ថ្ងៃអង្គារ ទី២៤ ខែឧសភា ឆ្នាំ២០២២
(ជំពូកនេះមានមូលដ្ឋាននៅក្នុងគម្ពីរកិច្ចការ ជំពូកទី ៣ និងទី ៤)
អំណានព្រះគម្ពីរពេលព្រឹក៖ ដ្បិតអ្នករាល់គ្នាបានស្គាល់ព្រះគុណនៃព្រះយេស៊ូវគ្រីស្ទ ជាព្រះអម្ចាស់នៃយើងរាល់គ្នាហើយ ថាទោះបើទ្រង់ជាសេដ្ឋីក៏ដោយ គង់តែទ្រង់បានត្រឡប់ជាក្រ ដោយព្រោះអ្នករាល់គ្នា ដើម្បីឲ្យអ្នករាល់គ្នាបានមានឡើង ដោយសារសេចក្តីកម្ររបស់ទ្រង់។ កូរិនថូសទី២ ៨:៩
អំណានប្រចាំថ្ងៃ
មិនយូរប៉ុន្មាន ក្រោយពីការយាងមកសណ្ឋិតរបស់ព្រះវិញ្ញាណបរិសុទ្ធ និងក្រោយពីការប្រជុំអធិស្ឋានយ៉ាងខ្ជាប់ខ្ជួនមក នោះលោកពេត្រុសនិងលោកយ៉ូហានបានទៅចូលរួមថ្វាយបង្គំព្រះនៅឯព្រះវិហារមួយនៅទីនោះគាត់បានឃើញបុរសម្នាក់ដែលបានរងទុក្ខដោយពិការភាព អស់រយៈពេល ៤០ឆ្នាំ ហើយលោកទាំងពីរក៏មានចិត្តក្តួលអាណិតដល់បុរសម្នាក់នេះយ៉ាងខ្លាំង។ បុរសម្នាក់នេះ មានបំណងចង់ទៅរកព្រះយេស៊ូវដើម្បីឱ្យទ្រង់ព្យាបាលគាត់ ឱ្យរួចពីភាពពិការនេះដែរ តែគាត់មិនអាចទៅបាន ព្រោះគ្មានអ្នកណាជួយយកគាត់ទៅ ទីបំផុត គាត់បានត្រឹមតែសូមឱ្យគេជួយសែងគាត់មកដាក់នៅមាត់ទ្វារព្រះវិហារតែប៉ុណ្ណោះ។ ប៉ុន្តែ ជាអកុសលនៅពេលដែលគាត់បានមកដល់ក្រុងយេរូសាឡិម នោះគាត់បានដឹងថាព្រះដែលជាគ្រូពេទ្យ ដែលជាសេចក្តីសង្ឃឹមតែមួយគត់របស់គាត់ ដែលនឹងអាចព្យាបាលភាពពិការរបស់គាត់បាននោះត្រូវគេធ្វើគុតយ៉ាងព្រៃផ្សៃជាទីបំផុតទៅហើយ។
ការអស់សង្ឃឹមរបស់គាត់បានធ្វើឱ្យអ្នកដែលដឹងពីសេចក្តីសង្ឃឹម និងរំពឹងអំពីការព្យាបាលរបស់ព្រះយេស៊ូវដល់គាត់ កាន់តែមានចិត្តក្តួលអាណិតដល់គាត់ ហើយគេក៏បានជួយសែងគាត់មកដាក់នៅមាត់ទ្វារព្រះវិហារ ដើម្បីឱ្យគេបានដាក់ទានដល់គាត់។ នៅពេលដែលលោកពេត្រុស ហើយនិងយ៉ូហានបានធ្វើដំណើរកាត់ទីនោះ បុរសពិការនេះក៏បានសូមទានពីលោកទាំងពីរ។ សាវកទាំងពីរបានមើលទៅគាត់ដោយសេចក្តីអាណិតអាសូរ «តែពេត្រុសព្រមទាំងយ៉ូហានក៏សម្លឹងមើលទៅគាត់ប្រាប់ថា «ចូរមើលមកយើងឯណេះ!» «ឯប្រាក់ ហើយនិងមាស ខ្ញុំគ្មានទេ តែរបស់ដែលខ្ញុំមាននោះ ខ្ញុំនឹងឱ្យដល់អ្នក គឺដោយសារ ព្រះនាមព្រះយេស៊ូវគ្រីស្ទ ពីស្រុកណាសារ៉ែត ចូរអ្នកក្រោកឡើងដើរទៅចុះ»។
នៅពេលដែលលោកពេត្រុសបានមានប្រសាសន៍ថាគ្មានប្រាក់ហើយនិងមាសទេនោះ បុរសពិការដ៏កំសត់នោះបានធ្លាក់ទឹកមុខ ប៉ុន្តែគាត់មានទឹកមុខភ្លឺថ្លាប្រកបដោយក្តីសង្ឃឹមឡើងវិញ នៅពេលដែលសាវកពេត្រុសមានប្រសាសន៍បន្តទៅទៀត។ «រួចក៏ចាប់ដៃស្តាំលើកគាត់ឡើង ស្រាប់តែប្រអប់ជើងនិងភ្នែកគោរបស់គាត់មានកម្លាំងឡើងភ្លាម គាត់ក៏ស្ទុះឈរឡើង ដើរទៅមក ហើយចូលទៅក្នុងព្រះវិហារជាមួយនឹងអ្នកទាំង២នោះ ទាំងដើរ ទាំងលោត ទាំងសរសើរដល់ព្រះផង បណ្តាជនទាំងអស់គ្នាក៏ឃើញគាត់ដើរ ទាំងសរសើរព្រះដូច្នោះ ហើយគេស្គាល់គាត់ថាជាអ្នកដែលតែងតែអង្គុយសូមទានគេ នៅត្រង់មាត់ទ្វារលំអរបស់ព្រះវិហារ នោះគេក៏មានពេញជាសេចក្តីអស្ចារ្យ ហើយមមីងមមាំងពីការដែលកើតមកនោះ។
អំណានព្រះគម្ពីរពេលល្ងាច៖ កិច្ចការ ជំពូក ៣:១-១០
ខចងចាំ៖ ប៉ុន្តែ កាលណាព្រះវិញ្ញាណបរិសុទ្ធបានមកសណ្ឋិតលើអ្នករាល់គ្នា នោះអ្នករាល់គ្នានឹងបានព្រះចេស្តា ហើយនិងធ្វើជាទីបន្ទាល់ពីខ្ញុំ នៅក្រុងយេរូសាឡិម ព្រមទាំងស្រុកយូដា និងស្រុកសាម៉ារីទាំងមូល ហើយរហូតដល់ចុងផែនដីបំផុតផង ។ កិច្ចការ ១:៨
