ថ្ងៃសៅរ៍ ទី២៨ ខែឧសភា ឆ្នាំ២០២២
អំណានព្រះគម្ពីរពេលព្រឹក៖ ដូច្នេះ ដែលមានសេចក្តីសង្ឃឹមជាខ្លាំងក្រៃដល់ម៉្លេះ នោះយើងខ្ញុំកើតមានសេចក្តីក្លាហានណាស់ មិនមែនដូចលោកម៉ូសេ ដែលយកស្បៃបាំងមុខ ដើម្បីមិនឲ្យជនជាតិអ៊ីស្រាអែល បានសំឡឹងមើលទៅដល់ចុងនៃសេចក្តី ដែលកំពុងតែសូន្យបាត់ទៅនោះឡើយ។ កូរិនថូសទី២ ៣:១២
អំណានប្រចាំថ្ងៃ ការស្មោះត្រង់ចំពោះព្រះយេស៊ូវ
ការតវ៉ាយ៉ាងក្លាហានរបស់ពេត្រុសនេះ ធ្វើឱ្យពួកអ្នកដឹកនាំមានការស្ញប់ស្ញែងជាខ្លាំង។ គាត់បានមានប្រសាសន៍អំពីថ្មដែលពួកមេជាងមិនអើពើ នេះមានន័យថា ពួកអ្នកដឹកនាំក្នុងព្រះវិហារដឹងពីតម្លៃរបស់ទ្រង់ តែគេបែរជាបដិសេធទ្រង់ទៅវិញ ប៉ុន្តែថ្មនេះបានក្លាយជាថ្មជ្រុងយ៉ាងឯកវិញ។ លោកពេត្រុសបានមានប្រសាសន៍អំពីព្រះគ្រីស្ទដែលជាមូលដ្ឋានគ្រឹះរបស់ពួកជំនុំ។
ហ្វូងមនុស្សមានការភ្ញាក់ផ្អើលចំពោះភាពក្លាហានរបស់ពួកសាវកជាខ្លាំង ព្រោះពួកគេធ្លាប់គិតថា ដោយសារតែពួកសាវកគឺជាអ្នកនេសាទដ៏ល្ងង់ខ្លៅ នោះពួកសម្តេចសង្ឃ ពួកអ្នកដឹកនាំសាសនា នឹងអាចយកឈ្នះលើពួកគេបានយ៉ាងងាយស្រួល។ ប៉ុន្តែ ពួកសាវកបានសម្តែងឱ្យឃើញថាពួកគេមានចំណេះដឹងដែលពួកគេទទួលបានតាមរយៈព្រះយេស៊ូវវិញ។ ពួកសាវកបាននិយាយនូវអ្វីដែលព្រះយេស៊ូវធ្លាប់បានមានបន្ទូល ដោយអំណាចព្រះចេស្តារបស់ព្រះ រហូតធ្វើឱ្យពួកអ្នកដឹកនាំទាំងនោះនៅស្ងៀម។ ដូច្នេះ ដើម្បីបន្តរឿងក្តីនេះ ពួកសម្តេចសង្ឃក៏បានបញ្ជាឱ្យគេនាំយកពួកសាវកចេញទៅដើម្បីឱ្យពួកគេបានពិគ្រោះគ្នាចំពោះរឿងក្តីនេះ។
ពួកគេបានយល់ព្រមថា ពួកគេមិនអាចប្រកែកថាបុរសខ្វិនម្នាក់នោះមិនបានជាឡើងវិញបានទេ ដោយសារឈ្មោះយេស៊ូវដែលបានប្រគល់អំណាចដល់ពួកសាវកក្នុងការធ្វើការនេះ។ ពួកគេអាចនឹងបំប្លែងការអស្ចារ្យនោះឱ្យក្លាយទៅជាការក្លែងក្លាយបាន ប៉ុន្តែ វាមិនមែនជាការងាយស្រួលទេ ដោយសារតែការនោះកើតឡើងនៅពេលថ្ងៃ ហើយមានមនុស្សជាច្រើនបានឃើញការអស្ចារ្យនោះ ព្រមទាំងបានផ្សព្វផ្សាយដល់មនុស្សរាប់ពាន់នាក់ផង។ ពួកគេបានប្តេជ្ញាគ្នាថា ការនោះ ត្រូវតែបញ្ឈប់ជាបន្ទាន់ បើពុំនោះទេ នឹងមានមនុស្សជាច្រើនជឿដល់ព្រះយេស៊ូវ ហើយពេលនោះ ពួកគេប្រាកដជាទទួលការអាប់ឱន ហើយត្រូវបណ្តាជនបង្ខំឱ្យទទួលខុសត្រូវចំពោះការសុគតនៃព្រះរាជបុត្រារបស់ព្រះជាមិនខានឡើយ។ ប៉ុន្តែ ទោះបីជាគេចង់បំផ្លាញកិច្ចការរបស់ពួកសាវកយ៉ាងណាក៏ដោយ ក៏គេមិនហ៊ានធ្វើអ្វីឱ្យលើសពីនេះដែរ គឺពួកគេគ្រាន់តែគំរាមកំហែងមិនឱ្យពួកសាវកធ្វើការអស្ចារ្យទៀត និងមិនឱ្យបង្រៀនពីឈ្មោះយេស៊ូនោះទៀតតែប៉ុណ្ណោះ។ តែនៅពេលនោះ លោកពេត្រុសនិងលោកយ៉ូហាន បានឆ្លើយឡើងយ៉ាងក្លាហានថា ព្រះបានប្រទានការនេះដល់យើង ដូច្នេះយើងនឹងនៅតែនិយាយពីការអ្វីដែលយើងបានឃើញនិងបានឮ។ ពួកសម្តេចសង្ឃនិងអ្នកដឹកនាំចង់ដាក់ទោសដល់ពួកសាវក ចំពោះការដែលពួកគេរឹងទទឹង ប៉ុន្តែពួកគេភ័យខ្លាចក្រែងបណ្តាជនបះបោរប្រឆាំងនឹងគេវិញ។ ដូច្នេះ ពួកគេក៏បានសម្រេចចិត្តដោះលែងពួកសាវកឱ្យមានសេរីភាពវិញ។
អំណានព្រះគម្ពីរពេលល្ងាច៖ កិច្ចការ ជំពូក ៤:២៣-៣៦
ខចងចាំ៖ ប៉ុន្តែ កាលណាព្រះវិញ្ញាណបរិសុទ្ធបានមកសណ្ឋិតលើអ្នករាល់គ្នា នោះអ្នករាល់គ្នានឹងបានព្រះចេស្តា ហើយនិងធ្វើជាទីបន្ទាល់ពីខ្ញុំ នៅក្រុងយេរូសាឡិម ព្រមទាំងស្រុកយូដា និងស្រុកសាម៉ារីទាំងមូល ហើយរហូតដល់ចុងផែនដីបំផុតផង ។ កិច្ចការ ១:៨
