ថ្ងៃព្រហស្បតិ៍ ទី០៥ ខែឧសភា ឆ្នាំ២០២២
អំណានព្រះគម្ពីរពេលព្រឹក៖ តែឥឡូវនេះ ដែលនៅក្នុងព្រះគ្រីស្ទយេស៊ូវ នោះអ្នករាល់គ្នា ដែលពីដើមនៅឆ្ងាយ បានមកជិតវិញ ដោយសារព្រះលោហិតទ្រង់ ដ្បិតទ្រង់ជាស្ពានមេត្រីនៃយើងរាល់គ្នា ទ្រង់បានធ្វើទាំង២រួមគ្នាតែ១ ហើយបានរុះជញ្ជាំងដែលខាន់កណ្តាលចេញ។ អេភេសូរ ២:១៣-១៤
អំណានប្រចាំថ្ងៃ ការស្រេចហើយ
ការស្រេចហើយហ្វូងមនុស្សបានសម្លឹងមើលព្រឹត្តិការណ៍ដ៏គួរឱ្យភ័យខ្លាចនេះ ដោយភាពស្ងៀមស្ងាត់រហូតដល់ចប់។ ព្រះអាទិត្យបានបញ្ចេញពន្លឺឡើងវិញ ប៉ុន្តែ ឈើឆ្កាងនៅតែគ្របដណ្តប់ដោយភាពងងឹតដដែល។ រំពេចនោះ ភាពងងឹតត្រូវបានលើកឡើងចេញពីឈើឆ្កាង ហើយនៅក្នុងសំឡេងត្រែយ៉ាងច្បាស់ ហាក់ឮពាសពេញចក្រវាលទាំងមូល ព្រះយេស៊ូវស្រែកថា «ការស្រេចហើយ» «ឱព្រះវរបិតាអើយ ទូលបង្គំប្រគល់វិញ្ញាណដល់ព្រះហស្តទ្រង់វិញ» (លូកា ២៣:៤៦)។ ពន្លឺបានព័ទ្ធជុំវិញឈើឆ្កាង ហើយព្រះភក្ត្ររបស់ព្រះអង្គសង្គ្រោះបានបញ្ចេញរស្មីដោយសិរីល្អ ដូចជាព្រះអាទិត្យ។ បន្ទាប់មក ទ្រង់បានឱនព្រះសិររបស់ទ្រង់មកលើព្រះឱរា (ដើមទ្រូង) ហើយបានសុគតទៅ។
ក្នុងឱកាសដែលព្រះគ្រីស្ទបានសុគតនោះ ពួកសង្ឃកំពុងតែធ្វើពិធីក្នុងព្រះវិហារ នៅពីមុខវាំងននដែលបាំងខ័ណ្ឌចែកទីបរិសុទ្ធនិងទីបរិសុទ្ធបំផុត។ រំពេចនោះ ពួកគេបានដឹងថាផែនដីបានញ័ររញ្ជួយនៅពីក្រោមពួកគេ ហើយវាំងននក្នុងព្រះវិហារ ជាវាំងននធ្វើពីក្រណាត់យ៉ាងក្រាស់ ដែលគេបានប្តូរជារៀងរាល់ឆ្នាំនោះ ត្រូវបានរហែកជាពីរ ពីលើចុះក្រោម ដោយគ្មានដៃមនុស្សធ្វើ ដូចជាការសរសេរពាក្យនៃការផ្តន្ទាទោសនៅលើជញ្ជាំងព្រះរាជវាំងរបស់ស្តេចបេលសាសាដូច្នោះដែរ។
ព្រះយេស៊ូវពុំបានប្រគល់ព្រះជន្មទ្រង់ឡើយ លុះត្រាតែទ្រង់បានបញ្ចប់ការងារដែលទ្រង់បានយាងមកបំពេញសិន ហើយទ្រង់បានឧទានដោយដង្ហើមចុងក្រោយរបស់ទ្រង់ថា «ការស្រេចហើយ!»។ ពពួកទេវតារីករាយជាខ្លាំង នៅពេលដែលព្រះយេស៊ូវបានបន្លឺព្រះសូរសៀងនូវពាក្យទាំងនេះ ព្រោះផែនការនៃសេចក្តីសង្គ្រោះដ៏ឧត្តម ត្រូវបានសម្រេច ដោយជោគជ័យហើយ។ មានសេចក្តីអំណរនៅស្ថានសួគ៌ ដោយកូនចៅរបស់លោកអ័ដាមត្រូវបានលើកតម្កើងឡើងនៅចំពោះព្រះភក្ត្ររបស់ព្រះ នៅទីបំផុត ដោយសារតែជីវិតដែលស្តាប់បង្គាប់។ សាតាំងត្រូវបរាជ័យ ហើយវាដឹងថានគររបស់វានឹងត្រូវបាត់បង់។
អំណានព្រះគម្ពីរពេលល្ងាច៖ លូកា ជំពូក ២៣:៤៤-៤៩
ខចងចាំ៖ តែទ្រង់ត្រូវរបួស ដោយព្រោះអំពើរំលងរបស់យើង ក៏ត្រូវវាយជាំ ដោយព្រោះអំពើទុច្ចរិតរបស់យើងទេ ឯការវាយផ្ចាលដែលនាំឲ្យយើងបានជាមេត្រី នោះបានធ្លាក់ទៅលើទ្រង់ ហើយយើងរាល់គ្នាបានប្រោសឲ្យជា ដោយសារស្នាមរំពាត់នៅអង្គទ្រង់។ អេសាយ ៥៣:៥
