ថ្ងៃពុធ ទី២៥ ខែឧសភា ឆ្នាំ២០២២
អំណានព្រះគម្ពីរពេលព្រឹក៖ ទីសំគាល់ទាំងនេះនឹងជាប់តាមអស់អ្នកដែលជឿ គឺថា គេនឹងដេញអារក្សដោយនូវឈ្មោះខ្ញុំ ហើយនិងចេះនិយាយភាសាថ្មី និងចាប់កាន់ពស់បាន ឬបើគេផឹកអ្វីពុល នោះមិនធ្វើឲ្យអន្តរាយទេ ហើយគេនឹងដាក់ដៃលើមនុស្សជំងឺឲ្យបានជាផង។ ម៉ាកុស ១៦:១៧-១៨
អំណានប្រចាំថ្ងៃ នៅក្នុងព្រះនាមនៃព្រះយេស៊ូវ
ពួកសាសន៍យូដាមានការភ្ញាក់ផ្អើលជាខ្លាំង ដោយឃើញសាវករបស់ព្រះយេស៊ូវអាចធ្វើការអស្ចារ្យដូចជាទ្រង់ដែរ។ នៅពេលដែលព្រះយេស៊ូវសុគត ពួកសាសន៍យូដាបានរំពឹងថាការអស្ចារ្យ ទាំងឡាយដែលទ្រង់បានធ្វើនឹងត្រូវបានបញ្ចប់ជាមួយនឹងការសុគតរបស់ទ្រង់ជាមិនខាន។ ប៉ុន្តែនៅថ្ងៃនេះពួកគេបានឃើញបុរសពិការម្នាក់ ដែលមិនអាចជួយខ្លួនឯងបានអស់រយៈពេល ៤០ ឆ្នាំមកហើយ កំពុងតែលោត ច្រៀង ដោយអំណរ ដោយគាត់បានរួចពីការឈឺចាប់ ហើយមានជំនឿយ៉ាងមុតមាំទៅលើព្រះយេស៊ូវថែមទៀតផង។
នៅពេលដែលលោកទាំងពីរបានឃើញថាហ្វូងមនុស្សមានការភ្ញាក់ផ្អើល ហើយមានការអស្ចារ្យនោះ លោកក៏បានមានប្រសាសន៍ទៅគេថា «ហេតុអ្វីបានជាអ្នករាល់គ្នាមានការអស្ចារ្យ ហើយភ្ញាក់ផ្អើលពីការទាំងនេះ ព្រមទាំងគិតថា យើងជាអ្នកដែលមានអំណាចក្នុងការធ្វើការនេះដូច្នោះ?»។ លោកពេត្រុសក៏បានបញ្ជាក់ប្រាប់ដល់ពួកគេថា ការទាំងនេះបានកើតឡើងតាមរយៈព្រះយេស៊ូវគ្រីស្ទពីស្រុកណាសារ៉ែតតែមួយអង្គប៉ុណ្ណោះ ហើយទ្រង់នេះហើយ ដែលត្រូវគេបដិសេធ មិនទទួលស្គាល់ ព្រមទាំងបានឆ្កាងទ្រង់ផង ប៉ុន្តែ ព្រះបានប្រោសឱ្យទ្រង់មានព្រះជន្មរស់ឡើងវិញនៅថ្ងៃទីបី។ «ហើយគឺដោយសារសេចក្តីជំនឿជឿដល់ព្រះនាមទ្រង់ នោះព្រះនាមទ្រង់បានប្រោសមនុស្សនេះ ដែលអ្នករាល់គ្នាឃើញ ហើយស្គាល់ឱ្យមានកម្លាំងឡើង គឺជាសេចក្តីជំនឿ ដែលកើតមកដោយសារព្រះអង្គនោះឯង បានធ្វើឱ្យគាត់ជាស្រឡះ នៅមុខអ្នករាល់គ្នាដូច្នេះ ឥឡូវនេះ បងប្អូនអើយ ខ្ញុំដឹងថាអ្នករាល់គ្នា ព្រមទាំងពួកនាហ្មឺននៃអ្នករាល់គ្នាបានប្រព្រឹត្តការនោះ ដោយមិនបានយល់ទេ ប៉ុន្តែ សេចក្តីដែលព្រះបានប្រកាសប្រាប់ជាមុន ដោយសារមាត់នៃអស់ទាំងហោរារបស់ទ្រង់ ពីដំណើរព្រះគ្រីស្ទថា ទ្រង់ត្រូវរងទុក្ខលំបាក នោះព្រះទ្រង់ក៏បានសម្រេចតាម យ៉ាងដូច្នោះឯង»។
ក្រោយពីការអស្ចារ្យនោះមក មានមនុស្សជាច្រើនបានប្រជ្រៀតគ្នាចូលទៅថ្វាយបង្គំព្រះ នៅក្នុងព្រះវិហារ ដូច្នេះ លោកពេត្រុសក៏បានអធិប្បាយនៅជ្រុងមួយ ហើយលោកយ៉ូហាន នៅជ្រុងមួយទៀត។ ពួកសាវកដែលកំពុងតែ អធិប្បាយអំពីបទឧក្រិដ្ឋរបស់ពួកយូដា ក្នុងការដែលពួកគេបានបដិសេធព្រះយេស៊ូវ ហើយបានធ្វើគុតទ្រង់នោះបាន អធិប្បាយយ៉ាងប្រុងប្រយត្ន័ជាទីបំផុត ដើម្បីមិនឱ្យមានការអាក់អន់ចិត្ត នឹងភាពអស់សង្ឃឹមកើតមានឡើងដល់ពួកយូដាឡើយ។ លោកពេត្រុសបានសម្រាលទោសកំហុសរបស់គេដោយមានប្រសាសន៍ថាអ្វីដែលពួកគេបានធ្វើនោះគឺពួកគេធ្វើដោយមិនដឹងខ្លួនទេ ហើយគាត់ក៏បានប្រកាសប្រាប់ដល់គេថា ព្រះវិញ្ញាណបរិសុទ្ធកំពុងតែត្រាស់ហៅពួកគេ ឱ្យលន់តួបាបរបស់គេ ហើយផ្លាស់ប្តូរជំនឿរបស់ពួកគេចេញ ព្រោះពួកគេគ្មានសេចក្តីសង្ឃឹមណាទៀត ក្រៅពីព្រះគ្រីស្ទយេស៊ូ ដែលពួកគេបានឆ្កាងនោះឡើយ។ មានតែសេចក្តីជំនឿទៅលើទ្រង់តែប៉ុណ្ណោះ ដែលអំពើបាបរបស់ពួកគេ អាចអត់ទោសឱ្យបាន តាមរយៈព្រះលោហិតរបស់ទ្រង់។
អំណានព្រះគម្ពីរពេលល្ងាច៖ កិច្ចការ ជំពូក ៣:១១-២៦
ខចងចាំ៖ ប៉ុន្តែ កាលណាព្រះវិញ្ញាណបរិសុទ្ធបានមកសណ្ឋិតលើអ្នករាល់គ្នា នោះអ្នករាល់គ្នានឹងបានព្រះចេស្តា ហើយនិងធ្វើជាទីបន្ទាល់ពីខ្ញុំ នៅក្រុងយេរូសាឡិម ព្រមទាំងស្រុកយូដា និងស្រុកសាម៉ារីទាំងមូល ហើយរហូតដល់ចុងផែនដីបំផុតផង ។ កិច្ចការ ១:៨
