ថ្ងៃសៅរ៍ ទី១១ ខែមិថុនា ឆ្នាំ២០២២
អំណានព្រះគម្ពីរពេលព្រឹក៖ ដ្បិតកាលពីដើមអ្នករាល់គ្នាក៏ងងឹតដែរ តែឥឡូវនេះវិញ បានភ្លឺក្នុងព្រះអម្ចាស់ ដូច្នេះ ចូរដើរដូចជាមនុស្សភ្លឺចុះ ដ្បិតផលផ្លែនៃពន្លឺ នោះមាននៅក្នុងគ្រប់ទាំងកិរិយាល្អ សេចក្តីសុចរិត និងសេចក្តីពិត ចូរលមើលឲ្យដឹងសេចក្តីអ្វី ដែលព្រះអម្ចាស់ទ្រង់សព្វព្រះហឫទ័យចុះ។ អេភេសូរ ៥:៨-១០
អំណានប្រចាំថ្ងៃ បានងងឹតភ្នែកដោយសារពន្លឺ
ឥឡូវនេះ ព្រះគ្រីស្ទបានលេចមកឱ្យសុលបានឃើញបានជំរុញឱ្យគាត់បាននឹកឃើញនូវការអធិប្បាយរបស់ស្ទេផាន យ៉ាងជាក់ច្បាស់នៅក្នុងចិត្ត។ ពាក្យពេចន៍ទាំងឡាយដែលពួកសង្ឃបានប្រកាសយ៉ាងច្បាស់ ជាការប្រមាថ ឥឡូវនេះបានលេចមកជាការពិតនិងគួរឱ្យទុកចិត្តបានយ៉ាងពិតប្រាកដដល់គាត់។ នៅក្នុងឱកាសនៃការបំភ្លឺដ៏អស្ចារ្យនោះ គំនិតរបស់គាត់ធ្វើការយ៉ាងរហ័សគួរឱ្យកត់សម្គាល់។ គាត់បានរំឭកត្រួសៗនូវប្រវត្តិសាស្ត្រនៃបទទំនាយ ហើយបានឃើញថា ការបដិសេធន៍ព្រះយេស៊ូវ ដោយពួកសាសន៍យូដា ការឆ្កាងរបស់ទ្រង់ ការមានព្រះជន្មរស់ឡើងវិញ និងការយាងឡើងទៅស្ថានសួគ៌ ត្រូវបានពួកហោរាទាយទុកមកជាមុន និងបានអះអាងបញ្ជាក់ថា ទ្រង់ជាព្រះមែស្ស៊ី ដែលព្រះបានសន្យាពិតប្រាកដមែន។ គាត់បានចងចាំនូវពាក្យរបស់ស្ទេផានថា «ខ្ញុំឃើញមេឃនៅចំហ និងកូនមនុស្សឈរនៅខាងព្រះហស្តស្តាំនៃ្រពះ» (កិច្ចការ ៧:៥៦) ហើយគាត់បានដឹងថាពួកបរិសុទ្ធរបស់ព្រះ ដែលបានស្លាប់ទៅ គេបានសម្លឹងមើលទៅនគរដ៏មានសិរីល្អរបស់ព្រះ។
នេះគឺជាការបើកសម្តែងដ៏អស្ចារ្យ មកកាន់អ្នកបៀតបៀនដល់ពួកអ្នកជឿព្រះយេស៊ូវ។ ពន្លឺយ៉ាងខ្លាំងបានបំបែកចិត្តរបស់គាត់។ គាត់បានឃើញព្រះគ្រីស្ទ ជាព្រះដែលបានយាងមកកាន់ផែនដីដើម្បីបំពេញបេសកកម្មរបស់ទ្រង់ ទ្រង់ត្រូវបានអ្នកដែលទ្រង់យាងមកជួយសង្គ្រោះ បោះបង់ចោល ធ្វើបាបស្តីបន្ទោស និងចោទប្រកាន់ព្រមទាំងយកទ្រង់ទៅឆ្កាង ហើយទ្រង់មានព្រះជន្មរស់ពីសុគតឡើងវិញ រួចបានយាងឡើងទៅកាន់ស្ថានសួគ៌។ នៅក្នុងពេលដ៏រន្ធត់នោះ គាត់បាននឹកឃើញថា លោកស្ទេផានដ៏បរិសុទ្ធបានបូជាជីវិត ដោយសារសេចក្តីជំនឿរបស់គាត់ ហើយតាមរយៈគំរូរបស់គាត់ មនុស្សបរិសុទ្ធជាច្រើននឹងត្រូវប្រឈមមុខនឹងសេចក្តីស្លាប់ដោយការបៀតបៀនយ៉ាងសាហាវឃោរឃៅ។
«នោះគាត់ក៏ញាប់ញ័រ ទាំងអស្ចារ្យក្នុងចិត្ត ហើយទូលថា ព្រះអម្ចាស់អើយ តើទ្រង់សព្វព្រះហប្ញទ័យឱ្យទូលបង្គំធ្វើដូចម្តេច ព្រះអម្ចាស់មានបន្ទូលថា ចូរក្រោកឡើង ចូលទៅក្នុងទីក្រុងទៅ នោះគេនឹងប្រាប់អ្នកឱ្យដឹងពីការដែលអ្នកត្រូវធ្វើ”។ សុលដឹងយ៉ាងច្បាស់ថា នេះគឺពិតជាព្រះយេស៊ូវពីស្រុកណាសារ៉ែត ដែលបានមានព្រះបន្ទូលមកកាន់គាត់ ហើយថាទ្រង់គឺពិតជាព្រះមែស្ស៊ី ជាព្រះដ៏ជួយដោះទុក្ខ និងជាព្រះដ៏ប្រោសលោះរបស់រាស្ត្រអ៊ីស្រាអែលជាប្រាកដ។
នៅពេលដែលសិរីល្អដ៏ត្រចះត្រចង់បានចេញពីគាត់ហើយសុលបានងើបពីដីឡើង ហើយបានដឹងខ្លួនឯងថា គាត់មើលមិនឃើញអ្វីនោះទេ។ សិរីល្អដ៏ភ្លឺចិញ្ចាចរបស់ព្រះគ្រីស្ទ ពិតជាមានកម្លាំងខ្លាំងក្លាអស្ចារ្យ ដល់ភ្នែកសាច់របស់គាត់ ហើយនៅពេលដែលពន្លឺនោះត្រូវបានដកយកចេញ ភាពងងឹតនៃពេលរាត្រីបានស្ថិតនៅក្នុងក្រសែភ្នែករបស់គាត់ (ខ្វាក់)។ គាត់ជឿថាការខ្វាក់ភ្នែករបស់គាត់នេះគឺជាទណ្ឌកម្មរបស់ព្រះចំពោះការបៀតបៀនដ៏សាហាវរបស់គាត់ ទៅលើអ្នកដើរតាមព្រះយេស៊ូវ។ គាត់បានដើររាវផ្លូវក្នុងភាពងងឹតដ៏សែនលំបាក ហើយអ្នកជូនដំណើរបស់គាត់បានដឹកដៃគាត់នាំទៅឯទីក្រុងដាម៉ាស ទាំងភ័យខ្លាចនិងអស្ចារ្យក្នុងចិត្ត។
អំណានព្រះគម្ពីរពេលល្ងាច៖ អេសេគាល ជំពូក ១:២២-២៨
ខចងចាំ៖ ដូច្នេះ ចូរឲ្យពន្លឺរបស់អ្នករាល់គ្នា បានភ្លឺនៅមុខមនុស្សលោកយ៉ាងនោះដែរ ដើម្បីឲ្យគេឃើញការល្អ ដែលអ្នករាល់គ្នាប្រព្រឹត្ត រួចសរសើរដំកើង ដល់ព្រះវរបិតានៃអ្នករាល់គ្នាដែលគង់នៅស្ថានសួគ៌។ ម៉ាថាយ ៥:១៦
