​អំណានព្រះគម្ពីរពេលព្រឹក៖ ទ្រង់​ប្រសប់​ក្នុង​ការ​ជួយ​គំនិត ហើយ​ក៏​មាន​ឫទ្ធិ​ក្នុង​ការ​ធ្វើ ព្រះនេត្រ​ទ្រង់​ទត​ឃើញ​អញ​ទាំង​ផ្លូវ​របស់​ពួក​មនុស្ស​ជាតិ ដើម្បី​នឹង​សង​គ្រប់​គ្នា​តាម​ផ្លូវ​គេ​ប្រព្រឹត្ត ហើយ​តាម​ផល​នៃ​កិរិយា​របស់​គេ​រៀង​ខ្លួន។ យេរេមា ៣២:១៩

អំណានប្រចាំថ្ងៃ ទេវតាយាងទៅកាន់លោកមេទ័ពកូនេលាស

កាលដែលកូនេលាសកំពុងតែអធិស្ឋាន នោះព្រះជាម្ចាស់បានចាត់ទេវតារបស់ទ្រង់ឱ្យទៅឯលោក ហើយទេវតានោះថែមទាំងបានហៅឈ្មោះរបស់គាត់ផង។ គាត់មានការភ័យខ្លាចជាខ្លាំង ប៉ុន្តែគាត់បានដឹងថា នោះ​គឺជាទេវតាដែលព្រះបានចាត់ឱ្យមក រួចក៏ឆ្លើយតបថា «ព្រះអម្ចាស់អើយ តើមានការអ្វី?» ទេវតាក៏បានតបថា «សេចក្តីអធិស្ឋាននិងការដាក់ទានរបស់អ្នកបានឡើងទៅ ទុកជាសេចក្តីរំឭក នៅចំពោះព្រះហើយ។ ដូច្នេះ ចូរអ្នក​ប្រើគេឱ្យទៅឯយ៉ុបប៉េ ហៅស៊ីម៉ូន ដែលមានឈ្មោះថាពេត្រុសឱ្យមកឥឡូវ។ គាត់ស្នាក់នៅផ្ទះរបស់ជាងសម្លាប់ស្បែកម្នាក់ ឈ្មោះ ស៊ីម៉ូន ដែលនៅក្បែរ​មាត់សមុទ្រ អ្នកនោះនឹងប្រាប់ឱ្យអ្នកដឹងពីការដែលអ្នកត្រូវធ្វើជាយ៉ាងណា»។

នៅទីនេះ យើងឃើញថា ព្រះទ្រង់យកព្រះទ័យទុកដាក់ចំពោះកិច្ចការផ្សាយដំណឹងល្អ ហើយនិងដល់ពួកជំនុំរបស់ទ្រង់។ ទេវតារបស់ទ្រង់មិនបានប្រាប់ពីរឿងរ៉ាវដែលទាក់ទងនឹងឈើឆ្កាងដល់កូនេលាស ជាមនុស្ស​ដែលមានភាពទន់ខ្សោយ ហើយងាយចាញ់សេចក្តីល្បួងដូចជាគាត់នេះទេ គឺលោកប្រាប់ពីការសុគត ការមានព្រះជន្មរស់ឡើងវិញ និងការយាងទៅកាន់នគរស្ថានសួគ៌ដល់គាត់។ ព្រះបានចាត់ទេវតានោះមក ដើម្បីឱ្យកូនេលាសបានទាក់ទងជាមួយសាវករបស់ព្រះ ដែលនឹងបង្រៀនដល់គាត់ ហើយ​និងពួកគ្រួសាររបស់គាត់ ដើម្បីឱ្យពួកគេបានសង្រ្គោះ។

​កូនេលាស​បាន​ទទួលទេវតាដោយអំណរ ព្រមទាំងចាត់មនុស្សឱ្យទៅឯពេត្រុសតាមដែលទេវតាបានបង្គាប់។ ការបង្ហាញយ៉ាងជាក់ច្បាស់​របស់ទេវតា ដែលបានប្រាប់ទាំងឈ្មោះរបស់ម្ចាស់ផ្ទះ ដែលពេត្រុសបាន​ស្នាក់នៅនោះ គឺជាភស្តុតាងបង្ហាញឱ្យឃើញថា ស្ថានសួគ៌ស្គាល់ ហើយដឹង​យ៉ាង​ច្បាស់អំពីដំណើរជីវិត ហើយនិងការទាំងឡាយ ដែលទាក់ទងទៅ​នឹង​ជីវិតរបស់មនុស្ស។ ព្រះទ្រង់ជ្រាបអស់ទាំងការដែលអ្នកទន់ទាបធ្វើ ព្រមទាំងការរបស់ស្តេចដែលគង់លើបល្ល័ង្កផងដែរ។ ការលោភលន់ ការគ្មាន​មេត្តាធម៌ ការអាថ៌កំបាំង ឧក្រិដ្ឋកម្ម ហើយនិងភាពអាត្មានិយមរបស់មនុស្ស គឺទ្រង់ជ្រាបទាំងអស់ ហើយទ្រង់ក៏ជ្រាបពីអំពើល្អ សេចក្តីមេត្តាករុណា ភាពសប្បុរសរបស់មនុស្សដែរ។ គ្មានការអ្វីដែលអាច​លាក់កំបាំង​នឹង​ទ្រង់​បាន​ឡើយ។

​អំណានព្រះគម្ពីរពេលល្ងាច៖ កិច្ចការ ជំពូក​ ១០:១-៨