់ពួកស្ត្រីទាំងនោះ ហើយលោកបានប្រាប់ពួកគេភ្លាមថា ព្រះយេស៊ូវទ្រង់មិនគង់នៅទីនោះទេ ទ្រង់បានរស់ឡើងវិញហើយ ហើយពួកគេបានឃើញកន្លែងដែលបានដាក់ព្រះសពទ្រង់។ ពួកទេវតាបានប្រាប់ឱ្យពួកនាងទៅប្រាប់ដល់ពួកសាវករបស់ទ្រង់ថា ទ្រង់នឹងយាងទៅស្រុកកាលីឡេមុនហើយ។ ពួកស្រីៗបានប្រញាប់ត្រឡប់ទៅរកពួកសាវកដែលកំពុងតែមានទុក្ខព្រួយវិញ ដោយភ័យខ្លាច និងអំណរយ៉ាងក្រៃលែង ហើយបានប្រាប់ពួកគេនូវអ្វីដែលពួកគេបានឃើញនិងបានឮ។
ពួកសាវកមិនអាចជឿថាព្រះគ្រីស្ទមានព្រះជន្មរស់ឡើងវិញទេ ប៉ុន្តែ ពួកគេបានរត់យ៉ាងលឿន សំដៅទៅផ្នូរ ជាមួយពួកស្រីៗដែលបាននាំដំណឹងនោះមកប្រាប់គេ។ ពួកគេមិនបានឃើញព្រះយេស៊ូវនៅកន្លែងនោះទេ ពួកគេបានឃើញសំពត់ទេសឯកដែលរុំព្រះសពទ្រង់ ប៉ុន្តែ គេមិនអាចជឿនូវដំណឹងល្អដែលថាទ្រង់មានព្រះជន្មរស់ពីសុគតឡើងវិញនោះឡើយ។ ពួកគេបានត្រឡប់ ទៅផ្ទះវិញ ដោយមានការអស្ចារ្យនឹងអ្វីដែលពួកគេបានឃើញនិងដំណឹងដែលពួកស្រីៗបាននាំមកប្រាប់គេនោះ។
តែនាងម៉ារាបានរារង់នៅជុំវិញផ្នូរ គិតអំពីការដែលនាងបានឃើញទាំងមានកង្វល់ ដោយស្មានថានាងត្រូវគេបញ្ឆោតទេ។ នាងបាននឹកឃើញថាទុក្ខកង្វល់ថ្មីមួយនេះបានរង់ចាំនាងទៀតហើយ។ ទុក្ខសោករបស់នាងក៏បានកើតឡើងសារជាថ្មី ហើយនាងបានយំសោកយ៉ាងឈឺចាប់ក្រៃលែង។ នាងបានចូលទៅមើលផ្នូរម្តងទៀត ហើយបានឃើញទេវតាពីរអង្គដែលមានសំលៀកបំពាក់ស។ ទេវតាមួយអង្គគង់នៅត្រង់កន្លែងដែលគេបានផ្តេកព្រះសិរព្រះយេស៊ូវ ហើយមួយអង្គទៀត គង់នៅត្រង់កន្លែងព្រះបាទនៃព្រះសពរបស់ទ្រង់។ ទេវតាបានមានបន្ទូលសួរនាងដោយស្រទន់ថា តើហេតុអ្វីបានជានាងយំ។ នាងឆ្លើយតបថា «លោកនាយអើយ គេបានយកព្រះអម្ចាស់របស់ខ្ញុំទៅណាបាត់ហើយ ហើយខ្ញុំមិនដឹងថាគេទុកទ្រង់នៅទីណាទេ» យ៉ូហាន ២០:១៣។
អំណានព្រះគម្ពីរពេលល្ងាច៖ លូកា ជំពូក ២៤:១-១២
ខចងចាំ៖ តែឯព្រះ ទ្រង់សំដែងសេចក្តីស្រឡាញ់របស់ទ្រង់ ដល់យើងរាល់គ្នាឲ្យឃើញច្បាស់ ដោយព្រះគ្រីស្ទបានសុគតជំនួសយើងរាល់គ្នា នោះគឺក្នុងកាលដែលយើងនៅមានបាបនៅឡើយផង។ រ៉ូម ៥:៨
