ថ្ងៃចន្ទ ទី២៧ ខែមិថុនា ឆ្នាំ២០២២
អំណានព្រះគម្ពីរពេលព្រឹក៖ តែផ្លូវរបស់មនុស្សសុចរិត ធៀបដូចជាពន្លឺ ដែលកំពុងតែរះឡើង ដែលភ្លឺកាន់តែខ្លាំងឡើង ដរាបដល់ពេញកំឡាំង ឯផ្លូវរបស់មនុស្សអាក្រក់ នោះធៀបដូចជាសេចក្តីងងឹតវិញ គេមិនដឹងថាចំពប់នឹងអ្វីទេ។ សុភាសិត ៤:១៨-១៩
អំណានប្រចាំថ្ងៃ ការយល់ច្បាស់ពីសេចក្កីសង្គ្រោះដ៏ធំធេង
កូនេលាសក៏បានរ៉ាយរ៉ាប់ប្រាប់ពីដំណើររឿងដែលទេវតានៃព្រះជាម្ចាស់បានលេចមកឯគាត់ ក្នុងការជាក់ស្តែង ដោយនិយាយថា «ខ្ញុំបានចាត់គេឱ្យទៅឯលោក ហើយដែលលោកអញ្ជើញមកនេះក៏ល្អហើយ ឥឡូវនេះ យើងទាំងអស់ នៅចំពោះព្រះដើម្បីនឹងស្តាប់គ្រប់ទាំងសេចក្តីដែលព្រះបានបង្គាប់មកលោក»។ ពេត្រុសក៏បើកមាត់និយាយថា ប្រាកដមែន ខ្ញុំយល់ឃើញថា ព្រះមិនរើសមុខ អ្នកណាទេ គឺនៅក្នុងគ្រប់ទាំងសាសន៍ អស់អ្នកណាដែលកោតខ្លាចដល់ទ្រង់ ព្រមទាំងប្រព្រឹត្ត សេចក្តីសុចរិត នោះគាប់ដល់ព្រះហឫទ័យទ្រង់ដែរ។ ទោះបីជាព្រះទ្រង់សព្វព្រះទ័យនឹងសាសន៍ យួដាជាងសាសន៍ដទៃក៏ដោយ តែប្រសិនបើគេបដិសេធពន្លឺ ហើយមិនព្រមរស់នៅដោយជំនឿ នោះពួកគេក៏មិនបានលើកឡើងឱ្យខ្ពស់ជាងសាសន៍ដទៃដែរ។ តែអស់ទាំងសាសន៍ដទៃដែលដូចជាលោកកូនេលាសដែលកោតខ្លាចដល់ព្រះ ហើយប្រព្រឹត្តដោយសុចរិត ព្រមទាំងរស់នៅតាមពន្លឺដែលគេទទួលបាន នោះត្រូវបានព្រះរាប់ថាជាសុចរិត ហើយទ្រង់ក៏នឹងទទួលពួកគេទាំងនោះដែរ។ ប៉ុន្តែ ជំនឿហើយនិងសេចក្តីសុចរិតរបស់កូនេលាស នឹងមិនបានគ្រប់លក្ខណ៍ទេ ប្រសិនបើគ្មានការយល់ដឹងអំពីព្រះគ្រីស្ទ ដូច្នេះ បានជាព្រះទ្រង់បានចាត់ឱ្យពេត្រុសនាំពន្លឺ ហើយនិងការយល់ដឹងពីទ្រង់ ដើម្បីនឹងបំពេញនូវជំនឿ ហើយនិងសេចក្តីសុចរិតរបស់គាត់។ មានមនុស្សជាច្រើនដែលមិនព្រមទទួលពន្លឺដែលព្រះបានប្រទានឱ្យ ដោយបានយកសម្តីដែលលោកពេត្រុសបានមានប្រសាសន៍ទៅកាន់កូនេលាសថា «អស់អ្នកណាដែលកោតខ្លាចដល់ទ្រង់ ព្រមទាំងប្រព្រឹត្តសេចក្តីសុចរិត នោះគាប់ដល់ព្រះហឫទ័យទ្រង់ដែរ» មកធ្វើជាខអាងទៅវិញ។ ពួកគេបាន និយាយថា យើងមិនចាំបាច់នឹងជឿដល់ព្រះទេ ឱ្យតែយើងប្រព្រឹត្តដោយសុចរិត នោះបានហើយ តែការគិតនេះវាមិនត្រឹមត្រូវទេ ជំនឿក៏ត្រូវតែរួបរួមជាមួយនឹងការប្រព្រឹត្តិដែរ។ ពួកគេត្រូវតែប្រព្រឹត្តតាមពន្លឺដែលព្រះបានប្រទានឱ្យ ហើយក៏ត្រូវធ្វើឱ្យបានប្រសើរជាងនោះទៅទៀត។ ប្រសិនបើព្រះជាម្ចាស់បានបណ្តាលឱ្យគេបានជួបជាមួយនឹងអ្នកបំរើរបស់ទ្រង់ ដែលដឹងពីសេចក្តីពិតដែលមានការគាំទ្រពីព្រះបន្ទូលរបស់ទ្រង់នោះ ពួកគេត្រូវតែទទួលដោយអំណរ។ សេចក្តីពិតតែងតែដើរទៅមុខជានិច្ច ហើយអស់អ្នកណាដែលអះអាងថាសេចក្តីជំនឿតែមួយគត់នឹងជួយសង្គ្រោះគេ នោះកំពុងតែយល់ខុសហើយ ដ្បិតសេចក្តីជំនឿត្រូវបានធ្វើឱ្យរឹងមាំឡើង ហើយបានធ្វើឱ្យគ្រប់លក្ខណ៍តាមការប្រព្រឹត្តិវិញ។
អំណានព្រះគម្ពីរពេលល្ងាច៖ កិច្ចការ ជំពូក ១០:៣៤-៤៣
ខចងចាំ៖ ពេត្រុសឆ្លើយតបថា ចូរអ្នករាល់គ្នាប្រែចិត្តចុះ ហើយទទួលបុណ្យជ្រមុជទឹកទាំងអស់គ្នា ដោយនូវព្រះនាមព្រះយេស៊ូវគ្រីស្ទ ប្រយោជន៍ឲ្យបានរួចពីបាប នោះអ្នករាល់គ្នានឹងទទួលអំណោយទាន ជាព្រះវិញ្ញាណបរិសុទ្ធ ។ កិច្ចការ ២:៣៨
