ថ្ងៃសុក្រ ទី២៧ ខែឧសភា ឆ្នាំ២០២២
អំណានព្រះគម្ពីរពេលព្រឹក៖ ពីព្រោះមានសេចក្តីចែងទុកមកក្នុងគម្ពីរថា «មើលអ្នកដាក់ថ្មជ្រុង១នៅក្រុងស៊ីយ៉ូន ជាថ្មដែលជ្រើសរើស ហើយវិសេសវិសាល អ្នកណាដែលជឿដល់ទ្រង់ នោះនឹងគ្មានហេតុនាំឲ្យខ្មាសឡើយ»។ ពេត្រុសទី១ ២:៦
អំណានប្រចាំថ្ងៃ ការតវ៉ាដ៏ក្លាហានរបស់ពេត្រុស
រហូតមកដល់ពេលនេះ ពួកសង្ឃបានគេចវេះមិននិយាយអំពីការសុគត ហើយនិងការមានព្រះជន្មរស់ឡើងវិញរបស់ព្រះគ្រីស្ទឡើយ ប៉ុន្តែពេលនេះពួកគេត្រូវតែបង្ខំចិត្តសួរឱ្យដឹងថា តើដោយសំអាងលើអំណាចអ្វីដែលពេត្រុសអាចធ្វើការអស្ចារ្យនេះបាន? លោកពេត្រុសដែលពេញទៅដោយព្រះវិញ្ញាណបរិសុទ្ធបានជំរាបនៅចំពោះមុខពួកសង្ឃ ហើយនិងអ្នកដឹកនាំទាងនោះដោយគោរពថា ”ឱលោកដ៏ជាធំលើបណ្តាជន និងពួកអ៊ីស្រាអែលអើយ គឺដោយសារព្រះនាមនៃព្រះយេស៊ូវគ្រីស្ទ ពីស្រុកណាសារ៉ែត ដែលលោករាល់គ្នាបានឆ្កាងទ្រង់ ដែលព្រះបានប្រោសឱ្យមានព្រះជន្មរស់ពីស្លាប់ឡើងវិញ ព្រះអង្គនេះហើយគឺជាថ្មដែលលោករាល់គ្នាជាជាងសង់ផ្ទះ បានមើលងាយ ប៉ុន្តែ ទ្រង់បានត្រឡប់ជាថ្មជ្រុងយ៉ាងឯកវិញ។ ហើយគ្មានសេចក្តីសង្គ្រោះដោយសារអ្នកណាទៀតសោះ ដ្បិតនៅក្រោមមេឃ គ្មាននាមឈ្មោះណាទៀតបានប្រទានមកមនុស្សលោក ឱ្យយើងរាល់គ្នាបានសង្គ្រោះនោះឡើយ”។
ត្រារបស់ព្រះបានសណ្ឋិតលើសម្តីរបស់ពេត្រុស ហើយទឹកមុខរបស់គាត់បានចែងចាំងដោយព្រះវិញ្ញាណបរិសុទ្ធ។ ហើយនៅក្បែរគាត់ គឺជាបុរសខ្វិនដែលបានជាពីភាពពិការរបស់គាត់នោះ។ វត្តមានរបស់បុរសម្នាក់នោះ ដែលពីមុនធ្លាប់បានខ្វិន តែត្រូវបានប្រោសឱ្យជាឡើងវិញ ហើយការសរសើរតម្កើងដល់ព្រះនាមព្រះគ្រីស្ទ ពីស្រុកណាសារ៉ែតរបស់គាត់នោះ ធ្វើឱ្យទីបន្ទាល់របស់លោកពេត្រុសកាន់តែមានទម្ងន់។ ពួកមេដឹកនាំគ្មានអំណាចនឹងបដិសេធនូវអ្វីដែលពេត្រុសបានមានប្រសាសន៍ឡើយ។ ពួកគេបានឮនូវអ្វីដែលពួកគេមិនចង់ឮទាល់តែសោះ នោះគឺការមានព្រះជន្មរស់ពីសុគតឡើងវិញរបស់ព្រះគ្រីស្ទ ហើយនិងអំណាចព្រះចេស្តារបស់ទ្រង់ក្នុងការធ្វើការអស្ចារ្យតាមរយៈពួកសាវករបស់ទ្រង់នៅលើផែនដីនេះ។
អំណានព្រះគម្ពីរពេលល្ងាច៖ កិច្ចការ ជំពូក ៤:១៣-២១
ខចងចាំ៖ ប៉ុន្តែ កាលណាព្រះវិញ្ញាណបរិសុទ្ធបានមកសណ្ឋិតលើអ្នករាល់គ្នា នោះអ្នករាល់គ្នានឹងបានព្រះចេស្តា ហើយនិងធ្វើជាទីបន្ទាល់ពីខ្ញុំ នៅក្រុងយេរូសាឡិម ព្រមទាំងស្រុកយូដា និងស្រុកសាម៉ារីទាំងមូល ហើយរហូតដល់ចុងផែនដីបំផុតផង ។ កិច្ចការ ១:៨
