ថ្ងៃព្រហស្បតិ៍ ទី១៦ ខែមិថុនា ឆ្នាំ២០២២
(ជំពូកនេះមានមូលដ្ឋាននៅក្នុងគម្ពីរកិច្ចការ ៩:២៣-៣១. ២២:១៧-២១)
អំណានព្រះគម្ពីរពេលព្រឹក៖ ឯព្រះដែលទ្រង់អាចនឹងធ្វើហួសសន្ធឹក លើសជាងអស់ទាំងសេចក្តីដែលយើងសូម ឬគិតក្តី តាមព្រះចេស្តា ដែលបណ្តាលក្នុងយើងរាល់គ្នា នោះសូមឲ្យទ្រង់បានសិរីល្អ នៅក្នុងពួកជំនុំ ដោយសារព្រះគ្រីស្ទយេស៊ូវ រហូតដល់គ្រប់ទាំងដំណមនុស្ស នៅអស់កល្បជានិច្ចរៀងរាបតទៅ។ អាម៉ែន។ អេភេសូរ ៣:២០-២១
អំណានប្រចាំថ្ងៃ
សាវកប៉ុលបានធ្វើដំណើរទៅកាន់ក្រុងដាម៉ាសវិញ ហើយនៅទីនោះគាត់បានបង្រៀនដោយក្លាហាន ដោយនូវព្រះនាមព្រះយេស៊ូវ។ ដោយមិនអាចតយុទ្ធនឹងប្រាជ្ញារបស់លោកប៉ុលបាន ពួកសាសន៍យូដាក៏បានគិតគ្នានឹងសម្លាប់គាត់ចេញ ព្រោះនេះគឺជាវិធានការតែមួយគត់ ដើម្បីឱ្យបានឈ្នះលោកប៉ុល។ ពួកគេក៏សម្រេចចិត្តថានឹងសម្លាប់គាត់ចោល។ ពួកសាវកក៏បានដឹងអំពីគោលបំណងនេះ។ ពួកគេក៏ចាំយាមមាត់ទ្វារក្រុងទាំងយប់ទាំងថ្ងៃ ដើម្បីនឹងសម្លាប់ប៉ុល។ តែពួកសាវកបានដឹងពីឧបាយកលនេះ ក៏បាននាំគ្នាអធិស្ឋានទូលដល់ព្រះឥតឈប់ឈរ។ ពួកគេបានព្យាយាមរិះរកគ្រប់មធ្យោបាយ ដើម្បីជួយប៉ុលឱ្យរួចពីការសម្លាប់របស់ពួកយូដា។ ក្រោយមក ពួកគេក៏បានរកឃើញមធ្យោបាយមួយ គឺពួកគេនឹងយកកញ្ជើមកដាក់គាត់ រួចសម្រូតចុះ តាមកំផែងក្រុងនៅវេលាយប់។ លោកប៉ុលក៏បានគេចខ្លួនពីក្រុងដាម៉ាសដោយសុវត្ថិភាព។
ឥឡូវនេះ គាត់បានធ្វើដំណេីរឆ្ពោះទៅទីក្រុងយេរូសាឡិម ដោយសង្ឃឹមថានឹងបានរួបរួមជាមួយនឹងពួកសាវក ជាពិសេសជាមួយលោកពេត្រុស។ គាត់ប្រាថ្នាចង់ជួបអ្នកនេសាទត្រីពីស្រុកកាលីឡេម្នាក់នោះ ដែលបានដើរជាមួយព្រះយេស៊ូវ បានអធិស្ឋានជាមួយទ្រង់ និងបាននិយាយជាមួយទ្រង់ កាលទ្រង់មានព្រះជន្មរស់នៅលើផែនដីនេះ។ គាត់ប្រាថ្នាអស់ពីដួងចិត្តចង់ជួបមេដឹកនាំរបស់ពួកសាវក។ គ្រាដែលប៉ុល បានធ្វើដំណើរចូលទៅក្នុងក្រុងយេរូសាឡិម នោះគាត់មានទស្សនៈថ្មីមួយទៅលើទីក្រុង ហើយនិងព្រះវិហារ។ ឥឡូវនេះគាត់បានដឹងថា ការជំនុំជម្រះ របស់ព្រះ នឹងធ្លាក់មកលើទីក្រុងនេះ ហើយនិងព្រះវិហារនេះ។ យើងដឹងយ៉ាងច្បាស់ថា ដោយសារការប្តូរជំនឿរបស់លោកប៉ុល នឹងធ្វើឱ្យកំហឹងរបស់ពួកយូដាពុះពោរឡើងយ៉ាងខ្លាំង ប៉ុន្តែ គាត់នៅតែឈរយ៉ាងរឹងមាំ ដូចថ្មដាដដែល ហើយសង្ឃឹមថា មិត្តភក្តិរបស់គាត់នឹងផ្លាស់ប្តូរជំនឿរបស់គេ ហើយជឿដល់ព្រះយេស៊ូវ ដូចគាត់ដែរជាមិនខាន នៅពេលដែលគេបានស្តាប់ទីបន្ទាល់ដ៏អស្ចារ្យដែលបានកើតឡើង ចំពោះគាត់។ គាត់ជាអ្នក ដែលធ្លាប់តែប្រកាន់ជំហរយ៉ាងរឹងមាំប្រឆាំងនឹងព្រះគ្រីស្ទព្រមទាំងសិស្ស របស់ទ្រង់ដែរ តែនៅពេលដែលគាត់បានដឹងពីអំពើបាបរបស់ខ្លួន គាត់ក៏បានបោះបង់ការនោះចោល ហើយទទួលជឿដល់ព្រះយេស៊ូវវិញ។ ដូច្នេះ គាត់មានជំនឿថា មិត្តរបស់គាត់និងអ្នករួមកិច្ចការជាមួយគាត់នឹងផ្លាស់ប្តូរជំនឿរបស់ពួកគេដូចជាគាត់ដែរ នៅពេលដែលបានឮពីទីបន្ទាល់នៃការកែប្រែជំនឿរបស់គាត់ ហើយឃើញការផ្លាស់ប្តូរដែលកើតមានឡើងចំពោះគាត់ផ្ទាល់ដែលពីមុនជាពួកផារិស៊ីដ៏មានអំនួតម្នាក់ ដែលតែងតែធ្វើទុក្ខបៀតបៀនដល់ពួកសាវក ព្រមទាំងសម្លាប់ដល់អស់អ្នកណាដែលជឿដល់ព្រះយេស៊ូវផងនោះ។
អំណានព្រះគម្ពីរពេលល្ងាច៖ ធីម៉ូថេទី១ ជំពូក ១:១២-១៧
ខចងចាំ៖ ដ្បិតគឺជាព្រះ ដែលមានព្រះបន្ទូលបង្គាប់ ឲ្យមានពន្លឺភ្លឺចេញពីសេចក្តីងងឹត ទ្រង់បានបំភ្លឺមកក្នុងចិត្តយើងខ្ញុំ ឲ្យយើងខ្ញុំមានរស្មីពន្លឺនៃដំណើរស្គាល់សិរីល្អរបស់ព្រះ ដែលនៅព្រះភក្ត្រនៃព្រះយេស៊ូវគ្រីស្ទ។ កូរិនថូសទី២ ៤:៦
