ថ្ងៃសុក្រ ទី០៥ ខែមិថុនា ឆ្នាំ២០២២
អំណានព្រះគម្ពីរពេលព្រឹក៖ ព្រះយេហូវ៉ាទ្រង់ទតមកពីលើស្ថានសួគ៌ទ្រង់ឃើញមនុស្សលោកទាំងអស់ ទ្រង់ទតមកពីស្ថានដ៏ជាទីលំនៅរបស់ទ្រង់ក៏ឃើញអស់អ្នកដែលនៅផែនដីផង គឺទ្រង់ហើយ ដែលស្អាងចិត្តគេក៏ពិចារណាមើលអស់ទាំងការដែលគេធ្វើដែរ។
អំណានប្រចាំថ្ងៃ ការបើកសំដែងរបស់ព្រះគ្រីស្ទ
នៅពេលដែលអ្នកធ្វើដំណើរដ៏ហេវហត់នេះបានទៅជិតដល់ទីក្រុងដាម៉ាស ភ្នែកទាំងពីររបស់សុលបានជាប់ចិត្តទៅនឹងទឹកដីដ៏មានជីជាតិ សួនច្បារដ៏ស្រស់ស្អាត ចំការផ្លែឈើដែលពោរពេញ ដោយផលផ្លែ ហើយនិងទឹកហូរដ៏ត្រជាក់ ដែលបញ្ចេញជាសំឡេងខ្សឹបៗ នៅចំកណ្តាលរុក្ខជាតិ (ចុល្លព្រឹកទាំងឡាយ) ពណ៌បៃតងស្រស់។ បន្ទាប់ពីការធ្វើដំណើរយ៉ាងវែងឆ្ងាយ កាត់វាលដ៏សោះកក្រោះដ៏គួរឱ្យធុញទ្រាន់មួយមក លុះបានជួបនឹងទស្សនីយភាពដ៏ស្រស់បំព្រងបែបនេះ នោះគួរឱ្យមានអារម្មណ៍ស្រស់ថ្លាណាស់។ ខណៈដែលសុលនឹងអ្នករួមដំណើររបស់គាត់កំពុងតែសម្លឹងមើលនិងកោតសរសើរដល់សម្រស់ធម្មជាតិនោះ ស្រាប់តែមានពន្លឺភ្លឺចាំងដូចជាពន្លឺព្រះអាទិត្យ ចាំង ជុំវិញខ្លួនគាត់ «គាត់ក៏ដួលដល់ដី រួចឮសំឡេងមានបន្ទូលមកថា សុល នែសុល ហេតុអ្វីបានជាបៀតបៀនដល់ខ្ញុំដូច្នេះ ? គាត់ទូលឆ្លើយថា ឱព្រះអម្ចាស់អើយ ព្រះអង្គណានុ៎ះ រួចព្រះអម្ចាស់ទ្រង់តបថា ខ្ញុំនេះជាព្រះយេស៊ូវដែលអ្នកបៀតបៀន អ្នកធាក់ជល់នឹងជន្លួញដូច្នេះ នោះពិបាកដល់អ្នកណាស់»។
ទស្សនីយភាពនោះ គឺជារឿងច្របូកច្របល់ដ៏ធំបំផុតមួយ។ ពួកអ្នករួមដំណើរជាមួយសុលទាំងអស់ភិតភ័យស្រឡាំងកាំង ស្ទើរតែខ្វាក់ភ្នែកដោយពន្លឺដ៏ខ្លាំងក្រៃលែង។ ពួកគេបានឮសំឡេង ប៉ុន្តែ មិនបានឃើញមាននរណាម្នាក់សោះ ហើយចំពោះពួកគេអ្វីៗទាំងអស់សុទ្ធតែពិបាកយល់ និងពោរពេញដោយអាថ៌កំបាំង។ ប៉ុន្តែ សុលដែលដួលផ្កាប់មុខដល់ដី បានយល់នូវពាក្យទាំងឡាយ ដែលបាននិយាយមកកាន់គាត់ ហើយគាត់បានឃើញព្រះរាជបុត្រារបស់ព្រះយ៉ាងច្បាស់ នៅពីមុខគាត់។ នៅពេលគាត់សម្លឹងមើលព្រះដែលពោរពេញដោយសិរីល្អ នោះសុលជាសាសន៍យូដា ដែលភ័យខ្លាចនេះបានផ្តិតរូបរបស់ទ្រង់នៅក្នុងចិត្តរបស់គាត់ជារៀងរហូត។ ព្រះបន្ទូលនេះអង្រួនដល់ចិត្តរបស់គាត់ ដោយកម្លាំងគួរឱ្យរន្ធត់។ ពន្លឺខ្លាំងដូចទឹកជំនន់បានចាំងចូលទៅក្នុងទីងងឹត ក្នុងចិត្តរបស់គាត់ បើកសម្តែងឱ្យឃើញនូវភាពល្ងង់ខ្លៅ និងកំហុសរបស់គាត់។ គាត់បានឃើញថា ខណៈពេលដែលគាត់នឹកគិតខ្លួនឯងថាគាត់ជាអ្នកបំរើព្រះយ៉ាងក្លៀវក្លា ដោយបៀតបៀនដល់អ្នកដើរតាមព្រះគ្រីស្ទ នោះគាត់គឺជាសត្រូវដែលបំរើឱ្យសាតាំងយ៉ាងពិតប្រាកដ។ គាត់បានឃើញ កំហុសរបស់គាត់ ដោយការពឹងផ្អែកលើសេចក្តីជំនឿរបស់គាត់ ទៅលើសកម្មភាពនៃការធានាទាំងឡាយរបស់ពួកសង្ឃនិងអ្នកគ្រប់គ្រង ដែលបានទទួលអំណាចពីថ្នាក់លើ មានឥទ្ធិពលយ៉ាងខ្លាំងក្លាមកលើគំនិតរបស់គាត់ ហើយបានធ្វើឱ្យគាត់ជឿថាការមានព្រះជន្មរស់ឡើងវិញ គឺជារឿងប្រឌិតយ៉ាងប៉ិនប្រសប់នៃពួកសាវករបស់ព្រះយេស៊ូវ។
អំណានព្រះគម្ពីរពេលល្ងាច៖ កិច្ចការ ជំពូក ៩:១-៩
ខចងចាំ៖ ដូច្នេះ ចូរឲ្យពន្លឺរបស់អ្នករាល់គ្នា បានភ្លឺនៅមុខមនុស្សលោកយ៉ាងនោះដែរ ដើម្បីឲ្យគេឃើញការល្អ ដែលអ្នករាល់គ្នាប្រព្រឹត្ត រួចសរសើរដំកើង ដល់ព្រះវរបិតានៃអ្នករាល់គ្នាដែលគង់នៅស្ថានសួគ៌។ ម៉ាថាយ ៥:១៦
