ថ្ងៃអាទិត្យ ទី១៩ ខែមិថុនា ឆ្នាំ២០២២
អំណានព្រះគម្ពីរពេលព្រឹក៖ ខ្ញុំបានញែកអ្នកចេញពីបណ្តាជន និងពីពួកសាសន៍ដទៃ ដើម្បីនឹងចាត់អ្នកឲ្យទៅឯគេវិញ ប្រយោជន៍នឹងបំភ្លឺភ្នែកគេ ឲ្យបានបែរចេញពីសេចក្តីងងឹត មកឯពន្លឺ ហើយពីអំណាចអារក្សសាតាំង មកឯព្រះវិញ ដើម្បីឲ្យគេបានរួចពីបាប ហើយបានទទួលមរដក ជាមួយនឹងពួកអ្នកដែលបានញែកជាបរិសុទ្ធ ដោយសារសេចក្តីជំនឿជឿដល់ខ្ញុំ។ កិច្ចការ ២៦:១៧-១៨
អំណានប្រចាំថ្ងៃ ការភៀសខ្លួនចេញពីទីក្រុងយេរូសាឡិម
នៅពេលដែលប៉ុលកំពុងតែអធិស្ឋាននៅក្នុងព្រះវិហារ ព្រះជាម្ចាស់បានលេចមកឯគាត់ក្នុងចក្ខុនិម្មិត ហើយបានមានបន្ទូលទៅគាត់ថា «ចូរចាកចេញពីក្រុងយេរូសាឡិមភ្លាម ដ្បិតពួកគេនឹងមិនព្រមទទួលជឿទីបន្ទាល់របស់ឯងឡើយ»។ ទោះបីយ៉ាងណាក៏ដោយ ក៏ប៉ុលនៅតែមិនចង់ចាកចេញពីក្រុងយេរូសាឡិម ដរាបណាពួកយូដាមិនទាន់ទទួលជឿសេចក្តីពិត។ គាត់បានគិតថា ទោះបីជាគាត់ត្រូវលះបង់ជីវិត ដោយព្រោះសេចក្តីពិតនេះក៏ដោយ ក៏វាមិនអាចលុបលាងនូវអ្វីដែលគាត់បានធ្វើចំពោះស្ទេផានបានដែរ។ គាត់ក៏បានឆ្លើយទៅព្រះថា «ឱព្រះអង្គអើយ! គ្រប់គ្នា បានដឹងថា ទូលបង្គំបានចាប់ព្រមទាំងវាយដំដល់អស់អ្នកណាដែលជឿដល់ព្រះនាមទ្រង់»។
នៅពេលដែលឈាមរបស់ស្ទេផាន ជាសាវករបស់ទ្រង់បានហូរនោះទូលបង្គំក៏បានឈរនៅទីនោះ អនុញ្ញាតឱ្យគេសម្លាប់គាត់ដែរ ព្រមទាំងបានកាន់ខោអាវឱ្យពួកអ្នកដែលសម្លាប់គាត់ទៀតផង។ ប៉ុនែ្ត ព្រះបានឆ្លើយទៅគាត់យ៉ាងដាច់ខាតថា «ចូរចាកចេញពីទីនេះភ្លាម! ដ្បិតអញនឹងឱ្យឯងទៅកាន់សាសន៍ដទៃវិញ»។
នៅពេលដែលពួកសាវកបានដឹងពីសុបិនរបស់ប៉ុល ហើយនិងការយកព្រះទ័យទុកដាក់របស់ព្រះមកលើគាត់ នោះពូកគេក៏បានបង្ខំឱ្យគាត់ចាកចេញពីក្រុងយេរូសាឡិម ដ្បិតគេដឹងថា គាត់គឺជាអ្នកដែលព្រះបានរើសតាំង ឱ្យបំរើទ្រង់ក្នុងការនាំដំណឹងល្អរបស់ទ្រង់ដល់សាសន៍ដទៃ។ ដូច្នេះ ពួកគេក៏បានរៀបគម្រោងការដើម្បីឱ្យគាត់បានចាកចេញពីក្រុងយេរូសាឡិម ដើម្បីកុំឱ្យពួកយូដាសម្លាប់គាត់បាន។ ការចាកចេញរបស់ប៉ុលបានធ្វើឱ្យពួកយូដាផ្អាកភាពឃោរឃៅរបស់ពួកគេ ហើយពេលនោះដែរ ក៏មានសមាជិកក្រុមជំនុំកើនឡើងទៀត។
អំណានព្រះគម្ពីរពេលល្ងាច៖ កិច្ចការ ជំពូក ២២:១-២១
ខចងចាំ៖ ដ្បិតគឺជាព្រះ ដែលមានព្រះបន្ទូលបង្គាប់ ឲ្យមានពន្លឺភ្លឺចេញពីសេចក្តីងងឹត ទ្រង់បានបំភ្លឺមកក្នុងចិត្តយើងខ្ញុំ ឲ្យយើងខ្ញុំមានរស្មីពន្លឺនៃដំណើរស្គាល់សិរីល្អរបស់ព្រះ ដែលនៅព្រះភក្ត្រនៃព្រះយេស៊ូវគ្រីស្ទ។ កូរិនថូសទី២ ៤:៦
