ថ្ងៃព្រហស្បតិ៍ ទី២៦ ខែឧសភា ឆ្នាំ២០២២
អំណានព្រះគម្ពីរពេលព្រឹក៖ ចូរចាំយាម ចូរឈរឲ្យមាំមួនក្នុងសេចក្តីជំនឿ ចូរប្រព្រឹត្តឲ្យពេញជាភាពបុរស ចូរឲ្យមានកំឡាំងចុះ ត្រូវឲ្យអ្នករាល់គ្នាធ្វើការទាំងអស់ ដោយសេចក្តីស្រឡាញ់។ កូរិនថូសទី១ ១៦:១៣-១៤
អំណានប្រចាំថ្ងៃ ការចាប់ខ្លួន និងការបៀតបៀនទៅលើពួកសាវក
ការអធិប្បាយពីការមានព្រះជន្មរស់ឡើងវិញរបស់ព្រះគ្រីស្ទ និងពីការដែលថាតាមរយៈការសុគតនិងការមានព្រះជន្មរស់ឡើងវិញរបស់ទ្រង់ ទ្រង់អាចធ្វើឱ្យមនុស្សស្លាប់ងើបចេញពីផ្នូរឡើងវិញ នៅទីចុងបញ្ចប់នោះបានធ្វើឱ្យពួកមេដឹកនាំសាសនាមានការមិនពេញចិត្តជាខ្លាំង។ ពួកគេមានអារម្មណ៍ថា គោលលទ្ធិដ៏ជាទីពេញចិត្តរបស់គេ កំពុងតែជួបប្រទះនឹងគ្រោះថ្នាក់ហើយ ហើយកេរ្តិ៍ឈ្មោះរបស់ពួកគេក៏កំពុងតែធ្លាក់ចុះដែរ។ ពួកមន្ត្រីព្រះវិហារ និងអ្នកគ្រប់គ្រងព្រះវិហារខ្លះជាពួកសាឌូស៊ី គេក៏បានចាប់ខ្លួនសាវកទាំងពីររូបនេះ ហើយក៏បានឃុំខ្លួនពួកគេនៅក្នុងគុក ដោយសារតែពេលនោះជាពេលយប់ទៅហើយមិនអាចនឹងកាត់ទោសពួកគេទាន់។
នៅថ្ងៃបន្ទាប់ លោកអាណ ហើយនិងលោកកៃផាស ដែលជាមេដឹកនាំសាសនា ព្រមគ្នាជាមួយនឹងអ្នកមុខអ្នកការដទៃទៀតបានមកប្រជុំគ្នាដើម្បីជំនុំជម្រះអ្នកទាំងពីរនេះ ដែលគេបាននាំយកទៅនៅចំពោះមុខគេ នៅពេលនោះ។ នៅក្នុងបន្ទប់នោះឯង ហើយនៅចំពោះមុខមនុស្សទាំងអស់នោះឯង ដែលលោកពេត្រុសធ្លាប់បានប្រកែកថាមិនស្គាល់ព្រះគ្រីស្ទ។ រឿងទាំងអស់នេះបានផុសឡើងយ៉ាងច្បាស់ នៅក្នុងគំនិតរបស់សាវកទាំងពីរ ខណៈដែលគេបានជំនំជម្រះពួកគាត់ផ្ទាល់។ នៅពេលនេះគាត់មានឱកាសជាថ្មីដើម្បីស្តារឡើងវិញនូវភាពកម្សោយរបស់គាត់ ដែលគាត់មានពីមុន។ពួកអ្នកកាត់ក្តីទាំងនោះនៅចាំការដែលពេត្រុសបានបដិសេធលោកគ្រូរបស់ខ្លួន ហើយគេក៏បានសង្ឃឹមជឿជាក់ថាពេត្រុសនៅតែខ្លាចការគំរាមកំហែងនៃការចាប់ដាក់គុក និងការយកទៅសម្លាប់ដដែល។ ប៉ុន្តែ ពេត្រុសដែលធ្លាប់បានបដិសេធព្រះគ្រីស្ទនៅថ្ងៃដែលទ្រង់ត្រូវការការកម្សាន្តចិត្ត នោះ ឥឡូវនេះ គឺជាសាវកដ៏រឹងមាំមួយរូប ដែលមានទំនុកចិត្តលើខ្លួនឯង មិនដូចជាពេត្រុសដែលនៅពីមុខក្រុមប្រឹក្សាសាន់ហេឌ្រីននៅថ្ងៃនោះឡើយ។ គាត់បានបំផ្លាស់បំប្រែ ហើយគាត់ក៏លែងមិនទុកចិត្តលើខ្លួនឯងឬមានអំនួតទៀតហើយដែរ។ គាត់ពេញដោយព្រះវិញ្ញាណបរិសុទ្ធ ហើយដោយសារអំណាចព្រះចេស្តារបស់ព្រះវិញ្ញាណ គាត់បានឈរយ៉ាងក្លាហាន និងរឹងមាំដូចជាថ្មដា ហើយត្រៀមខ្លួនជាស្រេចក្នុងការធ្វើទីបន្ទាល់ពីព្រះគ្រីស្ទ។ គាត់បានត្រៀមខ្លួនជាស្រេចដើម្បីកំចាត់ ចោលនូវភាពសៅហ្មងនៃការក្បត់ជំនឿ ដោយការសរសើរតម្កើងដល់ព្រះ ដែលគាត់បានបដិសេធពីមុនម្តង។
អំណានព្រះគម្ពីរពេលល្ងាច៖ កិច្ចការ ជំពូក ៤:១-១២
ខចងចាំ៖ ប៉ុន្តែ កាលណាព្រះវិញ្ញាណបរិសុទ្ធបានមកសណ្ឋិតលើអ្នករាល់គ្នា នោះអ្នករាល់គ្នានឹងបានព្រះចេស្តា ហើយនិងធ្វើជាទីបន្ទាល់ពីខ្ញុំ នៅក្រុងយេរូសាឡិម ព្រមទាំងស្រុកយូដា និងស្រុកសាម៉ារីទាំងមូល ហើយរហូតដល់ចុងផែនដីបំផុតផង ។ កិច្ចការ ១:៨
