ថ្ងៃសុក្រ ទី២០ ខែឧសភា ឆ្នាំ២០២២
អំណានព្រះគម្ពីរពេលព្រឹក៖ នោះខ្ញុំនឹងទូលសូមដល់ព្រះវរបិតា ហើយទ្រង់នឹងប្រទានព្រះដ៏ជាជំនួយ១អង្គទៀត មកអ្នករាល់គ្នា ឲ្យបានគង់នៅជាមួយ នៅអស់កល្បរៀងទៅ។ យ៉ូហាន ១៤:១៦
អំណានប្រចាំថ្ងៃ ក្នុងអំណាចនៃបុណ្យថ្ងៃទី ៥០
សាសន៍យូដាត្រូវបានខ្ចាត់ខ្ចាយទៅនៅជាមួយមនុសុ្សសឹងតែគ្រប់ជាតិសាសន៍ ហើយបាននិយាយភាសាផ្សេងៗគ្នា។ ពួកគេបានរស់នៅឆ្ងាយពីទីក្រុងយេរូសាឡិម ហើយត្រូវបានតាំងទីលំនៅ នៅទីនោះបណ្តោះអាសន្ន ពេលនោះគេក៏នៅតែប្រារព្វធ្វើពិធីបុណ្យ្របចាំឆ្នាំខាងសាសនា និងនៅតែប្រតិបត្តិតាមតម្រូវការរបស់ពួកគេដដែល។ នៅពេលគេប្រជុំគ្នា ពួកគេនិយាយភាសាផ្សេងៗគ្នា។ ភាសាខុសគ្នាទាំងនេះហើយដែលជាឧបសគ្គដ៏ធំដល់ការងាររបស់អ្នកបំរើព្រះ ក្នុងការបោះពុម្ពផ្សាយគោលលទ្ធិរបស់ព្រះគ្រីស្ទ ទៅកាន់គ្រប់ទីកន្លែងទូទាំងពិភពលោក។ ហេតុនេះហើយបានជា ព្រះត្រូវតែបំពេញនូវភាពខ្វះខាតរបស់ពួកសាវក ដើម្បីធ្វើឱ្យមនុស្សទាំងឡាយយល់ថា ព្រះគ្រីស្ទគឺជាព្រះមែស្ស៊ីពិតប្រាកដមែន។ ព្រះវិញ្ញាណបរិសុទ្ធបានធ្វើសម្រេចការយ៉ាងធំដល់ពួកគេ ដែលគេមិនអាចធ្វើខ្លួនឯងបាននៅក្នុង១ជីវិតរបស់គេ ឥឡូវនេះពួកគេអាចចែកចាយនូវសេចក្តីពិតនៃដំណឹងល្អ នៅក្រៅស្រុករបស់ខ្លួន ដោយនិយាយភាសានោះ យ៉ាងច្បាស់មិនរដិបរដុប ដល់អ្នកទាំងឡាយដែលពួកគេកំពុងតែធ្វើការផ្សព្វផ្សាយ។ អំណោយទានដ៏អស្ចារ្យនេះ គឺជាភស្តុតាងដ៏ធំបំផុត ដែលពួកគេអាចបង្ហាញដល់ពិភពលោកថាបេសកកម្មរបស់ពួកគេ គឺជាការងារនៃស្ថានសួគ៌។
«រីឯនៅក្រុងយេរូសាឡិមមានពួកសាសន៍យូដា ជាអ្នកកោតខ្លាចដល់ព្រះដែលមកពីគ្រប់ នគរនៅក្រោមមេឃ កាលសូរស័ព្ទពីការនោះឮសុសសាយទៅ នោះបណ្តាមនុស្សក៏ប្រជុំគ្នា ហើយគេមានសេចក្តីស្រឡាំងកាំងដោយគ្រប់គ្នាឮភាសាជាតិរបស់ខ្លួន ដែលពួកសាវកកំពុងអធិប្បាយ គេមានសេចក្តីអស្ចារ្យក្នុងចិត្ត ហើយនិយាយគ្នាទៅវិញទៅមក ដោយឆ្ងល់ថា អ្នកទាំងនេះដែលអធិប្បាយ តើមិនមែនជាពួកអ្នកស្រុកកាលីឡេទាំងអស់គ្នាទេឬអី? ចុះដូចម្តេចបានជាយើងឮគេនិយាយតាមភាសាកំណើតរបស់យើងរៀងខ្លួនដូច្នេះ?»
ពួកសង្គ្រាជនិងពួកអ្នកគ្រប់គ្រងបានខឹងយ៉ាងខ្លាំង ចំពោះការបង្ហាញដ៏អស្ចារ្យគួរឱ្យស្ញប់ស្ញែង ដែលត្រូវបានផ្សព្វផ្សាយពាសពេញទីក្រុងយេរូសាឡិម ហើយនិងក្រុងដែលនៅជិតៗនោះ ប៉ុន្តែ ពួកគេមិនហ៊ានធ្វើការព្យាបាទណាមួយដល់ពួកសាវកទេ ដ្បិតខ្លាចក្រែងធ្វើឱ្យពួកបណ្តាជនស្អប់ខ្ពើមដល់ពួកគេ។ ពួកគេបានសម្លាប់លោកគ្រូរបស់គេ ប៉ុន្តែ នៅទីនេះអ្នកបំរើរបស់ទ្រង់ជាមនុស្សដែលមិនបានរៀនសូត្រ ជាអ្នកស្រុកកាលីឡេកំពុងរ៉ាយរ៉ាប់ប្រាប់នូវការសម្រេចបទទំនាយយ៉ាងពេញលេញ និងកំពុងបង្រៀនពីគោលលទ្ធិនៃព្រះយេស៊ូវ នៅគ្រប់ទាំងភាសាដែលពួកគេនិយាយនៅពេលនេះ។ ពួកគេបាននិយាយដោយអំណាច អំពីការងារដ៏អស្ចារ្យរបស់ព្រះអង្គសង្គ្រោះ ហើយពួកគេលាតត្រដាងរឿងប្រាប់ដល់អ្នកស្តាប់ទាំងឡាយនូវផែនការនៃសេចក្តីសង្គ្រោះ នៅក្នុងក្តីមេត្តាករុណាហើយនិងការលះបង់នៃព្រះរាជបុត្រារបស់ព្រះ។ ពាក្យសំដីរបស់ពួកសាវកបានធ្វើឱ្យមនុស្សរាប់ពាន់នាក់ដែលបានស្តាប់ភ្ញាក់រឭក ហើយកែប្រែចិត្ត។ ប្រពៃណីនិងជំនឿឆ្វេងនិយម ដែលពួកសង្គ្រាជបានបណ្តុះបណ្តាលត្រូវបានលុបបំបាត់ចេញពីគំនិតរបស់ពួកគេ ហើយពួកគេបានទទួលយកនូវការបង្រៀនដ៏បរិសុទ្ធនៃព្រះបន្ទូលរបស់ព្រះ។
អំណានព្រះគម្ពីរពេលល្ងាច៖ កិច្ចការ ជំពូក ២:៥-១៣
ខចងចាំ៖ កុំឲ្យចិត្តអ្នករាល់គ្នាថប់បារម្ភឡើយ អ្នករាល់គ្នាជឿដល់ព្រះហើយ ចូរជឿដល់ខ្ញុំដែរ នៅក្នុងដំណាក់នៃព្រះវរបិតាខ្ញុំ មានទីលំនៅជាច្រើន ពុំនោះ ខ្ញុំបានប្រាប់អ្នករាល់គ្នាហើយ ខ្ញុំទៅរៀបកន្លែងឲ្យអ្នករាល់គ្នា បើខ្ញុំទៅរៀបកន្លែងឲ្យអ្នករាល់គ្នា នោះខ្ញុំនឹងត្រឡប់មកវិញ នឹងទទួលអ្នករាល់គ្នាទៅឯខ្ញុំ ប្រយោជន៍ឲ្យអ្នករាល់គ្នាបាននៅកន្លែងដែលខ្ញុំនៅនោះដែរ ។ យ៉ូហាន ១៤:១-៣
