​អំណានព្រះគម្ពីរពេលព្រឹក៖ នែ អស់​ទាំង​កូន​នៃ​ព្រះ​ដ៏​មាន​ឥទ្ធិឫទ្ធិ​អើយ ចូរ​សរសើរ​ព្រះយេហូវ៉ា ចូរ​សរសើរ​ព្រះយេហូវ៉ា​ថាទ្រង់​មាន​សិរីល្អ ហើយ​នឹង​ព្រះចេស្តា ចូរ​សរសើរ​ពី​សិរីល្អ​នៃ​ព្រះយេហូវ៉ា​ឲ្យ​សម​នឹង​ព្រះនាម​ទ្រង់ចូរ​ពាក់​គ្រឿង​លំអ​បរិសុទ្ធ នាំ​គ្នា​ថ្វាយបង្គំ​ដល់ព្រះយេហូវ៉ា​ចុះ។ ទំនុកតម្កើង ២៩:១-២

អំណានប្រចាំថ្ងៃ ការមកជួបលោកកូនេលាស

ក្នុងខណៈដែលពេត្រុសមកដល់ផ្ទះរបស់គាត់នោះ គាត់មិនបានទទួលពេត្រុសក្នុងឋានៈត្រឹមតែជាភ្ញៀវម្នាក់ ប៉ុណ្ណោះទេ តែគាត់បានរាប់ពេត្រុសថាជាភ្ញៀវកិត្តិយសមកពីស្ថានសួគ៌ដែលព្រះបានចាត់ឱ្យមក។ ជាទំនៀម​ទម្លាប់នៅបូព៌ាប្រទេស គេតែងតែឱនក្រាបចំពោះស្តេច ឬអ្នកដែលមាន​ឋានៈខ្ពស់ ហើយកូនតែងតែឱនចំពោះឪពុកម្តាយរបស់ខ្លួនដែលជាអ្នកមានគុណ និងជាមនុស្សគួរឱ្យទុកចិត្ត។ តែកូនេលាសដែល​ពោរ​​ពេញ​​ទៅដោយអំណរបានឱនក្រាបទាបបាតជើងរបស់ពេត្រុស ដែលព្រះចាត់ឱ្យមក ដោយគោរព។

ប៉ុន្តែ ពេត្រុសក៏បានលើកគាត់ឡើងហើយនិយាយថា «ចូរក្រោក​ឡើង ខ្ញុំក៏ជាមនុស្សដូចអ្នកដែរ»។ ក្រោយមក លោកពេត្រុសក៏បានសំណេះសំណាលជាមួយនឹងគាត់ ដើម្បីឱ្យគាត់លែងគោរពថ្វាយបង្គំដល់ពេត្រុសដូច្នោះទៀត។ ប្រសិនបើពេត្រុសត្រូវ​បានតែងតាំង​ដោយ​អំណាចរបស់ព្រះវិហាររ៉ូមាំុងកាតូលិក នោះគាត់ប្រហែលជានឹងបន្តឱ្យកូនេលាសថ្វាយបង្គំគាត់ជាជាងហាមគាត់វិញ។ ដោយសារពេត្រុសត្រូវបានព្រះនៃស្ថានសួគ៌ចាត់ឱ្យមកនោះ សូម្បីតែស្តេចក៏ត្រូវថ្វាយបង្គំគាត់ដែរ តែគាត់បែរជាប្រកាសថា គាត់គ្រាន់តែជាមនុស្សធម្មតាម្នាក់ប៉ុណ្ណោះទៅវិញ។

លោកពេត្រុសបានប្រាប់ដល់កូនេលាស ហើយនិងពួកគ្រួរបស់គាត់អំពីទំនៀមទម្លាប់របស់ពួកយូដាដែលថាការប្រាស្រ័យជាមួយនឹងសាសន៍ដទៃនោះគឺជាការខុសច្បាប់របស់សាសន៍យូដា ហើយក៏ជាការដែលធ្វើឱ្យអាប់ឱនដល់ទីបរិសុទ្ធដែរ។ ទោះបីជាព្រះមិនបានហាម នៅក្នុងបញ្ញត្តិរបស់​ទ្រង់ក៏ដោយ ក៏មនុស្សបានប្រកាន់យកទំនៀមទម្លាប់ទាំងនេះទៅអនុវត្តយ៉ាងខ្ជាប់ខ្ជួនដែរ។ លោកពេត្រុសបានបន្តទៀតថា «អ្នករាល់គ្នាដឹងថា មនុស្សសាសន៍យូដាគ្មានច្បាប់ នឹងសេពគប់នឹងសាសន៍ដទៃ ឬនឹងចូលទៅ​ជិតគេឡើយ តែព្រះទ្រង់បានសម្តែងឱ្យខ្ញុំដឹងថា មិនត្រូវរាប់អ្នកណាថា មិនស្អាត ឬមិនបរិសុទ្ធឡើយ ហេតុនោះបានជាកាលលោកចាត់គេឱ្យទៅហៅខ្ញុំ នោះខ្ញុំបានមកដោយឥតប្រកែកសោះ ដូច្នេះ ខ្ញុំសូមសួរលោក «តើលោកឱ្យខ្ញុំមកមានការអ្វី?»

​អំណានព្រះគម្ពីរពេលល្ងាច៖ កិច្ចការ ជំពូក​ ១០:២៤-៣៣